MACIU 15

1Era sa qai lako mai vei Jisu na Farisi kei ira na daunilawa mai Jerusalemi, ka kaya, 2“Na cava e ratou sega kina ni muria na nomu tisaipeli na nodra i vakavuvuli na qase? Ni ratou sa sega ni dau vuluvulu mada ni bera ni ratou kana.” 3Sa qai sauma ko koya ka kaya vei ira, “Na cava tale ga dou sega kina ni muria na i vakaro ni Kalou e na vuku ni nomudou i vakavuvuli vakavanua? 4Ni sa vakarota na Kalou, ʻDokai rau ko tamamu kei tinamu, kei koya e vosa vakacacataki tamana se tinana, me sa mate sara ga,' 5ia, dou sa kaya, ʻKevaka e kaya e dua na tamata vei tamana se tinana, Na ka e noqu ka a nanumi mo taura me yaga vei iko e sa soli tu vua na Kalou, me sa na kakua ni dokai tamana ko koya.' 6Dou sa qai vakawaletaka kina vaka oqo na vosa ni Kalou e na vuku ni nomudou i vakavuvuli vakavanua. 7Dou tamata dauveivakaisini, sa tukuni kemudou vakavinaka sara ga ko Aisea, ni a kaya, 8ʻEra vakarokorokotaki au na tamata oqo e na tebenigusudra, Sa yawa sara mai vei au na lomadra. 9Sa ka wale na nodra so-kalou vei au, ni ra vakatavuvulitaka na vakasama ni tamata me i vakavuvuli.’ ” 10Sa qai kacivi ira yani na tamata ki vua, ka kaya vei ira, “Dou rogoca mada, ka kila sara, 11e sega ni ka e curu ki na gusu e dau vakadukadukalitaka na tamata, ia, na ka ga e lako mai na gusu, oqori e vakadukadukalitaka na tamata.” 12E ratou sa qai lako mai na tisaipeli ka kaya vua, “Ko ni sa kila li ni ra sa yaloca na Farisi e na nodra rogoca na nomuni vosa?” 13Sa qai sauma ko koya ka kaya, “E na cavu laivi na kau kece ga e sega ni tea ko Tamaqu vakalomalagi. 14Dou laivi ira ga. Era sa dauveituberi mataboko. Kevaka e tubera na mataboko e dua na mataboko, e rau sa sikalutu ruarua ” 15Sa qai sauma ko Pita ka kaya vua, “Mo ni vakamacalataka mada na vosa vakatautauvata vei keitou.” 16Sa qai kaya vei iratou ko koya, “O i kemudou tale ga, dou sa sega tiko ga ni kila rawa, ne? 17Dou sega tiko li ni kila ni ka ga e curu yani ki na gusu e lutu ki na kete ka curu tani yani? 18Ia na ka e curu tani mai na gusu e lako sara mai loma ni tamata, ka sa i ira na veika ga oqo e vakadukadukalitaka na tamata. 19Ni sa dau lako mai na loma ni tamata na vakanananu ca, na daulaba, na dauyalewa, na dauveibutakoci, na daubutako, na veibeitaki vakailasu, kei na dauvakaucaca. 20Sa i ira na veika ga oqo e vakadukadukalitaka na tamata; ia, e sega ga ni vakadukadukalitaka na tamata na nona kana ka sega mada ni vuluvulu.” 21Sa qai biuta na vanua ko ya ko Jisu ka lako yani ki na yasayasa vaka Taia kei Saitoni. 22E dua na yalewa ni Kenani ka cavutu mai na yasayasa ko ya e mai tagi vua ka kaya, “Ni lomani au mai na Turaga, na Luve i Tevita. E curumi tevoro vakaukauwa sara tiko ga na luvequ-yalewa ” 23Ia e sega sara ni dua na vosa e sauma kina ko koya ki vua. E ratou sa qai lako mai vua na tisaipeli ka mai kerekere tiko ga vua, ka kaya, “Ni vakatalai koya tani, ni sa mai tagi muri keda tiko ga ” 24Ia, sa qai vosa vua ka kaya, “Au sa sega ni talai mai ki vei ira na tani, vei ira ga na sipi yali ni mataqali i Isireli. 25Ia, sa lako ga mai na yalewa ka cuva vakarokoroko e matana, ka kaya, “Turaga, ni vukei au mada ” 26Sa qai sauma ko koya, ka kaya, “E sega ni vinaka me kau na kedra madrai na gone ka biu yani vei ira na koli.” 27E sa qai kaya ga na yalewa, “Io, Turaga, ko ira tale ga na koli era dau kania na meme ni kakana sa lutu mai na teveli ni nodra turaga ” 28A qai sauma ko Jisu ka kaya, “Yalewa, sa levu dina na nomu vakabauta. Me yaco sara vei iko me vaka na ka ko vinakata.” Sa bula sara na luvena-yalewa e na tiki ni gauna ga ko ya. 29Sa qai lako tani mai kea ko Jisu, ka lako yani e na baravi ni wasawasa ko Kalili, ka qai cabe ki na vanua veidelana, ka tiko sobu kina. 30Era sa qai lako mai vua e lewe vuqa sara ka ra kauti ira mai na lokiloki, na gera, na mataboko, na galu, kei ira na lewe vuqa tale, ka ra mai vakotori ira e na yava i Jisu, ka mani vakabulai ira ko koya. 31Era sa qoroqoro kina na lewe vuqa, ni ra raica ni ra sa vosa na galu, era sa bula na gera, ka ra sa lako na lokiloki, ka ra sa rai rawa na mataboko, ka ra vakacaucautaka na Kalou ni Isireli. 32Sa qai kacivi iratou mai na nona tisaipeli ko Jisu, ka kaya, “Au sa lomani ira dina na lewe vuqa, ni sa siga tolu mai oqo na nodra tiko vata voli kei au, ka sa sega na ka me ra kania, ia au sega ni via vakasukai ira yani ka ra sega mada ni kana, de ra la'ki malumalumu e gaunisala ” 33E ratou sa qai kaya vua na tisaipeli, “Edatou na rawata li mai vei na kakana e na vanua lala oqo, me rauti ira na lewe vuqa oqo?” 34Sa qai kaya vei iratou ko Jisu, “E vica na i buli madrai e tiko vei kemudou?” E ratou sa qai kaya, “E vitu ka vica ga na ika lalai ” 35Sa qai vakaroti ira na lewe vuqa me ra tiko sobu e na qele. 36Sa qai taura na i buli madrai e vitu kei na ika, ia ni sa vakavinavinaka oti, sa qai dovidovia ka solia yani vei iratou na nona tisaipeli, me ra wasea ko iratou na tisaipeli ki vei ira na lewe vuqa. 37Era sa qai kana kece ga ka mamau, ka ra tomika vata na i vovo ni ka sa dovi, ka mani sinai kina e vitu na sova. 38Ko ira ka ra kana oqo era lewe va na udolu na tagane, ka sega ni wili kina ko ira na yalewa kei ira na gone. 39Sa qai vakasukai ira yani na lewe vuqa ko koya ka sa vodo ki waqa, ka lako yani ki na yasayasa vaka-Makitala.

will be added

X\