MACIU 14

1Eroti na tui na i tukutuku kei Jisu; 2ka qai kaya vei iratou na nona turaga, “Oqo ko Joni na Dauveipapitaisotaki, sa vakaturi cake tale mai na mate; sa i koya ga sa cakava kina na veika mana oqo ” 3Ni a sa tauri Joni mada ko Eroti, ka vesuki koya e na valeniveivesu e na vuku i Erotiasa, na wati Filipi na tacina, 4ni a kaya vua ko Joni, “Sa sega sara ni dodonu vei iko mo tauri koya ” 5E dina ga ni a via vakamatei koya sara, ia e a rerevaki ira ga na tamata ni ra nanuma tu ni parofita ko Joni. 6Ia ni sa caka na kanavata ni siga ni sucu i Eroti, e a qai meke vei ira na luve i Erotiasa yalewa ka vakayalomarautaki Eroti sara, 7sa i koya e qai yalayala kina ka bubului me solia vua na ka ga e kerea. 8Ni sa vakauqeti koya kina ko tinana, sa qai kaya, “Mo ni solia mai vei au na ulu i Joni na Dauveipapitaisotaki e na dua na dari .” 9Sa bau rarawa dina sara na tui, ia e na vuku ga ni nona bubului, e na vukudra tale ga era kana vata kaya, sa mani lewa ga me soli. 10Sa talatala yani me tamusuki na ulu i Joni e na valeniveivesu, 11ka qai kau mai na uluna e na dua na dari ka mai soli vua na goneyalewa, ka la'ki solia sara na goneyalewa vei tinana. 12E ratou sa qai lako mai na tisaipeli nei Joni ka kauta na yagona, ka buluta, ka ratou qai la'ki tukuna vei Jisu. 13Ni sa rogoca ko Jisu, sa qai soko lo tani mai kea e na dua na waqa ki na dua na vanua lala, ia ni ra sa rogoca na lewe vuqa era sa qai taubale e vanua ka muri koya mai na veikoro. 14Ni sa sobu yani e matasawa ko Jisu, sa raici ira e dua na i lala levu; ka sa tubu na nona lomani ira, ka sa vakabulai ira na nodra tauvi-mate. 15Ni sa yakavi mai, e ratou sa qai lako mai vua na nona tisaipeli, ka kaya, “Oqo na vanua lala, ka sa kal^ na siga; mo ni vakatalai ira na lewe vuqa, ka me ra bau lako ki na veikoro lalai ka volia kina na kedra.” 16Ia, a qai kaya vei iratou ko Jisu, “E sega ni yaga me ra lako, dou solia ko i kemudou e so na ka me ra kania ” 17E ratou sa qai kaya vua, “E sega ni tu e ke vei keitou e dua na ka, e lima wale ga na i buli madrai ka rua na ika .” 18Sa qai kaya ko Jisu, “Dou kauta mai vei au.” 19Ni sa vakaroti ira oti na lewe vuqa me ra tiko sobu e na veico, a qai taura ko koya na i buli madrai e lima kei na ika e rua, ka tacake ki lomalagi, ka vakavinavinaka, ka dovidovia na madrai ka solia vei iratou na nona tisaipeli, ka ratou tauca yani na tisaipeli vei ira na lewe vuqa. 20Era sa qai kana kece ka mamau. Era sa mani taura e tinikarua na sova sisinai e na i vovo ni madrai. 21E rauta e lima na udolu na tagane e ra kania na veibuli madrai, ka sega ni okati kina ko ira na yalewa kei ira na gone. 22Sa qai vakaroti iratou sara na nona tisaipeli me ratou vodoka na waqa, ka liu yani ki tai kadua, ni sa vakasukai ira tiko mada na lewe vuqa ko koya. 23Ni sa vakatalai ira yani na lewe vuqa, sa qai cabe taudua ko koya ki na veidelana me masu. 24Ni sa yakavi mai sa tiko duadua ga ko koya e kea. Ia na waqa sa tiko yawa sara yani mai vanua, ka suaigelegele sara e na ua, ni saqati iratou tiko yani na cagi. 25E na maliwa ni tolu kei na ono e na mataka, e sa qai lako mai vei iratou ko Jisu, ka lako voli mai e deIa ni wai. 26Ni ratou sa raici koya na tisaipeli ni sa lako voli e dela ni wai, e ratou sa rere vakalevu, ka kaya, “E dua na yalo!” E ratou sa qoqolou ni ratou sa rere. 27Ia, sa mani vosa sara yani vei iratou ko Jisu, ka kaya, “Dou vakacegu! Sa i au ga, dou kakua ni rere ” 28Sa qai vosa vua ko Pita ka kaya, “Na Turaga, kevaka sa i kemuni, ni kaya me'u lako yani vei kemuni e dela ni wai.” 29Sa kaya sara ko Jisu, “Lako mai ” Sa qai kalawa sobu mai waqa ko Pita ka lako e dela ni wai, me lako yani vei Jisu. 30Ia, ni sa raica ni sa kaukauwa na cagi, sa qai rere, ka vakatekivu me lutu dromu ka qai kaci, ka kaya, “Na Turaga, ni vakabulai au ” 31Sa dodoka sara yani na ligana ko Jisu ka tauri koya, ka kaya vua, “Tamata lailai na nomu vakabauta, na cava tale ko vakatitiqa kina?” 32Ia ni rau sa vodo ki waqa, sa ruru na cagi. 33E ratou sa qai lako mai na tiko e waqa ka mai cuva vua, ka kaya, “Sa i kemuni dina ga na Luve ni Kalou ” 34Ni ratou sa lako ki tai kadua, e ratou sa yaco yani ki na vanua ko Kenisereti. 35Era sa kilai koya ko ira na tamata mai na vanua ko ya, ka ra sa qai talatala ki na yasayasa kece ga e vakavolivolita, me ra kauta mai vei koya na tauvi-mate kece ga. 36Era sa kerei koya me ra bau tara wale ga na tutu ni nona i sulu; ia, ko ira kece ga era tara, era sa vakabulai.

will be added

X\