MACIU 13

1E na siga ko ya sa biuta mai na vale ko Jisu ka la'ki tiko sobu e matasawa, 2ka ra sa qai soqoni vata mai vei koya e lewe vuqa sara, sa mani vodoka kina e dua na waqa ka dabe toka kina, ka ra sa tu kece ga yani na lewe vuqa mai matasawa. 3Sa qai tukuna vei ira e vuqa na ka e na vosa vakatautauvata, ka kaya: “E a lako yani e dua na dauteitei me kabukaburaki. 4Ni sa kabukaburaki voli, sa qai lutu e so na sore e na loma ni sala, ka ra lako mai na manumanu vuka ka kania. 5E lutu e so tale na sore ni kau e na vanua veivatu, ka sega soti kina na qele, ka tubu cake sara mai vakatotolo, ia ni sega soti ni vavaku na kena qele; 6ni sa cabe na siga, sa malai mai, ia ni sa sega na wakana sa raqosa sara. 7Sa lutu tale e so e na maliwa ni veiwavakavotona, ka sa tubu cake na veiwavakavotona ka vakaruguta. 8Era sa mani lutu e so e na qele vinaka, ka mani vua: e vuai drau e so, e onosagavulu e so, ka tolusagavulu e so. 9O koya sa vakadaligana, me rogo kina me rogoca sara ” 10E ratou sa qai lako mai na nona tisaipeli ka tarogi koya, “Na cava mada ko ni vosa tiko ga kina vei ira e na vosa vakatautauvata?” 11Sa qai sauma ko Jisu ka kaya vei iratou, “Sa soli vei kemudou ga mo dou kila na veika vuni ni matanitu vakalomalagi, ia e sa sega ga ni soli vei ira. 12Ni o koya ga e tu vua na ka, e na soli vakalevu tale vua, ka na levu sara na nona, ia o koya e sega vua na ka, e na kau tani tale mai vua na ka sa bau toka vua. 13Sa i koya oqo au vosa tiko kina vei ira e na vosa vakatautauvata, me ra rai tu ka sega ni kunea, ka rogo tu ka sega ga ni kila. 14Sa vakayacori dina vei ira na vosa ni Kalou ka a parofisaitaka ko Aisea ka vaka: ʻDou na rogoca vakaidina ka lecava tu ga, ka dou na raica vakaidina ka sega ga ni kunea. 15Ni sa moce na lomadra na tamata oqo, ka sa didivara mai na daligadra, ka sa bobo na matadra. Kevaka e sega, e na rai na matadra, ka rogo na daligadra, ka kila na lomadra, ka lesu mai me'u vakabulai ira.’ 16“Ia sa kalougata na matamudou, ni sa rai, kei na daligamudou ni sa rogo. 17Ni'u sa kaya vakaidina vei kemudou, ni ra a gadreva e lewe vuqa na parofita kei na tamata yalododonu me ra raica na ka dou sa raica, ka mani sega ni raica; me ra rogoca na ka dou sa rogoca, ka mani sega ni rogoca. 18“O koya gona mo dou rogoca mada na vosa vakatautauvata ni daukabukaburaki. 19Ni sa dua e sa rogoca na vosa me baleta na matanitu ka sega ni kila rawa, sa dau lako mai na Vunica ka kauta laivi na ka sa kaburaki tu e lomana. Sa i koya oqo na ka e kaburaki e na loma ni sala. 20Na kena e kaburaki e na vanua veivatu, sa i koya e rogoca na vosa ka ciqoma sara e na reki; 21ka sega ga na wakana e lomana, e mani tu dei vakalailai ga; ia, ni sa qai tubu na rarawa se na veivakacacani e na vuku ni vosa, era tarabe sara. 22Na kena e kaburaki e na veiwavakavotona, sa i koya e rogoca na vosa, ia, sa qai curu yani na lomaocaoca ni vuravura oqo, kei na veitemaki ni yau ka vakaruguta na vosa, ka sega kina ni vua. 23Ia, na kena e kaburaki e na qele vinaka, sa i koya sa rogoca na vosa ka kila rawa, ka vua, ka vuai drau e so, onosagavulu e so ka tolusagavulu e so ” 24Sa qai tukuna vei ira e dua tale na vosa vakatautauvata, ka kaya, “E rawa ni vakatautauvatataki ma Matanitu vakalomalagi kei na dua na tamata e kaburaka na sore ni kau vinaka e na nona i teitei. 25Ia, ni ra sa moce tu na tamata sa qai lako mai na nona meca ka kaburaka tale ga na sore ni kau ca e na maliwa ni witi, ka mani lako yani. 26Ia ni sa tubu mai na witi ka tekivu vua, sa basika tale ga na kau ca. 27Era sa qai lako mai na nona tamata na i taukei ni vale ka kaya vua, ʻTuraga, ko ni a sega li ni kaburaka na sore ni kau vinaka e na nomuni i teitei? Era sa qai lako ga mai vei na kau ca?' 28Sa qai kaya vei ira ko koya, ʻE sa cakava na ka oqo e dua na meca.' Era sa mani kaya vua na nona tamata, ʻVaka e vei, ko ni vinakata me keimami sa la'ki cavuraka?' 29Sa qai kaya ko koya, ʻKakua, de dou cavuraka tale ga na witi e na nomudou cavuraka tiko na kau ca. 30Laiva mada ga me rau tubu vata ruarua me yacova na cava ni yabaki, ni sa cava na yabaki au na qai kaya vei ira na dautatamusuki, ʻDou kumuna vata mada e liu na kau ca, ka vauvauci ira vata ka me visa, ka kumuna vata mai na witi ki na noqu lololo.ʻ” 31Sa qai tukuna vei ira ko Jisu e dua tale na vosa vakatautauvata, ka kaya, “Sa tautauvata na matanitu vakalomalagi kei na dua na sore ni musita e taura e dua na tamata ka tea e na nona i teitei; 32sa ka lailai duadua vei ira na sore kece ga; ia ni sa tubu cake, sa ka levu duadua vei ira na kau lalai; ka sa yaco me kau dina, ka ra lako mai kina na manumanu vuka ka caka sova rawa e na veitabana” 33E sa qai tukuna vei ira ko koya e dua tale na vosa vakatautauvata, ka kaya, “Sa tautauvata na matanitu vakalomalagi kei na i vakatubu, e taura e dua na yalewa ka vunia e na loma ni tolu na i vakarau falawa me curumi i vakatubu taucoko sara.” 34Sa tukuna na veika kece ga oqo ko Jisu vei ira na lewe vuqa e na vosa vakatautauvata; ka sega tale ni bau vosataka wale e dua na ka vei ira; ia e na vosa vakatautauvata ga. 35Sa i koya me vakayacori kina na ka a vosataka na parofita, ka kaya: “Au na vosa ga e na vosa vakatautauvata, au na tukuna na veika sa vuni tu mai na gauna ka buli kina ko vuravura.” Vakamacalataka ko Jisu na Vosa Vakatautauvata ni Kau Ca 36Sa qai biuti ira na lewe vuqa ka curu ki vale. E ratou sa qai lako mai vua na nona tisaipeli ka kaya, “Ni vakamacalataka mada vei keitou na vosa vakatautauvata ka baleta na kau ca e na i teitei.” 37Sa qai sauma ko Jisu ka kaya vei ira, “O koya e kaburaka na sore ni kau vinaka, sa i koya na Luve ni Tamata; 38na i teitei sa i vuravura; na sore vinaka sa i ira na luve ni matanitu; na kau ca sa i ira na luve ni Vunica; 39na meca e kaburaka na sore ni kau ca sa i koya na tevoro; na cava ni yabaki sa i koya na i vakataotioti kei vuravura; kei ira na dautatamusuki sa i ira na agilosi. 40Me vaka ga ni sa kumuni vata na kau ca ka visa e na buka waqa, e na vaka tale ga kina e na i vakataotioti kei vuravura. 41E na talai ira yani na nona agilosi na Luve ni Tamata ka ra na soqona vata mai na nona matanitu na veika kece ga e dau veivakacalai, kei ira ka dau caka ca, 42ka ra na biuti ira ki na lovo buka waqa; era na dau tagi kina ka vakasequruquru bati. 43Era na qai cila na yalododonu me vaka na matanisiga ni Matanitu nei Tamadra. O koya e vakadaligana, me rogoca sara. 44“Sa tautauvata na matanitu vakalomalagi kei na i yau sa vuni tu e na dua na i teitei, ka mani kunea e dua na tamata ka sega ni tukuna, ni sa rui rekitaka, sa mani la'ki volitaka kina na veika kece ga e tu vua, ka volia na i teitei ko ya. 45“E dua tale, sa tautauvata na matanitu vakalomalagi kei na dua na tamata dauveivoli ka vakasaqara voli na mataniciva totoka, 46ni sa kunea e dua na mataniciva talei sara, sa la'ki volitaka na veika kece ga ka tu vua, ka volia sara. 47“E dua tale, sa tautauvata na matanitu vakalomalagi kei na lawa ni yavi, sa viritaki ki wai, ka tagava mai na ika e na kena veimataqali kece ga; 48ni sa sinai, era sa qai yavia ki matasawa, ka ra dabe, ka tugana na ka vivinaka ki na sova, ka biuta tani na kena ka ca. 49E na vaka kina e na i vakataotioti kei vuravura; era na lako mai na agilosi ka tawasei ira tani na tamata ca mai vei ira na yalododonu, 50ka biuti ira laivi tu ki na lovo buka waqa; era na dau tagi kina ka vakasequruquru bati. 51“Dou sa krla tiko li na verka oqo?” Eratou sa kaya vua, “Io.” 52Sa qai kaya vei rratou ko koya, “O koya gona, sa tautauvata kina na daunilawa kece ga ka ra sa vakavulici e na ka ni matanitu vakalomalagi, kei na i taukei ni dua na vale sa kauta mai na nona lololo na veika vou kei na verka makawa tale ga ” 53Ni sa vakaotia ko Jisu na veivosa vakatautauvata oqo, sa qai lako tani mai kea, 54ka yaco sara mai ki na nona koro, ka vakatavulici ira e na nodra valenilotu, ka ra sa kurabui kina, ka kaya, “E rawata mai vei na tamata oqo na vuku oqo kei na veika mana oqo? 55E sega li ni ko koya oqo na luve ni matai? E sega li ni yaca i tinana ko Meri, ka sega li ni ratou tacina ko Jemesa kei Josefa, kei Sarmoni, kei Jutasa? 56E sega li ni ratou trko oqo vata kei keda na ganena kece? Sa qai rawata beka ga mai vei na tamata oqo na veika kece oqo?” 57Era sa qai levaci koya sara. Ia, sa qai kaya vei rra ko Jisu, “Sa dau dokai na parofita, ia e segai ga e na nona vanua kei na nona vale.” 58Sa mani sega ni cakava e kea ko koya e vuqa na cakacaka mana, e na vuku ni nodra tawa vakabauta.

will be added

X\