MACIU 12

1E na gauna ko ya sa qai lako ko Jisu e na loma ni veiloga ni sila e na dua na Siga ni Vakacecegu. E ratou sa viakana na tisaipeli, ka vakatekivu doloka na veisola ni sila, ka kania. 2Ni ra sa raica ko ira na Farisi era sa qai kaya vua, “Raica, e ratou cakava tiko na nomu tisaipeli na ka e sega ni tara me caka e na Siga ni Vakacecegu ” 3Ia sa qai kaya vei ira ko koya, “Dou sa sega beka ni wilika na ka e a cakava ko Tevita ni sa via kana ko koya kei iratou ka tiko vata kaya. 4E a curu ki na vale ni Kalou ka kania na veibuli madrai tabu, na ka e sega ni vakatarai vei koya me kania, se vei ira ka tiko vata kaya, ia vei ira duadua ga na bete? 5Se dou sa sega beka ni wilika e na Lawa na nodra a vakacacana na Siga ni Vakacecegu ko ra na bete e Valenisoro e na Siga ni Vakacecegu ka ra sega ni ca kina. 6Au sa kaya vei kemudou sa tu e ke e dua sa uasivi vakalevu mai na Valenisoro. 7Ia, kevaka dou sa kila na i balebale ni vosa oqo, ʻAu vinakata ga na lewa loloma ka sega na i soro' ke dou a sega ni vakacacani ira na tawa cala. 8Ni sa Turaga ni Siga ni Vakacecegu na Luve ni Tamata .” 9Sa qai lako tani mai kea ko Jisu ka curu ki na nodra valenilotu. 10E tiko kina e dua na tamata ka mate tu e dua na ligana. Era sa qai tarogi koya, ka kaya, “E tara li me caka na veivakabulai e na Siga ni Vakacecegu?” Era kaya ko ya me rawa ni ra beitaki koya kina. 11Sa qai kaya vei ira ko Jisu, “O cei vei kemudou sa dua na nona sipi, ka mani lutu ki na dua na davuke e na Siga ni Vakacecegu, e na sega li ni la'ki taura ka vueta mai? 12Sa qai wacava li na uasivi cake ni tamata mai na sipi! Sa i koya oqo e tara kina me caka na ka vinaka e na Siga ni Vakacecegu” 13Sa qai kaya vua na tamata ko ya, “Dodoka mai na ligamu.” Sa qai dodoka yani, ka mani vakabulai me vaka na ligana kadua. 14Era sa qai curu ki tautuba na Farisi ka la'ki bosei koya me ra vakamatea. 15Ni sa kila ko Jisu, sa lako tani sara mai ke ya, ka ra muri koya na lewe vuqa, ka sa vakabulai Ira kece ga. 16Sa vakarota matua vei rra me ra kakua sara ni tukuni koya, 17me vakayacori sara kina na vosa ka vosataka ko Aisea na parofita, ka kaya, 18“Raica, na noqu tamata, o koya au sa digitaka, na noqu daulomani, sa vinakati koya dina na yaloqu. Au na solia vua na Yaloqu, ka na vunautaka na lewa dodonu vei ira na veimatanitu tani. 19E na sega ni veileti se kaila, ka na sega e dua e rogoca na domona e na veigaunisala. 20E na sega ni musuka na gasau sa bibivoro se bokoca na cina sa viavia boko, me yacova ni sa gumatua sara na lewa dodonu; 21ka ra na qai vakanuinui ki na yacana ko rra na veimatanitu tani ” 22E sa qai kau mai vua e dua e curuma tu e dua na tevoro, e mataboko, ka galu tale ga, ka mani vakabulai koya, ka sa qai vosa rawa kina na tamata galu, ka rai rawa tale ga. 23Era sa qoroqoro na lewe vuqa, ka kaya, “Sa i koya beka oqo na Luve i Tevita?” 24Ia, ni ra sa rogoca ko ira na Farisi, era sa qai kaya, “E vakasavi ira tiko na tevoro na tamata oqo e na kaukauwa duadua ga i Pielisepupi na nodra i liuliu na tevoro.” 25Ni sa kila na nodra vakasama ko Jisu, sa qai kaya vei ira, “Na matanitu e veisei tu vaka i koya e na dau rusa ga, kei na koro se vale ga e veisei tu vaka i koya e na sega ni tu dei. 26Ia kevaka e vakasavi Setani ko Setani, sa qai veisei vaka i koya; e na tu dei vaka e vei na nona matanitu? 27Ia, kevaka au dau vakasavi ira tani na tevoro e na kaukauwa i Pielisepupi, ia e na kaukauwa ga i cei era vakasavi ira tani kina ko ira na luvemudou. E na vuku ni ka oqo, era sa na qai nomudou turaganilewa ga kina. 28Ia kevaka ga au dau vakasavi ira tani na tevoro e na kaukauwa ni Yalo ni Kalou, sa qai yacovi kemudou dina mai na Matanitu ni Kalou. 29“Se e na curuma rawa vaka e vei e dua na vale ni tamata qaqa me kovea na nona i yaya, kevaka e sa sega mada ni vesuki koya na qaqa? E na qai kovea rawa kina na nona i yaya. 30“O koya e sega ni tovata kei au sa noqu meca, kei koya e sega ni kumuna vata kei au sa veibiuyaka. 31O koya oqo au sa kaya kina vei kemudou, e na bokoci rawa vei ira na tamata na i valavala ca kece ga kei na vosa vakacaca kece ga, ia e na sega ga ni bokoci rawa na vosa vakacacataka na Yalo Tabu. 32O koya e vosa vakacacataka na Luve ni Tamata e na bokoci rawa na nona i valavala ca, ia o koya e vosa vakacacataka na Yalo Tabu e na sega ni bokoci rawa na nona i valavala ca e na gauna oqo, se tawa mudu. 33“Dou lewa ga mai, se e kau vinaka ka vinaka tale ga kina na vuana, se e kau ca ka ca tale ga kina na vuana; ni sa dau kilai na kau e na vuana. 34Dou kawa ni gata! Dou sa vosataka rawa vakacava na ka vinaka ni dou tamata ca tu? Ni sa dau vosataka na gusuda na ka ga sa sinai tu kina na lomada. 35Sa dau kauta mai na ka vinaka na tamata vinaka mai na nona lololo vinaka, ka sa dau kauta mai na tamata ca e na veika ca mai na nona lololo ca. 36“Au sa kaya vei kemudou ni ra na tarogi na tamata e na siga ni lewa e na vuku ni vosa vakatani kece era sa cavuta; 37ni ko na vakadonui e na vuku ni nomu vosa, ko na cudruvi tale ga e na vuku ni nomu vosa ” 38Era sa qai vosa e so na Farisi ka kaya, “Na i Vakavuvuli, keimami via raica e dua na i vakatakilakila mai vei iko.” 39Sa qai sauma ko koya ka kaya vei ira, “Sa dau vakasaqara e dua na i vakatakilakila na i tabatamata ca ka dauyalewa, ia, e na sega ni soli kina e dua na i vakatakilakila, na i vakatakilakila ga i Jona na parofita. 40Me vaka ga ni a siga tolu ka bogi tolu ko Jona e na kete ni ika levu, e na siga tolu ka bogi tolu vaka tale ga kina na Luve ni Tamata e na loma ni qele. 41Era na tu cake e na veilewai na kai Ninive kei na i tabatamata oqo ka beitaka, ni ra a veivutuni e na vunau i Jona, ia, sa tu oqo e dua e levu cake vei Jona. 42E na tu cake mai na Radi ni Ceva e na veilewai kei na i tabatamata oqo ka beitaka, ni a lako mai ko koya mai na i yalayala sara kei vuravura me mai rogoca na vuku i Solomoni, ia, sa tu oqo e dua e levu cake vei Solomoni. 43“Ni sa takali mai vua na tamata na yalo velavela, sa na veilakoyaki voli e na vanua veitalasiga, me vaqara i vakavakacegu, ia ka sega ni kunea. 44Sa qai kaya, ʻAu na lesu tale ki na noqu vale ka'u a lako mai kina.' Sa qai kunea ni sa lala tu, ka samaki tu ka tuvani vinaka tu. 45Sa qai lako ko koya ka kauta mai e vitu tale na tevoro ca cake mai vua, ka ratou curu ka tiko kina; ka mani yaco e muri me ca cake sara na tamata ko ya mai na nona bula e liu. E na yaco vaka tale ga kina ki na i tabatamata ca oqo ” 46Ni sa vosa tiko ga ko Jisu vei ira na lewe vuqa, sa tu e tautuba na tinana kei iratou na tacina, ka ratou via vosa tiko vua. 47Sa qai kaya vua e dua, “Raica, e ratou tu e tautuba na tinamu kei iratou na tacimu, e ratou via vosa vei iko.” 48Ia, sa qai vosa vei koya ka tukutuku vua, ka kaya, “O cei na tinaqu, o cei na taciqu?” 49E sa qai dodoka na ligana vei ira na nona tisaipeli, ka kaya, “Raica na tinaqu kei ira na taciqu! 50O koya ga e cakava na loma i Tamaqu mai lomalagi, sa i koya oqo na taciqu, kei na ganequ kei na tinaqu ”

will be added

X\