MACIU 11

1Ni sa oti na nona vakaroti iratou na nona tisaipeli e lewe tinikarua ko Jisu, sa qai lako tani mai ke ya me la'ki vakatavuvuli ka vunau e na nodra veikoro. 2Ni sa rogoca ko Joni mai valeniveivesu na cakacaka i Karisito, sa qai tala e rua na nona tisaipeli, 3me rau la'ki tarogi koya, “Sa i kemuni beka ko koya me lako mai, se me da waraka e dua tale?” 4A sauma ko Jisu ka kaya, “Drau lako, ka tukuna vei Joni na veika drau sa rogoca ka raica tiko: 5era sa rai na mataboko, ka ra lako na lokiloki, era sa vakasavasavataki na vukavuka, era rogo rawa na didivara, ka ra vakaturi cake tale na mate, ka sa vunautaki na i tukutuku vinaka vei ira na dravudravua. 6Sa kalougata ko koya e sega na ka e kunea vei au me vagolei koya tani.” 7Ni rau sa lako tale, sa qai tekivu vosa vei ira na lewe vuqa ko Jisu me baleti Joni: “Na cava li dou a lakova ki na vanua veitalasiga? Na gasau sa yavalati e na cagi? 8Ia, na cava li dou a lakova? Mo dou raica e dua na tamata e vakaisulu e na i sulu malumu? Raica, ko ira era daramaka na i sulu malumu era dau kunei ga e na nodra veivale na tui. 9Ia, na cava ga dou a lakova? Mo dou raica e dua na parofita? Io, au sa kaya vei kemudou, e dua e levu cake mai na parofita. 10Sa i koya sa volai tu vaka oqo e na vukuna: ʻRaica, au sa tala na noqu dautukutuku me liu vei iko, e na caramaka na nomu sala e matamu.’ 11Au sa kaya vakaidina vei kemudou, e sa sega mada ni tubu oti e dua mai vei ira ka sucu e na yalewa me levu cake mai vei Joni na Dauveipapitaisotaki; ia, ko koya e lailai duadua e na matanitu vakalomalagi sa qai uasivi cake vua. 12Mai na gauna i Joni na Dauveipapitaisotaki me yacova oqo, e sa sota kaya tiko mai na matanitu vakalomalagi na veivorati kaukauwa ka ra tovolea na tamata voravora me ra tarova vakaukauwa. 13Ni ra a tukuna tiko mai ko ira na parofita kei na Lawa me yacovi Joni mai; 14ia, kevaka sa lomamudou mo dou vakabauta, sa i koya oqo ko Ilaija o koya sa dodonu me lako mai. 15O koya e vakadaligana, me rogo kina me rogoca sara. 16“Ia, me'u vakatautauvatataka mada e na cava na i tabatamata oqo? E vakataki ira na gone era tiko voli e na veimakete, ka ra kacivi ira na nodra i caba ka kaya, 17ʻKeitou a uvu i vakatagi vei kemudou ia dou a sega ni meke. Keitou a vutugu, ia dou a sega ni rarawa.’ 18Ni sa lako mai ko Joni ka dau lolo ka sega ni daugunu waini, ka ra kaya, ʻE tiko vua e dua na tevoro.' 19Sa lako mai na Luve ni Tamata ka kana ka gunu, ka ra kaya, ʻRaica na tamata daukana ka daugunu waini ka nodra i tokani na daukumuni i vakacavacava kei ira na tamata i valavala ca!' Sa dau vakadinadinataki na vuku e na we ni nona cakacaka.” 20Sa qai tekivu me vunauca na veikoro e sa caka vakalevu sara kina na nona cakacaka mana, ni ra sa sega ni veivutuni. 21“Ko sa kalouca sara Koresini! Ko sa kalouca sara Peciseita! Ni kevaka e a caka mai Taia kei Saitoni na cakacaka mana ka a caka vei kemudrau, ke rau sa veivutuni makawa e na i sulu taga kei na dravusa. 22Ia, au sa kaya vei kemudrau, e na ca vakalailai ko Taia kei Saitoni e na siga ni lewa, ko i kemudrau, drau na ca vakalevu. 23O iko tale ga, Kapenaumi, ko sa vakacerecerei iko li ki lomalagi? Ko na biu sobu ga ki Etesi. Ni kevaka a caka mai Sotoma na veika ka a caka vei iko, ke sa tu ga me yacova na siga oqo. 24Ia, au sa kaya vei iko ni na ca vakalailai ko Sotoma e na siga ni lewa, ko iko, ko na ca vakalevu ” 25E na gauna ko ya sa qai vosa ko Jisu ka kaya, “Au sa vakavinavinaka vei kemuni, Tamaqu, na Turaga ni lomalagi kei vuravura, ni ko ni sa vunia na veika oqo vei ira na vuku kei ira na kilaka, ka vakatakila ga vei ira na gone lalai: 26io, Tamaqu, ni sa vaka oqori na nomuni lewa loloma. 27“Sa soli tu vei au na veika kece ga mai vei Tamaqu, ka sega e dua e kila se ko cei na Luvena, na Tamaqu duadua ga, ka sega e dua e kila se ko cei na Tamaqu, na Luvena duadua ga, kei koya ga e digitaka na Luvena me vakatakilai koya. 28“Dou lako mai vei au, ko i kemudou kece ga sa oca ka bikai, ka'u na vakacegui kemudou. 29Vakataqara vei kemudou na noqu i vua, ka vuli vei au, ni'u sa yalomalua ka yalomalumalumu, ka dou na kunea kina na vakacegu ni yalomudou. 30Ni sa rawarawa na noqu i vua, ka mamada na noqu i colacola ”

will be added

X\