MACIU 10

1Sa qai kacivi iratou mai na nona tisaipeli e lewe tinikarua ka solia vei iratou na kaukauwa me ratou vakasavi ira kina na tevoro, ka vakabula na tauvi-mate kece ga kei na malumalumu kece ga. 2Sa i koya oqo na yacadratou na i apositolo e lewe tinikarua: na i matai ko Saimoni ka vakatokai ko Pita, kei Adriu na tacina; kei Jemesa na luve i Sepeti, kei Joni na tacina; 3ko Filipi kei Pacolomiu; ko Tomasi kei Maciu na daukumuni i vakacavacava; ko Jemesa na luve i Alifio, kei Cateo; 4ko Saimoni na Dausasaga kei Jutasa Isikarioti, o koya tale ga ka a bukiveretaki koya yani. 5Sa qai talai iratou yani na lewe tinikarua oqo ko Jisu, ka vakaroti iratou ka kaya, “Dou kakua ni muria na sala ki vei ira na veimatanitu tani, ka mo dou kakua ni curu ki na dua na koro vaka-Samaria; 6ia, mo dou lako ga ki vei ira na sipi ni mataqali ni Isireli era sa yali tu. 7Ni dou sa lako voli, dou vunau, ka kaya, ʻSa voleka mai na matanitu vakalomalagi.' 8Dou vakabulai ira na tauvi-mate, vakaturi ira cake tale na sa mate, vakasavasavataki ira na vukavuka, vakasavi ira na tevoro; dou sa rawata wale, mo dou solia wale tale ga. 9Kakua ni kauta na koula se siliva se i lavo e na nomudou beleti, 10kakua na taga ni vaqa e gaunisala, se rua na sote, se na i vava, se na i titoko; ni sa dodonu me soli vua na tamata cakacaka na kena kakana. 11“E na koro kece ga dou curu kina, dou vakataroga se ko cei na tamata dina e tiko kina; dou la'ki tiko vua me yacova ni dou sa lako tale yani. 12Ni dou sa curu ki vale, dou kidavaka; 13kevaka sa daumaka na vale ko ya, laiva koto kina na nomudou veivakacegui; ia, kevaka e sega ni veiganiti, me suka tale vei kemudou na nomudou veivakacegui. 14Ia, o koya e sega ni vakacegui kemudou se rogoci kemudou, dou lako tani e na vale se koro ko ya, ka kuretaka laivi na kuvu ni qele e kabita mai na yavamudou. 15Au sa kaya vakaidina vei kemudou, e na ca vakalailai na vanua ko Sotoma kei Komora e na siga ni lewa, e na ca vakalevu na koro ko ya. 16“Raica, au sa talai kemudou yani me vaka na sipi e na kedra maliwa na wolifa; O koya gona mo dou vuku me vaka na gata ka yalovinaka me vaka na ruve. 17Ia, mo dou qarauni ira na tamata, ni ra na soli kemudou yani ki na mataveilewai, ka ra na vakanakuitataki kemudou e na nodra veivalenilotu. 18Ko ni na kau ki matadra na kovana kei na tui e na vukuqu, me dua na ka ni vakadinadina vei ira, kei ira tale ga na veimatanitu. 19Ni ra sa soli kemudou yani, dou kakua ni lomaleqataka se dou na vosa vaka e vei, se cava mo dou kaya; ni na soli vei kemudou na tiki ni gauna ko ya na ka mo dou kaya. 20Dou na sega ni vosa ko i kemudou, ia e na vosa ga na Yalo ni Tamamudou e na lomamudou. 21“E na dui solia yani na tuakana se tacina me mate, ka na solia yani na luvena ko tamana, era na vorati ira na nodra i tubutubu na gone, ka vakamatei ira; 22era na cati kemudou na tamata kece ga e na vuku ni yacaqu. Ia, ko koya ga e na vosota tiko me yacova na kena i otioti e na vakabulai. 23Ni ra sa vakacacani kemudou e na koro oqo, dro ki na dua tale; ni'u sa kaya vakaidina vei kemudou, ni dou sa sega mada ni vakaotia na veikoro e Isireli; e sa na yaco mai na Luve ni Tamata. 24“E sega ni levu cake e dua na tisaipeli mai vua na nona i vakavuvuli, se na tamata dauveiqaravi, mai vua na nona turaga. 25Sa rauti koya na tisaipeli me yaco me vakataki koya na nona i vakavuvuli, kei na dauveiqaravi me vakataki koya na nona turaga. Kevaka era sa vakatokai koya na i taukei ni vale me ko Pielisepupi, sa na qai wacava na nodra vakatokai ira vaka kina na nona lewe ni vale? 26“O koya gona, dou kakua ni rerevaki ira, ni sega na ka e tabonaki me na sega ni vakaraitaki, se vunitaki me na sega ni kilai. 27Na ka au tukuna vei kemudou e na buto, dou vosataka e na rarama, kei na ka dou rogoca ni vakasolokakanataki e daligamudou, dou kacivaka e na dela ni vale. 28Mo dou kakua tale ga ni rerevaki ira era rawa ni vakamatea na yago, ka ra sega ni rawata me vakamatea na yalo; dou rerevaki koya ga e rawa ni vakarusa ruarua na yalo kei na yago mai eli. 29E sega li ni volitaki e rua na siparo e na dua na sede? Ia, e na sega ga ni lutu ki na qele e dua vei rau me sega ni kila na Tamamudou. 30Ia, ko i kemudou, e wiliki yadua sara ga na drau ni ulumudou. 31O koya gona mo dou kakua ni rere; ni dou sa talei cake sara mai vei ira na siparo e vuqa. 32“O koya gona, o koya ga e tusanaki au e matadra na tamata, au na tusanaki koya tale ga e na mata i Tamaqu mai lomalagi; 33ia, o koya e cakitaki au e matadra na tamata, au na cakitaki koya tale ga e na mata i Tamaqu mai lomalagi. 34“Dou kakua ni nanuma ni'u sa lako mai me'u kauta mai na veisaututaki ki vuravura; e sega ni'u lako mai me'u kauta mai na veisaututaki, na i seleiwau ga. 35Ni'u sa lako mai me'u veiseitaki rau na veitamani tagane, kei na veitinani yalewa, kei na veivugoni yalewa tale ga; 36ka ra na nona meca na tamata ko ira ga na nona lewe ni vale. 37“O koya e lomani tamana se tinana vakalevu cake mai vei au sa tawa yaga vei au, kei koya e lomani luvena-tagane se luvena-yalewa vakalevu cake mai vei au sa tawa yaga vei au; 38kei koya e sega ni colata na nona kauveilatai ka muri au sa tawa yaga vei au. 39O koya sa maroroya na nona bula e na vakayalia, ia, o koya sa vakayalia na nona bula e na vukuqu e na maroroya. 40“O koya e vakacegui kemudou sa vakacegui au, kei koya sa vakacegui au sa vakacegui koya sa talai au mai. 41O koya sa vakaceguya e dua na parofita e baleta ni sa parofita, e na taura ko koya na i sau ni parofita, kei koya sa vakaceguya e dua na tamata dodonu e baleta ni sa tamata dodonu e na taura ko koya na i sau ni tamata dodonu. 42Ko koya ga e na solia vua e dua vei ira na lalai oqo e dua wale ga na bilo wai liliwa e baleta ni sa tisaipeli, au sa kaya vakaidina vei kemudou, e na sega sara ni yali vua na kena i sau.”

will be added

X\