MACIU 1

1Na i vola ni kawa i Jisu Karisito, na luve i Tevita, na luve i Eparaama. 2E tama i Aisake ko Eparaama, ka tama i Jekope ko Aisake, ka tama i Juta kei iratou na tuakana kei iratou na tacina ko Jekope, 3e tama i Veresi kei Sera ko Juta, ka tinadrau ko Tema, ka tama i Eseroma ko Veresi, ka tama i Erami ko Eseroma, 4ka tama i Amenatave ko Erami, ka tama i Nasoni ko Amenatave, ka tama i Salimoni ko Nasoni, 5ka tama i Poasa ko Salimoni, ka tinana ko Reapi, ka tama i Opeti ko Poasa, ka tinana ko Ruci, ka tama i Jese ko Opeti, 6ka tama i Tevita na tui ko Jese. E tama i Solomoni ko Tevita na tui, ka tinana na wati Uraia, 7ka tama i Riopoama ko Solomoni, ka tama i Apaijia ko Riopoama, ka tama i Asa ko Apaijia, 8ka tama i Josefata ko Asa, ka tama i Jorame ko Josefata, ka tama i Usaia ko Jorame, 9ka tama i Jocami ko Usaia, ka tama i Aasi ko Jocami, ka tama i Esekaia ko Aasi, 10ka tama i Manasa ko Esekaia, ka tama i Emoni ko Manasa, ka tama i Josaia ko Emoni, 11ka tama i Jekonaia kei iratou na tuakana kei iratou na tacina ko Josaia, donuya na gauna ni nodra kau yani ki Papiloni. 12Ia ni ra sa kau ki Papiloni e a qai sucu ko Salacieli na luve i Jekonaia, ka tama i Serupepeli ko Salacieli, 13ka tami i Apiuta ko Serupepeli, ka tama i Elaiakimi ko Apiuta, ka tama i Asori ko Elaiakimi, 14ka tama i Setoki ko Asori, ka tama i Akeimi ko Setoki, ka tama i Iliuta ko Akeimi, 15ka tama i Iliasa ko Iliuta, ka tama i Matani ko Iliasa, ka tama i Jekope ko Matani, 16ka sa i Jekope na tama i Josefa na wati Meri, ka a sucu mai vua ko Jisu, ko koya ka vakatokai me Karisito. 17O koya goua sa mani tinikava taucoko kina na i tabatamata mai vei Eparaama ki vei Tevita, ka tinikava na i tabatamata mai vei Tevita ki na nodra kau ki Papiloni, ka tinikava na i tabatamata mai na nodra kau ki Papiloni, ki vei Karisito. 18E vaka oqo na sucu i Jisu Karisito. E a sa musuki tu ko Meri na tinana vei Josefa, ia ni se bera ni rau la'ki tiko vata sa votu na nona bukete mai vua na Yalo Tabu. 19Ia ko Josefa, e na nona yalo dodonu, e sega ni vinakata me vakamaduataki Meri, sa mani lomana kina me sa sereki koya vakavuni ga. 20Ia ni sa vakananuma tiko ko koya na ka oqo, sa qai rairai vua e na tadra e dua na agilosi ni Turaga, ka kaya, “Josefa, na luve i Tevita, kakua ni rere ni kauti Meri na watimu, ni sa mai vua na Yalo Tabu na ka sa kunekunetaka; 21e na vakasucuma ko koya e dua na gonetagane, ka mo vakayacani koya me yacana ko Jisu, ni sa i koya e na vakabulai ira na nona tamata mai na nodra i valavala ca.” 22Sa yaco na ka kece ga oqo me vakayacori sara kina na vosa ni Turaga, ka a vosataka na parofita: 23“Raica, e na bukete e dua na goneyalewa ka na vakasucuma e dua na gonetagane, ka ra na vakayacana me ko Imanueli,” a kena i balebale, “na Kalou sa tiko vata kei keda.” 24Ni sa yadra mai na moce ko Josefa, sa vakayacora sara me vaka na ka sa vakarota vua na agilosi ni Turaga; ka sa kauti Meri na watina; 25ia, e a sega ni veiyacovi kaya mada, ka yacova ni sa vakasucuma oti ko Meri na luvena tagane; a sa vakayacana ko Josefa me ko Jisu.

will be added

X\