MARIKA 9

1Sa qai kaya tale ga vei ira ko koya, “Au sa kaya vakaidina vei kemuni, ni ra tu e ke eso era na sega ni tovolea mada na mate, era sa na raica na yaco mai ni matanitu ni Kalou e na kaukauwa.” 2Ni sa oti e ono na siga, sa qai kauti iratou ko Pita kei Jemesa kei Joni ko Jisu, ka kauti iratou vakatikitiki ki na dua na ulunivanua. Ia ni ratou sa rai tu ga sa matalia mai ka tavuki na kena i rairai. 3Sa lumilumisa ka sekavula sara mai na nona i sulu me vaka na se ni ua e na cakau; a sa sega ni dua na dausavasava e vuravura me vakavulavulataka rawa e dua na i sulu me vaka koya. 4E rau sa qai rairai vei iratou ko Ilaija kei Mosese, ka rau sa veivosaki tiko kei Jisu. 5Sa qai kaya vei Jisu ko Pita, “Vakavuvuli, sa vinaka dina na nodatou tiko e ke; me keitou sa tara mada e tolu na vakatunuloa, e dua me nomuni, ka dua me nei Mosese, ka dua me nei Ilaija” 6A sega ni kila na cava me kaya ko Pita, ni ratou sa rui rere vakalevu. 7Sa qai vakarurugi iratou e dua na o, ka sa rogo mai kina e dua na vosa, ka vaka, “Oqo na noqu Gone ni Toko; dou vakarorogo vua.” 8E ratou sa qai veiraiyaki vakasauri, ka ratou sa sega ni raica e dua tale me tiko vata kei iratou, ko Jisu duadua ga. 9Ia ni ratou sa siro sobu tiko mai na ulunivanua, sa qai vakaroti iratou ko Jisu, ka kaya, “Dou kakua ni tukuna vua e dua na veika dou sa raica, me yacova ni sa tu cake tale mai na mate na Luve ni Tamata” 10E ratou sa mani katona lo voli ga na nona vosa, ka veitarotarogitaka vakai iratou se cava na i balebale ni tu cake tale mai na mate. 11E ratou sa qai tarogi koya, ka kaya, “Na cava era kaya tiko kina na daunilawa ni dodonu me liu taumada mai ko Ilaija?” 12Sa qai kaya ko koya vei iratou, “Sa liu taumada dina mai ko Ilaija me vakavinakataka tale na veika kece ga; ia, e qai volai ga vaka cava e na vukuna na Luve ni Tamata, ni dodonu me sota kaya na veika rarawa e vuqa ka me na vakalialiai tale ga? 13Ia au sa tukuna vei kemudou, sa lako oti mai ko Ilaija, ka ra sa cakava vua na tamata na ka ga era vinakata, me vaka ga na ka sa volai tu e na vukuna.” 14Ia ni ratou sa yaco yani vei iratou na tisaipeli tale eso, e ratou sa qai raici ira na lewe vuqa ka ra tu wavoliti iratou, kei ira na daunilawa era veileti tiko kei iratou. 15Era a kurabui sara na lewe vuqa ni ra sa raici Jisu, ka cici yani vua ka veitavaki kaya. 16Sa qai tarogi ira ko koya, ka kaya, “A cava ko ni veiletitaka tiko kei iratou oqo?” 17Sa qai sauma mai vua e dua mai vei ira na lewe vuqa, ka kaya, “Na i Vakavuvuli, au a kauta mai na luvequ tagane vei kemuni ni curumi koya tiko e dua na yalo velavela, ka galu tu. 18E na gauna kece e curumi koya kina, e dau bitalaki koya ki ra; ka vuso na gusuna ka vakasequruquru bati, ka mai wadokau tu yani. Au sa kerei iratou oti na nomuni tisaipeli me ratou vakasava tani, ka ratou sega ni rawata” 19Sa qai vosa kina vei iratou ko koya, ka kaya, “A i tabatamata tawa vakabauta! Me vakacava soti na dede ni noqu tiko voli kei kemudou? Me cava soti na dede ni noqu vosoti kemudou tiko? Kauti koya mai vei au!” 20Era sa mani kauta mai na gonetagane ki vua. Ni sa raici Jisu na yalo, sa bitabitalaki koya sara na gonetagane, ka bale kina ki na qele, ka mai vakatoqiqi yani, ka sa tuburi vuso na gusuna. 21Sa qai tarogi tamana ko Jisu, ka kaya, “A cava na dede ni gauna sa yacovi koya tiko kina na ka oqo?” Sa qai kaya ko koya, “E tekivu sara ni a sa gone lailai. 22Sa dau biuti koya wasoma ki na buka, ki na wai tale ga, me vakamatei koya kina; ia kevaka ko ni rawata kina e dua na ka, mo ni lomani keirau ka vukei keirau.” 23Sa kaya vua ko Jisu, “Io, kevaka ko ni rawata. Ni sa rawa na ka kece ga vei koya sa vakabauta.” 24Sa qai tabalaka cake vakasauri na domona na tama ni gone, ka kaya, “Au sa vakabauta; ni vukei au mada e na lailai ni noqu vakabauta!” 25Ni sa raica ko Jisu ni ra sa tabili yani vua na lewe vuqa, sa qai vakarota na yalo velavela ka kaya vua, “O iko na yalo galu ka didivara, au sa vakaroti iko mo lako tani mai vua, ka kakua sara ni curumi koya tale!” 26Ia ni sa qoqolou ka bitabitalaki koya oti vakaca, sa qai biuti koya na yalo ka sa mai vaka koto yani na i rairai ni dua na tamata mate na gonetagane; ka ra kaya kina e lewe vuqa sara vei ira ni sa mate. 27Sa qai taura na ligana ko Jisu, ka tuberi koya cake, ka sa tu cake sara. 28Ia ni sa curu ki na vale ko Jisu, e ratou sa qai tarogi koya vuni ga na nona tisaipeli, ka kaya, “A cava keitou a sega ni vakasava tani rawa kina na yalo velavela?” 29Sa qai kaya vei iratou ko Jisu, “E sega ni dau vakasavi tani rawa e na dua tale na ka na kena mataqali koya, e na masu duadua ga.” 30E ratou sa qai biuta na vanua koya ka lakova na loma ni vanua ko Kalili. E vinakata ko Jisu me kakua ni dua e kila; 31ka ni a vakatavulici rratou fiko na nona tisaipeli, ka kaya, “E na soli yani na Luve ni Tamata ki na ligadra na tamata, ka ra na vakamatea; ia ni sa mate, e na qai tu cake tale ni sa oti e tolu na siga” 32Ia e ratou a sega ga ni kila na i balebale ni vosa koya, ka ratou rere ni tarogi koya kina. 33E ratou sa mani yaco sara ki Kapenaumi. Ia ni ratou sa curu ki vale sa qai tarogi rratou ko Jisu, ka kaya, “A cava dou a veivosakitaka trko mai gaunisala?” 34Ia e ratou a galu ga, ni ratou a veivosakitaka tiko mai gaunisala se ko cei e levu duadua vei Iratou. 35Sa qai dabe ko Jisu ka kacivi iratou na lewe tinikarua, ka kaya vei rratou, “Kevaka e dua e via liu, me kauti koya sobu sara ki ra, ka me nodra dauveiqaravi na tamata kece ga.” 36Sa qai kauta mai e dua na gone lailai, ka vakaturi koya e matadratou; ia ni sa keveta, sa qai kaya vei iratou, 37“O koya sa taleitaka e dua na gone lailai vakaoqo e na yacaqu sa taleitaki au, kei koya sa taleitaki au, sa sega ni taleitaki au ga, sa taleitaki koya tale ga sa talai au mai” 38Sa qai kaya vei Jisu ko Joni, “Na i Vakavuvuli, keitou a raica e dua na tamata ni vakasavi tevoro tiko e na yacamuni, ka keitou mani tarovi koya, ka ni sega ni dua vei kedatou ko koya” 39Ia sa qai kaya ko Jisu, “Dou kakua ni tarovi koya; ni sega ni dua e cakava rawa e dua na cakacaka mana e na yacaqu me na qai vosacataki au tale. 40Ni sa noda i to ko koya e sega ni noda meca. 41Ni'u sa kaya vakaidina vei kemudou, o ira yadua e na solia vei kemudou e dua na bilo wai mo dou gunuva, ni dou sa i tokani i Karisito, e na sega ni yali vei ira na kedra i sau. 42“Na tamata yadua ga e vakavuna me cala e dua vei ira na lalai oqo ka ra sa vakabauti au, e na vinaka cake vua ke vakarubeci e domona e dua na vatu i qaqi levu, ka qai biu ki na loma ni wasaliwa. 43Kevaka e vakacalai iko tiko na ligamu, muduka laivi; e vinaka cake mo curu ki na bula ka liga dua ga, ka ca me tiko ruarua na ligamu ko qai lako ki eli, ki na buka e sega ni bokoci rawa, 44kei na vanua e sega ni mate kina na kedra ulo, ka sega ni bokoci kina na buka waqa.] 45Se kevaka e vakacalai iko tiko na yavamu, munduka laivi; e vinaka cake mo curu ki na bula ka yava dua ga, ka ca me tiko ruarua na yavamu ko qai biu ki eli, [ 46na vanua e sega ni mate kina na kedra ulo, ka sega ni bokoci kina na buka waqa.] 47Se kevaka e vakacalai iko tiko na matamu, vecuka tani; e vinaka cake mo curu mata dua ki na matanitu ni Kalou, ka ca me tiko ruarua na matamu ko qai biu ki eli, 48na vanua e na sega ni mate kina na kedra ulo, ka sega ni bokoci kina na buka waqa. 49“Ni na vakasavasavataki na tamata yadua e na buka waqa me vaka sa vakasavasavataki na i soro e na masima. 50“E ka vinaka na masima, ia ke sa seyavu na kena tuituina, dou na vakatuituinataka tale e na cava? Mo dou tuituina tiko ga, ka veiyaloni tiko vakai kemudou”

will be added

X\