MARIKA 8

1E na dua na gauna vakalailai ki muri era a soqoni vata tale e lewe vuqa na tamata, ia e a sega na ka me ra kania. Sa qai kacivi iratou na nona tisaipeli ko Jisu, ka kaya vei iratou, 2“Au sa lomani ira dina na tamata oqo, ni sa siga tolu mai oqo na neimami tiko vata, ka sa sega na ka me ra kania. 3Ia kevaka au vakasukai ira ki na nodra veivale ni ra viakana tu, era na la'ki rebo e gaunisala, ka ni so vei ira era lako sara mai vakayawa” 4Ia e ratou sa qai kaya vua na nona tisaipeli, “E na rawa li mai vei na kakana e na vanua lala oqo me rauti ira na tamata oqo?” 5Sa qai tarogi iratou ko koya, ka kaya, “E vica na i buli madrai e tiko vei kemudou?” E ratou qai kaya, “E vitu.” 6Sa qai vakaroti ira na lewe vuqa ko koya me ra dabe. Sa qai taura ko koya na i buli madrai e vitu, ka vakavinavinakataka vua na Kalou. Sa qai dovidovia ka solia vei iratou na nona tisaipeli me ratou veivotayaka vei ira na tamata; e ratou sa qai kitaka vakakina. 7E a tiko tale ga vei iratou e vica na ika lalai. Sa qai vakavinavinakataka ko Jisu ka tukuna vei iratou me ratou veivotayaka tale ga. 8Era sa kana, ka mamau; ka ra tomika na i vovo ni ka sa dovi, ka sa sinai kina e vitu na sova. 9E rauta ni va na udolu na kedra lelevu taucoko. 10Sa qai vakasukai ira ko Jisu; ka vodo sara ki waqa kei iratou na nona tisaipeli, ka lako ki na yasayasa vaka-Talimanuca. 11Era a lako mai e so na Farisi ka vakatekivu me veileti kaya, ka vinakata me cakava ko koya e dua na i vakatakilakila mai lomalagi, me ra vakatovolei koya kina. 12E a vutugu vakalevu ko koya e na vu ni yalona, ka kaya, “Na cava e vakasaqara kina na i tabatamata oqo e dua ua i vakatakilakila? Au sa kaya vakaidina vei kemudou, e na sega ni soli e dua na i vakatakilakila ki na i tabatamata oqo.” 13Sa qai biuti ira, ka vodo ki waqa, ka lako yani ki tai kadua. 14Ia e ratou a guilecava na tisaipeli me ratou kauta tiko e so tale na madrai; e dua wale ga na i buli e tiko vei iratou e waqa. 15Sa qai vakadreti iratou ko Jisu, ka kaya, “Raica, dou qarauni kemudou mai na nodrai vakatubu na Farisi, kei na i vakatubu i Eroti.” 16E ratou sa qai veivosakitaka vakai iratou, ka kaya, “Oqo e baleta ni sega vei kedatou na madrai” 17Ni sa kila ko Jisu na ka e ratou veivosakitaka tiko sa qai kaya vei iratou, “A cava dou veivosakitaka tiko kina ni sega vei kemudou na madrai? Dou sa sega tiko ga oqo ni raica rawa se kila? E se tasogo ga na lomamudou? 18Sa tu na matamudou, dou sega tiko ga ni raica? Sa tu na daligamudou, dou sega tiko ga ni rogoca? Dou sa sega tale ni nanuma rawa, 19ni'u a dovidovia na i buli madrai e lima vei ira na lewe lima na udolu? E vica na sova dou a vakasinaita e na i dovidovi ni madrai?” E ratou sa qai kaya vua, “E tinikarua .” 20“Ni a vitu na i buli vei ira na le va na udolu, e a vica na sova dou a vakasinaita e na i dovidovi ni madrai?” E ratou sa qai kaya vua, “E vitu.” 21Sa qai kaya vei iratou ko koya, “Dou sa sega tiko ga ni kila rawa?” 22E ratou sa qai yaco ki Peciseita; ka ra sa kauta vei Jisu e so na tamata e dua na tamata mataboko, ka ra kerei koya me tara. 23A sa taura na liga ni tamata mataboko ko Jisu, ka tuberi koya tani ki na i bili ni koro, ka kasivita na matana ruarua ka tabaka e na ligana. Sa qai tarogi koya, ka kaya, “O sa bau raica e dua na ka, se sega?” 24Sa qai tacake ka kaya, “Au sa raici ira na tamata, ia era vaka na veivunikau era sa lako voli.” 25Sa qai tara tale na matana ko Jisu. A sa rai matua ko koya, ka sa vinaka sara mai na matana, ka sa raica vakavinaka na ka kece ga. 26Sa qai vakatalai koya ko Jisu ki na nona vale ka kaya, “Kakua ni lako tale ki na koro .” 27E ratou sa qai cavutu ko Jisu kei iratou na nona tisaipeli ka lako ki na veikoro mai Sisaria-Filipai. Ia ni ratou sa lako tiko e gaunisala sa qai tarogi iratou na nona tisaipeli, ka kaya, “A cava era kaya na tamata se ko cei ko i au?” 28E ratou sa qai kaya vua, “E so era kaya ni ko Joni na Dauveipapitaisotaki; ka so tale era kaya, ko Ilaija; ka so tale, e dua vei ira na parofita” 29Sa qai tarogi iratou, ka kaya, “Ia ko cei ga dou kaya ko i kemudou ni ko i au?” Sa qai sauma vua ko Pita, “Ko i kemuni na Karisito.” 30Sa qai vakaroti iratou matua me ratou kakua ni tukuni koya vua e dua. 31Sa qai vakatekivu me vakatavulici iratou na nona tisaipeli ko Jisu, ni sa kena dodonu ga me sota kaya na Luve ni Tamata na ka rarawa e vuqa, ka me ra cati koya na qase kei ira na bete levu kei ira na daunilawa, ka na vakamatei, ka na qai tu cake tale ni sa oti e tolu na siga. 32E a tukuna vakamatata sara na ka oqo ko koya, ia e a qai kauti koya vakatikitiki ko Pita, ka tekivu me vunauca. 33Ia e a qai vuki ko Jisu ka vakaraici iratou na nona tisaipeli ka vunauci Pita, ka kaya, “Lako tani ki dakuqu, Setani! Ni sa vakatamata ga na nomu vakasama, ka sega ni vakalou.” 34Sa qai kacivi ira vata na lewe vuqa kei iratou na nona tisaipeli ko Jisu, ka kaya vei ira, “Kevaka e dua sa via muri au, me kakua ni muria na lomana, ia me colata ga na nona kauveilatai ka muri au. 35Ni ko koya yadua e via maroroya na nona bula e na vakayalia, ia ko koya yadua e vakayalia na nona bula e vukuqu kei na vuku ni tukutuku vinaka e na maroroya. 36A cava na kena yaga vua na tamata, me rawati vuravura taucoko, ka vakayalia wale kina na yalona? 37Se cava li e na solia na tamata me i sau ni yalona? 38Ni ko koya yadua e na madualaki au kei na noqu vosa e na i tabatamata dauveibutakoci ka i valavala ca oqo, e na madualaki koya tale ga na Luve ni Tamata ni sa lako mai e na i serau nei Tamana kei ira na agilosi yalosavasava.”

will be added

X\