MARIKA 6

1Sa qai biuta na vanua koya ko Jisu ka lako ki na nona koro, ka ratou sa muri koya na nona tisaipeli. 2Ia e na Siga ni Vakacecegu, sa qai tekivu veivakatavulici e na valenilotu ko koya, ka ra sa kurabui kina na lewe vuqa era rogoci koya, ka kaya, “E kauta mai vei ko koya na ka kece oqo? Na mataqali vuku vakacava mada sa soli oqo vua, me cakava rawa kina e ligana na veicakacaka mana vakaoqo? 3E sega li ni ko koya oqo na matai, na luve i Meri, ka tuakadratou ko Jemesa kei Josese, kei Juta, kei Saimoni; ka sega li ni ratou ganena na goneyalewa ka ratou tiko vata oqo kei keda?” A ra sa levaci koya vakalevu ka sega ni via vakabauti koya. 4Sa qai kaya vei ira ko Jisu, “Sa dokai na parofita e na veivanua kece ga vakavo ga e na nona vanua, se vei ira na nona lewe ni mataqali, se e na nona vale.” 5Sa mani sega ni cakava rawa kina e dua na cakacaka mana e kea ko koya; e a tarai ira ga e lewe vica na tamata tauvimate, ka vakabulai ira. 6Sa kurabui sara ko koya e na nodra sega ni vakabauta. A sa veilakoyaki voli e na veikoro e kea ko Jisu ka veivakatavulici tiko. 7Sa qai kacivi iratou vata na lewe tinikarua ki vua, ka tekivu talai iratou yayarua yani, ka solia vei iratou na kaukauwa me ratou vakasavi ira kina na yalovelavela. 8E a vakaroti iratou me ratou kakua ni kauta e dua na ka me baleta na nodratou i lakolako, na nodratou i titoko ga; me kakua na kakana, kakua na taga ni vaqa, kakua na i lavo e na nodratou beleti; 9ia, me ratou vakaivava ga, ka kakua ni tokara e rua na sote. 10Sa qai kaya tale vei iratou ko koya, “E na vanua dou sa vakacurumi kina ki na dua na vale, dou tiko ga e na vale koya me yacova ni dou sa biuta na vanua koya. 11Ia kevaka e dua na vanua era sega ni vakacegui kemudou, ka ra bese ni rogoci kemudou, ni dou sa lako tani mai kina, dou taviraka laivi na kuvu ni qele mai na yavamudou me na i vakadinadina baleti ira.” 12E ratou sa mani lako ka vunautaka me ra veivutuni na tamata. 13E ratou a vakasava tale ga e vuqa na tevoro, ka ratou wali ira e na waiwai e lewe vuqa na tauvimate ka vakabulai ira. 14A sa la'ki rogoca na veika oqo ko Eroti na tui, ni sa tete vakalevu sara na i rogorogo kei Jisu. Era sa kaya e so, “Sa vakaturi cake tale mai na mate ko Joni na Dauveipapitaisotaki; sa i koya ga ka sa cakava kina na veika mana oqo ko koya” 15Ia, era kaya e so, “Oqo ko Ilaija” Era sa qai kaya e so tale, “O koya e dua na parofita, me vakataki ira na parofita e liu .” 16Ia ni sa rogoca ko Eroti sa qai kaya, “Oqo ga ko Joni, o koya au a tamusuka na uluna, ka sa vakaturi cake tale.” 17Sa i Eroti ga oqo ka talatala yani me vesu ko Joni, ka biu ki na valeniveivesu e na vuku i Erotiasa, na wati i Filipi na tacina; ni sa tauri koya tiko me watina. 18E a kaya ko Joni vei Eroti, “Sa sega sara ni dodonu vei iko mo taura na wati tacimu me watimu” 19Ia sa cati Joni sara kina ko Erotiasa ka vinakata me vakamatei koya. Ia e a sega ga ni rawata, 20e na vuku i Eroti. E a rerevaki Joni ko Eroti ni kila tiko ni tamata dodonu ka yalosavasava ko koya, ka sa mani taqomaki koya voli ga kina. Sa dau taleitaka na vakarorogo vei Joni ko Eroti, e dina ga ni sa dau vakaleqai sara vakalevu na lomana e na gauna e dau rogoci koya kina. 21Ia, e a yaco mai e dua na siga me vakayacora rawa kina ko Erotiasa na nona i naki. E a vakarautaka ko Eroti e dua na magiti e na nona siga ni sucu, ka mani sureti ira kina na nona turaga veiliutaki, kei ira na turaganivalu, kei ira na turaga dokai mai Kalili. 22Sa qai curu mai na luve i Erotiasa yalewa ka meke, ka vakamarautaki Eroti vakalevu kei ira na nona vulagi. Sa qai kaya sara na tui vua na goneyalewa, “Kerea vei au na ka ga ko gadreva, au na solia vei iko” 23A bubului kina vua ko koya, ka kaya, “Na ka ga ko kerea vei au, au na solia vei iko, ke mani veimama sara mada ga ni noqu matanitu” 24A curu sara ki tautuba ka koya vei tinana, “Na cava beka me'u na kerea?” Sa qai kaya ko koya, “Na ulu i Joni na Dauniveipapitaisotaki” 25Sa qai lako sara vakatotolo ki vua na tui me kerekere, ka kaya, “Au vinakata mo ni solia sara ga mai vei au oqo na ulu i Joni na Dauveipapitaisotaki e na dua na dari.” 26A sa rarawa dina sara na tui; ia, e na vuku ga ni nona bubului kei na vukudra na nona vulagi, e a sega kina ni qai via bureitaka vua. 27Sa mani tala sara ko koya e dua na nona sotia yadra ka vakarota me kauta mai na ulu i Joni. A sa lako na yadra ki na valeniveivesu ka tamusuka na ulu i Joni, 28ka kauta e na dua na dari, ka solia vua na goneyalewa, ka sa lako na goneyalewa ka solia vei tinana. 29Ia ni ratou sa rogoca na tisaipeli i Joni na ka oqo e ratou sa qai lako ka kauta na yagona ka la'ki vakotora e na dua na i bulubulu. 30E ratou sa qai lesu tale vei Jisu na i apositolo, ka tukuna vua na veika e ratou a cakava ka vakatavuvulitaka. 31Ia ni ra sa rui lewe levu era lako tiko mai ka lako tani tale, ka sa sega na gauna e galala rawa me ratou bau kana kina, sa qai kaya vei iratou ko koya, “Dou lako mai vakatikitiki ki na dua na vanua lala, ka vakacegu mada vakalailai” 32E ratou sa mani vodo ki waqa ka lako vakatikitiki tani ki na dua na vanua lala. 33Ia era lewe vuqa era a raici iratou ni ratou sa lako tiko, ka ra kilai iratou sara; era sa qai lako mai na veikoro kece ga ka ra cici e vanua ka yaco sara ki na vanua koya ni ratou sa bera yani. 34Ia ni sa sobu yani ko Jisu sa raica e dua na i lala levu, ka sa tubu na nona lomani ira, ni ra sa vaka na sipi ka sega tu na kedra i vakatawa; ka sa vakatekivu me vakatavulici ira e na vuqa na ka. 35Ia ni sa kala na siga, e ratou sa qai lako yani vua na nona tisaipeli, ka kaya, “Oqo na vanua lala, ka sa kala na siga; 36mo ni sa vakatalai ira mada me ra lako ki na veitikotiko kei na veikoro voleka ka volia kina e so na ka me ra kania.” 37Ia e qai sauma vei iratou, ka kaya, “Dou solia ko i kemudou e so na ka me ra kania.” E ratou a qai kaya vua, “Me keitou sa laki voli madrai beka e na rua na drau na tiki ni siliva, ka mai vakani ira kina?” 38Sa qai kaya vei iratou ko koya, “E vica na i buli madrai e tiko vei kemudou? Dou la'ki raica mada” Ia ni ratou sa kila, e ratou sa qai kaya, “E lima na i buli madrai, ka rua na ika” 39Sa qai vakaroti ira kece ko koya me ra dabe vakaiwasewase e na veico drokadroka. 40Era sa mani tiko sobu vakai yatu, me yayadrau ka yayalimasagavulu. 41Sa qai taura ko koya na i buli madrai e lima kei na ika e rua, ka tacake ki lomalagi, ka vakavinavinakataka, ka dovia na madrai, ka solia vei iratou na tisaipeli me ratou tauca e matadra na tamata; a sa vota tale ga na ika e rua vei ira kece ga. 42Era sa kana kece sara ka mamau. 43E ratou sa qai vakatomika na i vovo ni madrai kei na ika ka sa sinai kina e tinikarua na sova. 44Era a lewe lima taucoko na udolu na tagane era kana kina. 45Sa qai vakaroti iratou sara na nona tisaipeli ko Jisu me ratou vodo ki waqa, ka liu ki tai kadua, ki Peciseita, ka me sa tei vakasukai ira mada na lewe vuqa ko koya. 46Ia ni ra sa veitalatala oti, sa qai lako cake ki na dua na delana me la'ki masu. 47Ia ni sa yakavi mai na vanua, sa tiko na waqa e na loma donu ni drano, ka tiko duadua ga ko koya e vanua. 48Ni rauta na maliwa ni tolu kei na ono e na mataka lailai, ni sa raica ko Jisu ni ratou sa mate e na voce na nona tisaipeli, me vaka ni saqati iratou tiko na cagi, sa qai lako vei iratou. A lako e na dela ni wai, ka lako sara me vaka e via lako siviti iratou. 49Ia ni ratou sa raici koya ni lako tiko e dela ni wai, e ratou nanuma ga ni sa dua na yalo ko koya, ka ratou sa qoqolou. 50E ratou a kidroa vakalevu ka ni ratou a raici koya kece. Ia e a qai vosa sara vei iratou ko Jisu, ka kaya, “Dou vakacegu! O i au ga oqo, dou dakua ni rere!” 51Ia ni sa vodo vei iratou ki waqa ko koya sa ruru sara na cagi. E ratou kurabui vakalevu sara, 52a vuna ni ratou a sega ni se vakasamataka rawa na i balebale dina ni nodra vakani na lewe lima na udolu ka ni sa rui kaukauwa na lomadratou. 53Ia ni ratou sa yaco ki tai kadua, e ratou sa lako sara ki na vanua ko Kenisereti, ka kele kina. 54Ni ratou sa sobu yani ki vanua, era sa kilai koya sara na tamata. 55Era sa veiciciyaki sara ki na nodra veitikotiko, ka kauti ira mai na tauvimate e na nodra i davodavo ki na vanua cava ga era rogoca ni sa tiko kina ko koya. 56E na veivanua kece ga e lako kina ko koya, na veikoro lalai, na veikoro lelevu, se na veivanua ni teitei, era vakotori ira kina na tauvimate e na kedra veivanua ni veivoli ko ira na tamata, ka ra kerei koya me ra bau tara mada ga na tutu ni nona i sulu ko ira na tauvimate; ia ko ira kece ga era tara, era sa vakabulai.

will be added

X\