MARIKA 5

1Era sa mani yaco yani ki na tai ni drano kadua, ki na nodra vanua na kai Katara. 2Ia ni sa sobu yani ki vanua ko Jisu, e a sota kaya sara e dua na tamata ka curumi koya tiko e dua na yalo velavela, e a lako mai na i bulubulu, 3na vanua e dau tiko voli kina. E sega ni dua na tamata e vesuki koya rawa; na sinucodo mada ga qai sega ni yaga. 4Sa dau vesu wasoma ko koya e na i vesu ni yava kei na sinucodo, ia e qai dau gutugutulaka na sinucodo ka drutidrutilaka na i vesu ni yava, ka sega ni bau dua e tarovi koya rawa. 5Sa dau qoqolou voli e na bogi kei na siga e na veiulunivanua kei na i bulubulu, ka sa tavatavalaki na yagona e na vatu. 6Ia ni sa tu mai vakayawa sa raici Jisu; sa qai cici yani ka cuva vua. 7Sa kaci e na domo levu, ka kaya, “A cava ko ni via cakava vei au, I Jisu na Luve ni Kalou Cecere sara? Au sa kerei kemuni e na yaca ni Kalou, ni kakua ni vakararawataki au!” 8E kaya oqo ko koya ni a sa kaya oti vua ko Jisu, “Yalo velavela, lako tani mai vua!” 9Sa qai tarogi koya ko Jisu, “O cei na yacamu?” E a sauma ko koya ka kaya, “Na yacaqu ko Vavakoso ni keimami sa lewe vuqa sara.” 10Sa qai vakamasuti Jisu vagumatua ko koya me kakua ni vakatalai ira tani mai na vanua koya. 11Era a kakana voli e na yasa ni delana e kea e dua na qele ni vuaka levu; 12ka ra a qai kerei koya na yalo velavela, ka kaya, “Ni vakatalai keimami vei ira na vuaka, me keimami curumi ira” 13Sa mani laivi ira ko Jisu me ra lako. Era sa qai lako na yalo velavela ka curumi ira na vuaka. Era sa qai cici sobu ki wai na vuaka, ka ra sa mani la'ki luvu kece sara. E rauta tiko ni rua na udolu na kedra levu. 14Era sa qai dro na kedra i vakatawa, ka la'ki tukuna na kena i tukutuku ki na koro, kei na veivanua era volekata. Era sa qai lako na tamata, me ra la'ki raica na ka e a yaco e kea. 15Era sa qai lako vei Jisu, ka raici koya ka a curuma tu e vuqa na yalo velavela ni sa dabe tiko e kea, sa vakaisulu tu, ka sa tu vinaka na nona vakasama; ka ra sa rere sara. 16Era sa qai tukuna vei ira na lako yani ko ira ka a raica na ka a yaco vua ka curumi tevoro kei na ka e baleti ira na vuaka. 17Era sa mani kerei Jisu me lako tani mai na nodra vanua. 18Ia e na gauna sa vodo kina ki waqa ko Jisu sa qai kerei koya na tamata ka a curumi yalo velavela, ka kaya, “Au kerea me'u sa lako vata yani kei kemuni.” 19Ia, e a sega ni vakadonuya ko Jisu, ka kaya vua, “Lako ki nomudou vei ira na wekamu, ka tukuna vei ira na levu ni ka sa cakava vei iko na Turaga, kei na levu ni nona loloma vei iko.” 20Sa mani mai lako na tamata koya ka tekivu vakatukuna e na Veikoro e Tini, na levu ni veika sa cakava vua ko Jisu, ka ra sa qoroqoro na tamata kece ga. 21Ni sa lesu tale ko Jisu e na waqa ki tai kadua, era sa baci soqo vata yani vua e lewe vuqa, ki na vanua sa tiko kina e matasawa. 22Sa qai lako yani vua ko Jairo e dua na vakailesilesi ni valenilotu; ia ni sa raici koya sa cuva sobu e yavana, 23ka vakamasuti koya vakabibi, ka kaya, “Na luvequ yalewa lailai sa voleka sara koto ga oqo ni mate. Ni lako mada mai ka tarai koya me sereki kina mai na kena mate, ka me bula.” 24E rau sa mani lako vata yani kei Jisu. A ra sa salavata kei Jisu e lewe vuqa sara na tamata, ka ra sa veidrigidrigi kaya. 25E tiko e na kedra maliwa e dua na yalewa e turidrabalavu ka sa yabaki tinikarua na kena dede. 26Sa lewe levu na vuniwai era qaravi koya ka sa vakayalia kina na veika kece e tu vua, ia e a sega ni vinaka cake na nona bula, sa toro sobu tiko ga. 27E a sa rogoca ko koya na i rogorogo kei Jisu, ka sa qai lako mai vei ira na lewe vuqa, e dakuna ka tara na nona i sulu, 28ni sa kaya e lomana ko koya, “Kevaka wale ga au tara na nona i sulu; au sa na bula” 29Sa mai mudu sara yani vakasauri na kena lako tiko na dra, ka sa kila e na yagona ni sa bula mai na mate ca koya. 30A vakila sara e lomana ko Jisu ni sa lako tani mai vua na kaukauwa, sa qai vuki sara vei ira na lewe vuqa, ka kaya, “O cei e tara na noqu i sulu?” 31E ratou sa qai kaya vua na nona tisaipeli, “Ko ni sa raica na nodra veidrigidrigi kei kemuni na tamata, a cava ko ni qai taroga tale kina se ko cei e tarai kemuni?” 32Sa qai veiraiyaki ko Jisu me kunei koya ka a cakava na ka koya. 33Ia na yalewa, ni sa kila na ka sa caka vua, sa qai lako mai e na rere kei na sautaninini ka cuva sobu e matana, ka tukuna kece vua na kena dina. 34Sa qai kaya vua ko Jisu, “Na luvequ, sa vakabulai iko na nomu vakabauta; mo lako e na vakacegu, ka bula mai na kemu mate.” 35Ia ni sa vosa tiko ga ko Jisu era sa lako mai e so mai na vale ni vakailesilesi ni valenilotu, ka kaya, “Sa mate na luvemu; kakua ni vakaoga tale na i Vakavuvuli” 36E a sega ni via kauwaitaka ko Jisu na ka era tukuna, ka sa qai kaya vua na vakailesilesi ni valenilotu, “Kakua ni yalolailai, vakabauta tiko ga” 37A sega ni vakatara e dua me muri koya, ko iratou ga ko Pita kei Jemesa kei Joni na taci Jemesa. 38Ni ratou sa yaco ki na vale ni vakailesilesi liu ni valenilotu, sa raica ko Jisu na nodra mamaue kei na veilecayaki ka rogoca na nodra osi kei na veitagicaki. 39Ia ni sa curu yani ko koya, sa kaya sara vei ira, “Na cava ko ni mamaue ka tagi tiko kina? E sega ni mate na gone, e moce ga.” 40Ia era sa qai dredrevaki koya. Sa qai vakatalai ira kece ki tautuba, ka kauti rau na tama kei na tina ni gone kei iratou na nona i lala, ka ratou curu ki na tikina e koto kina na gone. 41Sa qai taura na ligana, ka kaya vua, “Talica kumi!” A kena i balebale, “Goneyalewa lailai, au sa kaya vei iko, tucake mai!” 42Sa mai tucake sara yani na goneyalewa ka veilakoyaki, ka ratou sa kurabui vakalevu sara kina. Ia na goneyalewa sa yabaki tinikarua tiko e na gauna koya. 43Sa qai vakaroti iratou matua me kakua sara ni dua me kila na ka koya, ka kaya vei iratou me soli vua na goneyalewa e dua na ka me kania.

will be added

X\