MARIKA 4

1A sa tekivu me veivakatavulici ko Jisu e na baravi mai Kalili. Era lewe vuqa sara era soqoni vata yani vua ka sa la'ki vodoka kina ko koya e dua na waqa, ka la'ki dabe kina. Ia era a tu ga mai matasawa ko ira na lewe vuqa. 2Sa qai vakatavulici ira ko koya e na vuqa na ka e na vosa vakatautauvata; ia ni sa veivakatavulici tiko sa kaya vei ira ko koya, 3“Ni rogoca mada! E a la'ki kabukaburaki e dua na dauteitei. 4Ni sa kabukaburaki voli, e a qai lutu e so na sore ni kau e na tutu ni sala, ka ra lako mai na manumanu vuka ka kania. 5Era a lutu e so tale e na vanua veivatu, ka sega soti ni levu kina na qele, ka ra sa tubu cake sara vakatotolo, ni sega soti ni vavaku na kena qele. 6Ni sa cabe na siga era sa malai mai, ia ni sa sega na wakadra era sa raqosa sara. 7E a lutu e so tale e na maliwa ni veiwavakavotona, ka ra sa tubu cake na veiwavakavotona ka vakaruguti ira, ka ra mani sega kina ni vua. 8Ia a lutu e so tale e na qele vinaka, era a tubu cake me levu mai ka mani yaco me ra vua, ka sa vua i tolusagavulu e so, ka onosagavulu e so, ka mani drau sara e so.” 9Sa qai kaya tale ko Jisu, “O koya sa vakadaligana me rogoca, me rogoca sara.” 10Ia ni sa tiko taudua ga ko koya, era sa qai tarogi koya ko ira na tiko vata kaya kei iratou na lewe tinikarua me baleta na vosa vakatautauvata. 11Sa qai kaya ko koya vei ira, “Sa soli vei kemuni mo ni kila na ka vuni ni matanitu ni Kalou; ia, vei ira ga e taudaku, sa tukuni na ka kece ga e na vosa vakatautauvata, 12me, ʻRa raica tiko ka sega ni kunea, ra rogoca tiko ka lecava ga, de ra na saumaki mai ka na bokoci kina na nodra i valavala ca.ʼ” 13Sa qai kaya tale vei ira ko Jisu, “Ko ni sega ni kila na vosa vakatautauvata oqo? Ko ni na qai kila vakacava na vosa vakatautauvata tale e so? 14Sa kaburaka na vosa ni Kalou na dauteitei. 15E so na tamata era vaka na sore ni kau ka kaburaki e na tutu ni sala; ni ra sa rogoca oti, sa qai lako sara mai ko Setani ka kauta tani na vosa ka a kaburaki vei ira. 16E vaka kina na kena ka ra kaburaki e na vanua veivatu, ni ra sa rogoca na vosa era sa vakabauta sara e na reki; 17ia me vaka ni sega na wakadra e lomadra, era mani tu dei vakalailai ga. Ia, ni sa qai tubu na rarawa se na veivakacacani e na vuku ni vosa, era sa tarabe sara. 18E so tale ka kaburaki e na veiwavakavotona sa i ira ka ra rogoca na vosa, 19ia sa qai curu yani na lomaocaoca ni vuravura oqo, na domona na i yau, kei na veimataqali gagadre tale e vuqa, ka vakaruguta na vosa ka sega kina ni vua. 20Ia na kena ka ra kaburaki e na qele vinaka, sa i ira ka ra sa rogoca na vosa, ka vakabauta, ka ra la'ki vua sara; e tolusagavulu e so, ka onosagavulu e so, ka mani drau sara e so” 21Sa qai kaya tale vei ira ko Jisu, “E dau kau beka li na cina me la'ki cobori e na dua na dari, se e na ruku ni davodavo? E sega li ni dau la'ki biu ga ki na kena i tutu? 22Ni sega na ka e tabogo me na sega ni vakaraitaki mai, ka sega na ka vuni, me na sega ni vakavotui. 23Kevaka e dua sa vakadaligana me rogoca, me rogoca sara.” 24Sa qai kaya tale vei ira ko koya, “Ni qarauni kemuni e na ka ko ni rogoca; na i vakarau ga ko ni vakarautaka, e na vakarautaki tale vei kemuni, ka na vakaikuritaki tale ga. 25Ko koya sa tu vua na ka e na soli vakalevu tale vua, ia, ka koya e sega na ka e tu vua, e na kau tani mai vua na ka e sa bau toka vua.” 26Sa qai kaya tale ko Jisu, “Na matanitu ni Kalou sa vaka e dua na tamata e kaburaka na sore ni kau e na nona tiki ni qele. 27Sa la'ki moce e na bogi ka yadra ka veilakoyaki voli e na siga, ia e na gauna kece koya sa rovu ka tubu tiko ga kina na kau, ia na kena yaco tiko na ka oqo e sega ni kila ko koya. 28Ni sa vakavuna ga vakai koya na qele me tubu ka vua na kau: e na liu taumada na drauna, ka tarava na sena, qai muri na vuana. 29Ia ni sa matua mai na vuana, sa vakayagataka sara ko koya na kena i sele, ni sa gauna ni tatamusuki” 30Sa qai kaya tale ko Jisu, “Me da vakatautauvatataka mada kei na cava na matanitu ni Kalou, se na vosa vakatautauvata cava beka me vakamacalataki kina? 31Sa vaka e dua na sore ni musita, ni sa kaburaki e dela ni qele, sa ka lailai duadua vei ira na sore ni kau kece ga e vuravura; 32ia ni sa tubu cake ka yaco me ka levu duadua vei ira na kau lalai kece ga, a sa yaco me lelevu sara na tabana ka ra sa vakaitikotiko kina na manumanu vuka e na kena rurugu” 33Sa dau vosa vei ira ko koya e na vuqa na vosa vakatautauvata vaka oqo, me vaka na ka e rawa ni ra kila. 34Sa dau vosa ga vei ira ko koya e na vosa vakatautauvata, ia ni ratou sa tiko vakai iratou ga sa qai dau vakamacalataka vei iratou na nona tisaipeli na veika kece 35E na siga koya ni sa yakavi mai, sa qai kaya vei iratou na nona tisaipeli ko Jisu, “Tou lako mada ki tai kadua” 36E ratou sa qai laivi ira tu na lewe vuqa, ka ratou kauti koya sara e na waqa ga ka a tiko kina; a ra sa lako vata kei iratou e so tale na waqa. 37Sa qai tubu mai e dua na cagi ca levu sara ka sa seva na waqa na biau, ka sa tekivu kina me sinai mai na waqa e na wai. 38Ia e a tiko ko koya e na mua i muri, ka moce koto e na i lokoloko. E ratou sa qai vakayadrata ka kaya vua, “Na i Vakavuvuli, ko ni sega beka ni kauwaitaka ni datou sa voleka ni mate?” 39Sa qai tucake ko koya ka vunauca na cagi, ka kaya, “Ruru mai!” ka kaya ki na wasawasa, “Maravu mai!” A sa ruru sara na cagi, ka mai lutu yani e dua na maravu levu. 40Sa qai kaya vei iratou, “A cava dou sa rere kina? Sa sega na nomudou vakabauta?” 41Sa qai tuburi iratou e dua na rere levu, ka ratou sa veikayaka vakai iratou, “O cei beka na tamata oqo, ni sa bau talai rawarawa vua na cagi kei na wasawasa?”

will be added

X\