MARIKA 3

1E a qai curu tale ko Jisu ki na valenilotu ka tiko kina e dua na tamata e mate tu e dua na ligana. 2Era sa qai vakaraici koya matua toka e so ka ra tiko e kea se na vakabula na tamata koya e na Siga na Vakacecegu se sega, ka me ra na qai beitaki koya kina. 3Sa qai kaya vua na tamata ka sa mate tu na ligana, “Lako mai ki ke!” 4Sa qai vuki tale ko koya ka kaya vei ira na tamata, “E tara li me caka na ka vinaka e na Siga ni Vakacecegu, se me caka kina na ka ca; me caka kina na veivakabulai, se na veivakamatei?” Ia era a mani sega ni kaya e dua na ka. 5Sa qai vakawadravi ira kece e na cudru ko koya ka sa rarawataka na kaukauwa ni lomadra, a sa kaya vua na tamata koya, “Dodoka mai na ligamu!” Sa qai dodoka na ligana na tamata koya ka sa mani vakabulai sara. 6Era sa mani curu ki tautuba na Farisi ka la'ki bosea vata kei ira na i lawalawa i Eroti, se me ra na vakamatei koya vakacava. 7E ratou sa qai lako vakatikitiki vaka ki na bati ni drano ko Jisu kei rratou na nona tisaipeli, ka ra sa muri iratou e dua na i lala levu mai Kalili, kei Jutia tale ga, 8kei Jerusalemi, kei Itumia, kei na tai kadua ni Joritani, kei ira na lewe vuqa sara mai na veiyasana vaka-Taia kei Saitoni. Era sa lako vua ni ra sa rogoca na verka kece e a cakava. 9Era sa rui lewe levu sara na tamata, sa mani kaya kina ko Jisu vei rratou na nona tisaipeli me ratou vakarautaka toka e dua na waqa de ra qai drigilaki koya vakaca na tamata. 10E a sa vakabulai Ira oti e lewe vuqa ko koya, ka ra sa veidrigidrigi yani ki vua ko rra kece era tauvi mate tu me ra tarai koya. 11Ia ni ra sa raici koya tale ga na yalo velavela, era sa cuva e matana ka qoqolou ka kaya, “O i kemuni na Luve ni Kalou!” 12Sa qai vakaroti ira matua na yalo velavela ko koya me ra kakua sara ni vakatakilai koya. 13Sa qai cabe cake ki na dua na delana ko Jisu, ka kacivi ira yani vua e so sa vinakati ira ko koya; ka ra sa lako yani vua. 14Sa qai digitaka e lewe tinikarua me ratou dau tiko vata kaya, ka me na talai iratou me ratou vunau, 15ka me tu tale ga vei iratou na kaukauwa me ratou vakasavi ira kina na tevoro. 16Sa i iratou oqo na lewe tinikarua sa digitaka ko koya: ko Saimoni, o koya sa vakatoka me yacana ko Pita; 17ko Jemesa na luve i Sepeti, kei Joni na taci Jemesa, ka a vakayacani rau ko koya me Ponijese, a kena i balebale, ko i rau na luve ni kurukuru; 18ko Adriu, kei Filipi, kei Pacolomiu, kei Maciu kei Tomasi, kei Jemesa na luve i Alifio, kei Cateo, kei Saimoni, e dua vei ira na lewe ni soqosoqo na Gugumatua, 19kei Jutasa Isikarioti, o koya ka a bukiveretaki Jisu. 20Sa qai lako ko Jisu ki na dua na vale; ka ra sa baci soqoni vata tale yani na lewe vuqa, ka sa sega ni dua na gauna me ratou kana kina kei iratou na nona tisaipeli. 21Ia ni ratou sa rogoca na wekana, e ratou sa mani lako me ratou la'ki kauti koya, ni ra sa kaya tiko na tamata ni sa lialia. 22Era sa qai kaya na daunilawa ka ra lako sobu mai Jerusalemi, “Sa curumi koya tiko ko Pielisepupi, ka vakasavi ira na tevoro e na kaukauwa ni nodra turaga na tevoro” 23Sa qai kacivi ira vua ko koya, ka kaya vei ira e na vosa vakatautauvata, “E rawa vakaevei vei Setani me vakasavi Setani? 24Kevaka sa veisei vakai koya e dua na matanitu, e na sega ni tu dei rawa na matanitu koya. 25Kevaka sa veisei vakai koya e dua na vuvale, e na sega ni tu dei rawa na vuvale koya. 26Ia kevaka sa veivorati ka veisei vakai koya na matanitu i Setani, e na sega ni tu dei rawa, ia sa na bale ga. 27“E na sega ni rawa me curu ki na vale ni dua na qaqa a dua na tamata ka taura vakaukauwa na nona i yau, vakavo ga kevaka e vesuka mada e liu na qaqa koya; sa na qai rawa kina me taura vakaukauwa na veika sa tu e na nona vale. 28“Au sa kaya vakaidina vei kemudou, e na rawa me bokoci na nodra i valavala ca kece ga na luve ni tamata, kei na veika ca kece ga era vosavakacacataka kina na Kalou. 29Ia, ko koya ga e vosa vakacacataka na Yalo Tabu, e na sega ni bokoci na nona i valavala ca; sa tu ga vua na nona cala ka tawa mudu” 30Sa tukuna na ka oqo ko Jisu baleta ni ra sa kaya, “E tiko vua e dua na yalo velavela.” 31E ratou sa qai lako mai na tina i Jisu kei iratou na tacina, ka ratou mai tu e tautuba ka vakauta vua e dua na i tukutuku me lako yani vei iratou. 32Era a dabe wavoliti koya tiko na lewe vuqa, ka ra mani kaya vua, “E ratou tu e tautuba ka tinamu kei iratou na tacimu; e ratou sa mai vakasaqarai iko .” 33Sa qai sauma ko Jisu ka kaya, “O cei na tinaqu? Se o cei soti na taciqu?” 34Sa qai vakawadravi ira kece na dabe wavokiti koya tiko, ka kaya, “Sa i ira oqo na tinaqu kei na taciqu! 35O koya ga e cakava na loma ni Kalou, sa taciqu, ka ganequ, ka tinaqu .”

will be added

X\