MARIKA 2

1Ni sa oti e vica na siga sa qai lesu tale ki Kapenaumi ko Jisu ka sa rogovaki sara ni sa tiko e vale ko koya. 2Era a soqoni vata yani kina e lewe vuqa; ka sa sega ni dua na tiki ni vale e galala. A osodrigi tale ga vaka kina na mata ni katuba. Ia ni sa vunau tiko vei ira ko koya, 3era sa qai lako yani vua e so na tamata ka kauta tiko yani e dua na tauvi paralasi. E ratou a colati koya tiko yani e lewe va. 4Ia, ni ratou sa sega ni toro voleka rawa vua e na vukudra na lewe vuqa, e ratou sa qai cakava e dua na qara e na dela ni vale ka donui koya ka tukuca sobu kina na i davodavo sa koto kina na tamata tauvi paralasi. 5Ia ni sa raica na nodratou vakabauta ko Jisu, sa qai kaya vua na tauvi paralasi, “Na luvequ, sa bokoci na nomu i valavala ca” 6Ia, era a tiko kina e so na daunilawa, ka ra a vakaqaqa e lomadra, ka vaka, 7“E doudou rawa vakacava na tamata oqo me vosa vakaviavialevu kina e na mata ni Kalou? E sega tale ni dua e rawa ni bokoca na i valavala ca, na Kalou duadua ga!” 8E a kila rawa sara e yalona ko Jisu ni ra vaqaqa tiko vaka koya e lomadra, ka mani kaya sara vei ira, “A cava ko ni vaqaqa tiko kina na ka oqo e lomamuni? 9E vei e rawarawa cake, me kainaki vua na tauvi paralasi, ʻSa bokoci na nomu i valavala ca,ʼ se me kainaki, ʻTu cake, taura na nomu i davodavo ka lakoʼ? 10Ia me rawa ni ko ni kila ni sa tu vua na Luve ni Tamata na kaukauwa e vuravura me bokoca kina na i valavala ca” Sa qai kaya vua na tauvi paralasi, 11“Au sa kaya vei iko, tucake, taura na nomu i davodavo ka lako ki nomudou” 12Ia ni ra sa rai kece tiko ga sa tucake ko koya ka taura na nona i davodavo ka lako. Era sa kurabui kece ga ka vakalagilagia na Kalou, ka kaya, “Eda a sa sega mada ni bau raica e dua na ka vaka oqo e liu!” 13Sa qai lako tale ko Jisu ki matasawa; ka ra sa soqoni vata yani vua ko ira kece na lewe vuqa ka sa vakatavulici ira ko koya. 14Ia ni sa lako tiko sa raici Livai na luve i Alifio ni dabe tiko e na vale ni soli i vakacavacava. A sa kaya vua, “Muri au mai” Sa tucake ko Livai ka muri koya. 15Ni oti koya sa qai lako ko Jisu ka la'ki kana e na vale i Livai. Era a kana vata kei koya kei iratou na nona tisaipeli e lewe vuqa na daukumuni i vakacavacava kei ira na tamata i valavala ca; ni ra a muri koya voli yani e lewe vuqa. 16Ni ra sa raica na nodra daunilawa na Farisi ni kana vata tiko ko koya kei ira na tamata i valavala ca kei ira na daukumuni i vakacavacava, era sa qai kaya vei iratou na nona tisaipeli, “Na cava e kana vata tiko kina ko koya kei ira na daukumuna na i vakacavacava kei ira na tamata i valavala ca?” 17Ia ni sa rogoca ko Jisu sa qai kaya vei ira, “E sega ni yaga na vuniwai vei ira na bula vinaka, vei ira ga na tauvimate; au sega ni lako mai me'u kacivi ira na tamata dodonu, ko ira ga na i valavala ca” 18E na dua na gauna era a lolo tiko na tisaipeli i Joni kei ira na nodra na Farisi. Era a qai lako yani e so na tamata ka kaya vei Jisu, “Na cava era lolo ga kina na tisaipeli i Joni kei na nodra tisaipeli na Farisi, ka ra sega ni lolo na nomu tisaipeli?” 19Sa qai kaya vei ira ko koya, “E rawa li ni ra lolo na weka ni tagane vou ni sa tiko voli ga kei ira na tagane vou? Ni sa tiko vata voli ga kei ira ko koya na tagane vou era na sega ni rawa ni lolo. 20Ia e na yaco mai na gauna e na kau tani kina vei ira na tagane vou, era sa na qai lolo e na gauna koya. 21“E sega ni dua e dau cula vata na tiki ni sulu vou kei na i sulu madra; kevaka e cakava koya e na dresuka na i sulu madra na i botani vou, sa na qai kadresu vakalevu cake kina. 22E sega tale ga ni dua e dau vakatawana na waini vou ki na tavaya kuli ni manumanu makawa; kevaka e cakava koya, e na vakacabotetaka na tavaya na waini, ka rau sa na qai maumau wale ga kina na waini kei na tavaya; ia me vakatawani ga na waini vou ki na tavaya vou.” 23E na dua na Siga ni Vakacecegu e a lako kosova kina ko Jisu e so na loga ni sila. Ia ni sa lako tiko kei iratou na nona tisaipeli e ratou sa qai doloka e so na sola ni sila na nona tisaipeli. 24Era sa qai kaya vua na Farisi, “A cava e ratou cakava kina na nomu tisaipeli na ka e sega ni tara e na Siga ni Vakacecegu?” 25Sa qai kaya vei ira ko koya, “Ko ni a sa sega beka ni wilika na ka e a cakava ko Tevita kei ira na nona tamata e na gauna era a via kana kina, ka qai sega na ka me ra kania? 26E a curu ko koya ki na vale ni Kalou e na gauna e Bete Levu tiko kina ko Epaiaca, ka kania na madrai tabu, na ka e sega ni vakatarai vua e dua ka sega ni bete me kania, ka vakani ira tale ga kina na nona tamata.” 27Sa qai kaya vei ira ko koya, “E a caka na Siga ni Vakacecegu me baleta na tamata, ka sega ni caka na tamata me baleta na Siga ni Vakacecegu. 28ʻOya gona na vuna sa Turaga tale ga kina ni Siga ni Vakacecegu na Luve ni Tamata”

will be added

X\