MARIKA 16

1E na yakavi ni siga ka dua, ni sa oti na Siga ni Vakacecegu, e ratou sa qai voli waiwai vakaisaluwaki ko Meri na yalewa ni Makitala, kei Meri na tina i Jemesa, kei Salome, me ratou la'ki lumuta kina na yago i Jisu. 2Ia e na mataka lailai e na siga ka tarava, ni se qai cabe na siga, e ratou sa lako sara ki na i bulubulu. 3E ratou a veikayaka vakai iratou se ko cei mada e na vaqiqica tani na vatu mai na gusu ni bulubulu. 4Ia ni ratou qai rai yani, ki na i bulubulu e ratou sa raica sara ni sa qiqi tani tu na vatu. (Ia sa bau vatu levu dina sara ga na vatu koya.) 5Ni ratou sa curu yani ki na i bulubulu, e ratou sa raica sara e dua na cauravou ni dabe toka e yasa i matau, ka vakaisulu balavu vulavula; ka ratou sa kidroa vakalevu sara. 6A qai kaya ko koya vei iratou, “Dou kakua ni rere; ko dou sa mai vakasaqarai Jisu li na kai Nasareci, ko koya ka a lauvako e na kauveilatai? Sa sega e ke ko koya; sa tu cake tale; dou mai raica na vanua ka a vakotori kina! 7Ia dou lako ka tukuna vei iratou na nona tisaipeli, kei Pita tale ga, ni sa liu ko koya ki Kalili; dou na raici koya e kea, me vaka ga e sa tukuna tu vei kemudou.” 8E ratou sa qai curu ki tuba ka dro tani mai na i bulubulu ka ratou sa taqaya ka sautaninini. E ratou a sega ni kaya e dua na ka vua e dua na tamata e na levu ni nodratou rere. 9[Ni sa tu cake tale ko Jisu e na mataka caca e na i matai ni siga ni macawa, sa rairai taumada vei Meri na yalewa ni Makitala. Na yalewa koya e a vakasava tani mai vua ko Jisu e vitu na tevoro. 10Sa qai lako ko koya ka tukuna vei ira na i tokani i Jisu era a tagi ka vakaloloku tiko. 11Ia ni ra sa rogoca ni sa bula tale ko Jisu, ka ni a sa rairai oti vei Meri, era a sega ni vakadinata. 12Ia ni sa oti koya, sa qai rairai tale ko Jisu vei rau e lewe rua vei ira na nona i tokani e na nodrau i lakolako ki loma ni vanua, ka sa dua tani tale kina na kena i rairai. 13E rau sa qai lesu tale ka la'ki tukuna vei ira na kena vo; ia era a sega ga ni vakabauti rau. 14E muri, sa qai rairai vei iratou na lewe tinikadua ni ratou kana tiko; ka qai vosataki iratou e na nodratou tawa vakabauta kei na kaukauwa ni lomadratou, ni ratou a sega ni vakabauti ira ka sa raici koya oti ni sa tu cake tale. 15Sa qai kaya vei iratou, “Dou lako ki vuravura taucoko ka vunautaka na i Tukutuku Vinaka ki vei ira na tamata kece ga. 16O koya e vakabauta ka papitaisotaki e na vakabulai; ia ko koya e sega ni vakabauta, e na vakarusai. 17Ko ira na vakabauta, era na cakava na veicakacaka mana oqo; era na vakasava tani na tevoro e na yacaqu; era na vosataka na veivosa e so era a sega ni kila e liu; 18ia kevaka era taura na gata bati gaga, se gunuva e dua na wai gaga ka rawa kina na mate, e na sega ni vakacacani ira; era na tarai ira tale ga na tauvimate ka vakabulai ira.” 19Ia ni sa vosa oti vei iratou, na Turaga ko Jisu, sa qai kau cake ki lomalagi, ka la'ki tiko sobu e na liga i matau ni Kalou. 20E ratou sa qai lako na tisaipeli ka vunau e na veivanua kece ga, ka sa cakacaka vata tiko kei iratou na Turaga, ka vakadeitaka na nodratou vosa e na veicakacaka mana e vuqa.]

will be added

X\