MARIKA 15

1Ia ni sa kida na mataka era sa qai bose vata sara ko ira na matabete e cake, kei ira na qase kei ira na daunilawa kei ira kece na lewe ni Bose. Era sa qai vesuki Jisu e na sinucodo ka kauti koya tani mai kea ka soli koya vei Pailato. 2Sa qai tarogi koya ko Pailato, ka kaya, “O iko li na nodra tui na Jiu?” E a sauma vua ko koya, ka kaya, “Ko sa kaya vaka kina.” 3Era sa qai beitaki koya ko ira na matabete e cake e na vuqa sara na ka. 4Sa qai tarogi koya tale ko Pailato, ka kaya, “E sega beka na ka ko kaya rawa e na levu ni ka era sa beitaki iko tiko kina ko ira oqo?” 5Ia e a sega ga ni bau sauma ko Jisu; ka sa kurabui kina ko Pailato. 6Sa dau i vakarau ni Kovana me sereka e dua na kaivesu, na kena era kerea na lewe ui vanua, e na gauna ni soqo ni Vakananumi ni Lakosivia. 7E a tiko e na valeniveivesu e na gauna koya e dua na tamata ka yacana ko Parapa, kei ira tale ga e so na tamata i valavala kaukauwa era a laba vata kaya e na gauna ni vakacaca. 8Era sa qai lako cake na lewe vuqa ka vakatekivu cikevi Pailato me sereka vei ira e dua na kai vesu me vaka na kena i vakarau. 9A qai sauma vei ira ko koya, ka kaya, “Ko ni vinakata me'u sereka vei kemuni na nodra Tui na Jiu?” 10Sa kila vinaka sara tu ko Pailato ni ra a soli Jisu yani vua ko ira na matabete e cake e na nodra vuvutaki koya. 11Ia era a qai vakauqeti ira ga na lewe vuqa ko ira na matabete e cake me sereki Parapa ga vei ira ko koya ka kakua ko Jisu. 12Sa qai kaya tale ko Pailato vei ira, “Ia na cava ga me'u qai cakava vei koya ko ni sa vakatoka me nodra Tui na Jiu?” 13Era sa qai sauma e na qoqolou, ka kaya, “Vakota ki na kauveilatai!” 14Sa qai kaya tale ko Pailato vei ira, “E na vuku ni cava? Na ca cava e a cakava?” Era sa qai qoqolou vakalevu cake ga kina, ka kaya, “Vakota ki na kauveilatai!” 15Ia ni sa vinakata ga ko Pailato me vakayalovinakataki ira na lewe vuqa, sa mani sereki Parapa krna vei ira. Sa qai vakanakuitataki Jisu ka soli koya yani me vakoti ki na kauveilatai. 16Era sa qai kauti Jisu na sotia ki na loma ni bai ni kovana, ka ra sa soqoni vata kina na vo ni lewe ni mataivalu koya. 17Era sa qai vakasulumi koya e na i sulu roka lokaloka, na roka ni sulu vakatui, ka ra talia e dua na i sala wavakavotona ka ra vakatokara vua. 18E ra sa qai vakatekivu me ra kidavaki koya, ka kaya, “Me bula balavu na nodra Tui na Jiu!” 19Era sa qai warolaka na uluna e na dua na i kuita, ka ra vakasiviti koya, ka ra tekiduru ka cuva vua. 20Ni sa oti na nodra vakalialiai koya, era sa qai luvata laivi mai vua na i sulu lokaloka, ka vakadarama vua na nona i sulu dina. Era sa qai kauti koya me vakoti ki na kauveilatai. 21Ia ni ra sa lako tiko era sa sota sara kei na dua na tamata, a yacana ko Saimoni. E lako tiko mai loma ni vanua ko koya. E kai Kirini, ka tamadrau ko Alekisada kei Rufo. Era sa qai vakasaurarataki koya me colata na kauveilatai i Jisu. 22Era sa qai kauti Jisu sara ki na vanua e vakatokai ko Kolikoca (a kena i balebale na vanua ni qavokavoka). 23Era sa qai solia vua na waini ka veiwaki tu kei na mura, koya na drega ni kau ka dau vakamalumalumutaka na vutu ni yago, ia sa bese ni gunuva ko koya. 24Era sa qai vakoti koya na sotia ki na kauveilatai, ka ra vota na nona i sulu e na vakawirimadigi, me vakatau kina na tiki ni sulu e na dui nodra. 25Sa ciwa na kaloko e na mataka e na gauna era vakoti koya kina e na kauveilatai. 26A sa volai toka e cake na ka e beitaki kina, “Na Nodra Tui Na Jiu” . 27Era sa vakota vata kaya e rua na daubutako, e dua e na yasana i matau, ka dua e na i mawi; [ 28ka sa vakayacori kina na i Vola Tabu, ni sa kaya, “Sa okati vata ko koya kei ira na tamata cala.]” 29Era sa kuretaka na uludra e na nodra vakalialiai koya ko ira era veilakoyaki tiko e kea, ka kaya, “O iko! O iko ko a via vakarusa na Valenisoro ka tara tale e na tolu na siga, 30vakabulai iko mada, ka kevu sobu mai na kauveilatai!” 31Era vakalialiai koya vaka kina ko ira na matabete e cake kei ira na daunilawa, ka ra veikayaka vakai ira, “O koya e a dau vakabulai ira na tani, e sega mada ga ni vakabulai koya rawa! 32Me kevu sobu mada mai na kauveilatai na Karisito, na nodra Tui na Isireli, me keimami raica ka vakabauta rawa.” E rau a bau vosa vakacacataki koya tale ga ko i rau na rua e ratou lauvako vata e na kauveilatai. 33Ni sa sigalevu tutu sa qai butobuto na vanua taucoko me yacova na tolu na kaloko e na yakavi. 34E na tolu na kaloko e na yakavi, sa qai kaci ko Jisu e na domo levu, ka kaya, “Ilai, Ilai, lama sapakacani?” E kena i balebale, “Noqu Kalou, noqu Kalou, ko ni sa biuti au e na vuku ni cava?” 35Era a rogoca e so vei ira ka tu cake tu e kea, ka ra kaya kina, “Raica, sa kacivi Ilaija tiko ko koya.” 36Sa qai cici e dua ka tonisua e dua na vutovuto e na wai wiwi, ka vakacobara kina e dua na gasau, ka dulaka vua me gunuva, ka kaya, “Laiva mada me da raica se na sobu mai ko Ilaija me kauti koya mai ki ra se sega.” 37Sa qai kaci e na domo levu ko Jisu, mai cavuka sara yani na nona i cegu. 38A sa kasei rua na i lati ni Valenisoro, mai cake ka kauta ki ra. 39Ni sa raica na turaganivalu ka tu donui koya na i vakarau ni nona mate, sa kaya, “Sa Luve ni Kalou dina ga na tamata oqo!” 40Era a rai tale tu ga mai vakayawa e so na yalewa ka ratou tiko e na kedra maliwa ko Salome kei Meri na yalewa ni Makitala, kei Meri na tinadrau ko Jemesa lailai kei Josese. 41Ko iratou koya, e ratou e dau muri Jisu ka qaravi koya e na gauna e a sa tiko voli kina mai Kalili. Era a tiko tale ga e kea e lewe vuqa na yalewa era a lako vata mai kei Jisu ki Jerusalemi. 42A sa yakavi mai na vanua. Ia me vaka ni siga tiko ni vakavakarau na siga koya, oya na siga ni sa bera na Siga ni Vakacecegu; 43sa mani lako kina vakadoudou vei Pailato ko Josefa, na kai Arimacea, ka la'ki kerea na yago i Jisu. Ko Josefa oqo e lewe ni Bose Lawa, ka tamata dokai, ka dau namaka tale tiko ga na yaco mai ni matanitu ni Kalou. 44E a kidacala ko Pailato e na totolo ni mate i Jisu. Sa qai kaciva na turaganivalu ko koya, ka taroga vua se sa dede na nona mate se sega. 45Ia ni sa qai kila mai vua na turaganivalu ni sa mate dina sara ko Jisu, sa qai vakadonuya vei Josefa me kauta na yagona. 46E a sa volia oti tu ko Josefa e dua na i sole lineni. Sa qai la'ki kauta ki ra na yago i Jisu, ka solega e na i sulu lineni, ka la'ki vakotora e na dua na i bulubulu ka ta e na vatu. Sa qai vaqiqica kina e dua na vatu levu me sogota na gusu ni bulubulu. 47E rau a raica tu ko Meri na yalewa ni Makitala, kei Meri na tina i Josese, na vanua e vakatori kina na yago i Jisu.

will be added

X\