MARIKA 14

1Sa vo tiko e rua na siga me yaco na Soqo ni Vakananumi ni Lakosivia kei na Madrai Sega ni Vakaivakatubu. Era sa saga tiko ko ira na bete levu kei ira na daunilawa me ra vesuki Jisu lo, ka vakamatea. 2A ra sa kaya, “Me da kakua ni cakava e na gauna ni soqo, de qai yaco kina e dua na tiko yavavala” 3E a tiko ko Jisu mai Pecani e na vale nei Saimoni na vukavuka; ia e na gauna sa kana tiko kina, sa mani lako yani e dua na yalewa ka kauta voli yani e dua na tavaya waiwai boi vinaka, sau dredre ka caka mai na narita dina. Sa qai voroka ko koya na tavaya ka livia na waiwai ki na ulu i Jisu. 4Ia era sa qai veikayaka e na cudru e so vei ira ka tiko e kea, “Na cava e vakamaumautaki wale ga kina na waiwai oqo? 5E a rawa ni volitaki na waiwai oqo e na tolu na drau vakacaca na tiki ni siliva, ka qai soli na kena i lavo vei ira na dravudravua” A ra sa vosa kudrukudrutaka sara vakalevu na yalewa koya. 6Ia sa qai kaya ko Jisu, “Laivi koya ga, a cava dou sagai koya kina? Sa cakava vei au e dua na cakacaka vinaka ko koya. 7Era na tiko vata ga kei kemuni e na veigauna kece ko ira na dravudravua, ka rawa ni ko ni caka vinaka vei ira e na gauna ko ni vinakata kina; ia ko i au, au na sega ni tikotiko ga kei kemuni. 8Sa cakava ko koya na ka sa rawata: sa lumuta rawa oqo na yagoqu ka me qai bulu. 9Au sa kaya vakaidina vei kemudou, e na veivanua kece ga e na vunautaki kina na i tukutuku vinaka e na vuravura taucoko, e na tukuni kina na ka e a cakava na yalewa oqo, me kena i divi” 10Sa qai lako ko Jutasa Isikarioti, e dua vei iratou na lewe tinikarua, ki vei Ira na bete levu me la'ki bukiveretaki Jisu vei rra. 11Ia ni ra sa rogoca era sa marau, ka yalataka me ra soli i lavo vua. Sa qai vakasaqara sara ko koya e dua na gauna vinaka me vakatakilai Jisu kina vei ira na nona meca. 12E na i matai ni siga ni kana Madrai Sega ni Vakaivakatubu, na siga me ra vakamatea kina na lami ni kanavata ni Lakosivia, e ratou sa qai kaya vua na nona tisaipeli, “Evei na vanua ko ni vinakata me keitou la'ki vakarautaka kina na kemuni magiti ni Lakosivia?” 13Sa qai tala e lewe rua vei iratou na nona tisaipeli, ka kaya vei rau, “Drau lako ki na koro ka drau na sota kaya e dua na tamata ka colata tiko e dua na saqa wai; drau muri koya sara. 14Ia na vale e na la'ki curu kina, drau kaya vua na i taukei ni vale, ʻE kaya mai na i Vakavuvuli, Evei na tiki ni vale ni vulagi me keitou na vakayagataka kina na magiti ni Lakosivia kei iratou na noqu tisaipeli?ʼ 15E na qai vakaraitaka vei kemudrau e dua na tiki ni vale levu e cake, sa vakaiyaya ka vakarau tu. Drau vakarautaka kina na kedatou” 16E rau sa mani lako na tisaipeli, ka yaco ki na koro koya ka kunea na veika kece me vaka ga e a sa tukuna vei rau ko koya. E rau sa mani vakarautaka kina na magiti ni Lakosivia. 17Ia ni sa yakavi mai, e ratou sa qai lako ko Jisu kei iratou na lewe tinikarua ki na vale koya. 18Ni ratou sa kana tiko, sa qai kaya ko Jisu, “Au sa kaya vakaidina vei kemudou, e dua vei kemudou e na vakaraitaki au vei ira na kequ meca, e dua ga e kana vata tiko oqo kei au” 19Sa rarawa sara na lomadratou, ka ratou dui kaya vakaveitaravi yani vua, “O i au beka?”, “O i au beka?” 20Sa qai kaya vei iratou ko koya, “E dua ga vei kemudou na lewe tinikarua, o koya sa tokoca vata kei au na kena madrai e na sedre. 21Ni sa na lako ga na Luve ni Tamata me vaka sa volai tu e na vukuna, ia sa na vakadomobula na ka e na yaco vua sa vakaraitaki koya vei ira na nona meca! E vinaka cake vua na tamata koya me a kakua ga ni sucu mai!” 22Ia ni ratou sa kana tiko, sa qai taura na madrai ko Jisu ka masulaka, ka dovia, ka solia vei iratou na tisaipeli, ka kaya, “Dou taura, ka kania; oqo na yagoqu.” 23Sa qai taura na bilo, ia ni sa vakavinavinakataka oti sa qai solia vei iratou, ka ratou sa gunu kece sara kina. 24Sa qai kaya vei iratou, “Oqo na noqu dra ni veiyalayalati vou, sa liviraki e na vukudra na lewe vuqa. 25Au sa kaya vakaidina vei kemudou, au na sega tale ni gunuva na vua ni vaini me yacova na siga au na gunuva tale kina e na matanitu ni Kalou” 26Ia ni ratou sa lagata oti e dua na sere, e ratou sa qai lako ki na Delana Veiolive. 27Sa qai kaya vei iratou na tisaipeli ko Jisu, “Dou na tarabe kece ko i kemudou e na vukuqu e na bogi e daidai, ni sa volai tu, ʻAu na mokuta na i vakatawa ni sipi, ka ra na dui veiseyaki na sipi.ʼ 28Ia ni'u sa na vakaturi cake tale, au sa na liu vei kedatou ki Kalili” 29Sa qai kaya vua ko Pita, “Kevaka e ratou na biuti kemuni kece ko iratou oqo, o i au ga e na sega.” 30Sa qai kaya vua ko Jisu, “Au sa kaya vakaidina vei iko, e na bogi ga e daidai, ni bera ni tagi vakarua na toa, ko sa na cakitaka vakatolu ni ko kilai au .” 31Sa qai kaya ko Pita e na yalo katakata, “Ke daru mani mate vata sara ga, au na sega ga ni cakitaki kemuni” E ratou a kaya kece vaka kina na tisaipeli. 32E ratou sa qai lako kece sara ki na vanua e vakatokai ko Kecisemani; ka sa kaya vei iratou na nona tisaipeli ko Jisu, “Dou tiko e ke me'u sa tei masu mada” 33Sa qai kauti iratou ko Pita kei Jemesa kei Joni ko koya ka sa qai yacovi koya vakasauri mai na lomabibi kei na yaluma. 34Sa qai kaya vei iratou ko koya, “Sa rarawa vakalevu na yaloqu sa vovoleka sara me'u mate kina. Dou tiko ga e ke, ka vakatawa tiko .” 35Sa qai lako vakalailai ki liu ko koya ka la'ki tekiduru, ka masulaka de rawa me kakua ni sotava na gauna dredre koya. 36A sa masu ka kaya, “Tamaqu, sa rawarawa vei kemuni na veika kece ga; ni kauta tani mada vei au na bilo ni rarawa oqo; ia me kakua ni vaka na lomaqu; me vakayacori ga na lomamuni.” 37Sa qai lesu tale ko koya ka raici iratou ni ratou sa moce tu. Sa qai kaya vei Pita, “Saimoni, o a moce? E sega beka ni rawa ni ko yadra tiko me dua ga na aua? 38Dou yadra tiko ka masu, mo dou kakua kina ni rawai e na vere. E dina ga sa gu na yalo, ia sa malumalumu na yago” 39Sa qai lako tale ko Jisu ka masu, ka cavuta tale na qaqa ni masu ga ka a cavuta e liu. 40Ia ni sa lesu tale vei iratou ko koya, ka raica ni ratou sa moce tu, ni sa sivia na nodratou via moce. E ratou a sega ni kila se cava me ratou kaya vua. 41Sa qai lako tale ko koya vei iratou e na i katolu ni gauna, ka kaya vei iratou, “Dou se moce tiko ga ka vakacegu tiko? Sa rauta mada! Raica, sa yaco mai na kena gauna me soli yani kina na Luve ni Tamata ki na ligadra na tamata i valavala ca. 42Dou tu, me datou lako! Raica, sa voleka mai oqo ko koya ka bukiveretaki au.” 43Ni sa vosa tiko ga ko Jisu, sa lako sara ko Jutasa, e dua vei iratou na lewe tinikarua, kei na dua na i lala levu era vakaiseleiwau, ka vakaiwau. Era a talai mai vei ira na bete levu kei ira na daunilawa kei ira na qase. 44E a sa solia tu na daubukivere e dua na i vakatakilakila vei ira, ni a kaya, “O koya ga au na reguca, sa i koya sara ga koya; dou tauri koya ka qarauna vakavinaka me kakua ni dro .” 45Ia ni sa yaco yani ko Jutasa, sa lako vakadodonu sara vei Jisu, ka kidavaki koya ka kaya, “Vakavuvuli!” ka reguci koya sara. 46Era sa qai tauri koya ka vesuka. 47Ia sa qai ucuna na nona i seleiwau e dua vei iratou ka tu voleka e kea, ka taya laivi kina na daliga ni dua na tamata ni Bete Levu. 48Sa qai kaya vei ira ko Jisu, “Ko i au beka e dua na tamata daubutako ka dauvakacaca mo ni vakaiseleiwau ka vakaiwau tu mai kina e na nomuni mai vesuki au? 49Au a dau tiko vata voli ga kei kemuni e na veisiga e na Valenisoro, ka'u vakatavuvuli tiko, ia ko ni a sega ga ni vesuki au. Ia sa yaco ga na ka oqo me vakayacori kina na vosa ni Vola Tabu.” 50E ratou sa qai laivi koya kece na tisaipeli ka dro. 51Ia e a muri koya tiko yani e dua na cauravou, ka ovici koya wale voli sara ga yani e na dua na i sulu lineni. Era sa qai via vesuki koya ko ira koya. 52Ia, sa qai laiva tu mai na i tutuvi lineni ko koya ka dro luvawale yani. 53Era sa qai kauti Jisu sara ki na i tikotiko ni Bete Levu, e na vanua era sa soqoni vata kece tiko yani kina ko ira na matabete e cake, kei ira na qase kei ira na daunilawa. 54A muri vakayawa tiko ga yani ko Pita, ka yaco sara ki na loma ni bai ni Bete Levu; ka la'ki dabe vata kei ira na yadra, ka tatalai e na buka. 55Era sa qai vakasaqara ko ira na matabete e cake kei ira kece na lewe ni Bose Lawa e dua na cala me ra beitaki Jisu rawa kina me vakamatei; ia era mani sega ga ni kunea rawa e dua na ka. 56Era sa lewe vuqa era beitaki koya vakailasu, ia sa duidui na nodra i tukutuku. 57E ratou sa tu cake e so na tamata ka beitaki koya vakailasu, ka ratou kaya, 58“Keitou a rogoci koya ni kaya, ʻAu na vakarusa na Valenisoro oqo ka caka e na liga, ka'u na tara e dua tale ka sega ni caka e na liga ni sa oti e tolu na siga.ʼ” 59E a duidui tale ga na nodratou i tukutuku. 60Sa qai tu cake na Bete Levu e na kedra maliwa, ka tarogi Jisu ka kaya, “E sega beka na ka mo kaya e na vuku ni ka era beitaki iko kina ko ira oqo?” 61Ia e a galu tu ga ko koya, ka sega ni sauma. A tarogi koya tale na Bete Levu, ka kaya, “Sa i iko li na Karisito, na Luve ni Kalou Cecere?” 62Sa qai kaya ko Jisu, “Io sa i au sara ga oqo; ka ko ni na raica na Luve ni Tamata ni sa dabe tiko e na liga i matau i Koya na Kaukauwa, ka ni na lako tale ga mai e na o ni lomalagi” 63Sa qai dresulaka na nona i sulu na Bete Levu, ka kaya, “Na i vakadinadina cava tale eda sa qara tiko? 64Ko ni sa rogoca ni sa vosa vakacacataka na Kalou ko koya. A cava ko ni sa lewa kina?” Era sa qai lomavata kece ni sa dodonu me mate. 65Era sa qai kasiviti koya e so, ka ubia na matana, ka vakavacuki koya, ka kaya vua, “Tukuna mada mai o cei soti e vacuki iko!” Era sa qai tauri koya tale ga na yadra ka sabalaka. 66E a tiko ga e ra ko Pita e na rara ni loma ni bai, sa qai lako yani kina e dua na vada ni Bete Levu. 67Ia ni sa raici Pita ni tatalai tiko, sa qai vakaraici koya vakavinaka sara, ka kaya, “Ko iko tale ga oqo ko dau tiko vata kei Jisu na kai Nasareci” 68Ia sa qai cakitaka ko koya, ka kaya, “A cava ko tukuna tiko mai oqori? Au sega ni kila kina e dua na ka!” Sa qai lako vaka ki na matamata ko Pita; ka sa tagi sara na toa. 69A raici koya tale e kea na vada, ka tukuna vei ira ka tu voleka kina, ka kaya, “Oqo e dua vei rratou!” 70Ia sa qai cakitaka tale ko koya. Ia ni sega so ni dede, era sa kaya tale vei Pita ko ira ka tu voleka e kea, “O iko dina sara ga e dua vei iratou, ni o iko kai Kalili” 71Sa qai bubului ko Pita ka kaya, “Me totogitaki au mada ga na Kalou kevaka au lasu; au sega ni kila na tamata ko ni tukuna tiko oqori!” 72A sa tagi tale na toa. Sa qai nanuma sara ko Pita na vosa ka a kaya vua ko Jisu, “Ni sa bera ni tagi vakarua na toa ko sa na cakitaki au vakatolu.” A sa luluvu vakalevu na lomana ka tagi.

will be added

X\