MARIKA 13

1Ia ni sa biuta mai na Valenisoro ko Jisu, sa kaya vua e dua vei iratou na nona tisaipeli, “Na i Vakavuvuli, ni raica mada na lelevu ni vatu kei na lagilagi ni veivale oqo!” 2Sa qai kaya vua ko Jisu, “Ko sa raica na veivale lelevu oqo? E na sega ni vo tale eke e so na vatu me veitaqataqai tu, era na talaraki sobu kece ga.” 3Ia ni sa dabe tiko ko Jisu mai na Delana Veiolive, ka taudonuya na Valenisoro, e ratou sa qai tarogi koya lo ko Pita kei Jemesa, kei Joni kei Adriu ka ratou kaya, 4“Ni tukuna mada vei keitou e na yaco beka e naica na veika oqo, ka cava na kena i vakatakilakila ni ra sa vakarau yaco?” 5Sa kaya vei iratou ko Jisu, “Dou qarauna me kakua ni dua e vakacalai kemudou. 6E lewe vuqa era na lako mai ka mai lasutaka na yacaqu ka kaya, ʻSa i au ga ko koya!' ka ra na vakacalai ira e lewe vuqa. 7Ia ni dou sa rogoca na veivaluvaluti kei na i rogorogo ni valu, dou kakua ni kidroa; sa dodonu me yaco mada na veika oqori, ia e sa bera ga na i vakataotioti. 8Ni ra na veisaqasaqa na veivanua, ka ra veisaqasaqa na veimatanitu; e na yaco na uneune e na veivanua e vuqa, e na yaco na dausiga; ia oqo e sa qai i vakatekivu ga ni veika rarawa me vaka na nona mosi na yalewa sa taratara. 9“Ia ko i kemudou, dou qarauni kemudou vinaka; ni ra na beitaki kemudou yani ki na mataveilewai e so, ka dou na vakanakuitataki e na veivalenilotu; ka dou na kau e na matadra na kovana, kei ira na tui e na vukuqu, me kena i vakadinadina vei ira. 10Ia sa dodonu me vunautaki mada e liu na i Tukutuku Vinaka e na veivanua kece ga. 11Ni ra sa vesuki kemudou mo dou lewai, dou kakua ni leqataka na ka mo dou na kaya; ia mo dou na qai kaya ga na ka kece ga e soli vei kemudou e na tiki ni gauna koya. Dou na sega ni vosa koi kemudou, ia e na vosa ga na Yalo Tabu. 12Era na dui solia na tamata na tuakadra se tacidra me vakamatei ka na solia na luvena na tamana, ka ra na vorati ira na nodra i tubutubu ko ira na gone, ka soli ira me ra vakamatei. 13Era na cati kemudou na tamata kece ga e na vuku ni yacaqu. Ia ko koya ga e vosota me yacova na i vakataotioti e na vakabulai. 14“Ia ni dou sa raica na ka vakasisila e vu ni veivakarusai ni sa tiko e na tikina tabu me vaka sa vosa kina ko Taniela na parofita (me kila ko koya sa wilika na ka oqo), me ra dro sara ki na veidelana ko ira era tiko e Jutia; 15me kakua ni vakaoti gauna tale ko koya sa tiko e na dela ni nona vale, me la'ki kauta mai kina e dua na ka. 16Me kakua ni lesu ko koya sa tiko e na vanua ni teitei me la'ki kauta mai na nona i sulu. 17Sa na dua na gauna ca vei ira na yalewa bukete, kei ira ka sa vakasucu gone tiko na gauna koya! 18Ia dou masulaka me kakua mada ga ni yaco na veika koya e na vula i liliwa. 19Ni na vakadomobula cake sara na veika rarawa e na yaco e na gauna koya mai na veika e a sa sotava oti ko vuravura, me tekivu mai na gauna ka a bulia kina na Kalou me yacova na gauna oqo. E na sega tale ga ni yaco e muri e dua na ka me vaka kina. 20Kevaka e qai sega ni vakalekalekataka na gauna koya na Turaga, e na sega ni dua na tamata me vakabulai. Ia sa vakalekalekataka ga na gauna ko ya ko koya e na vukudra na nona tamata digitaki. 21“Ia ke dua e kaya vei kemudou, ʻRaica, oqo na Karisito!' se ʻRaica, koya ko koya!' dou kakua ni vakabauta. 22Ni ra na tubu mai na Karisito vakailasu, kei na parofita vakailasu, ka vakaraitaka mai na veivakatakilakila kei na veika veivakurabuitaki, me vakacalai ira na digitaki, kevaka e rawa. 23Ia au sa tukuna rawa toka oqo vei kemudou na veika kece ga! Dou qarauni kemudou vinaka. 24“Ia e na gauna koya, ni sa oti na veika rarawa oqori, e na qai vakabutobutotaki na matanisiga, ka sa na sega tale ga ni cila na vula; 25ka ra na qeqera mai na veikalokalo mai lomalagi, ka ra na vakayavalati na veika kaukauwa ni maliwa lala. 26Era sa na qai raica na Luve ni Tamata ni sa lako mai e na o e na kaukauwa levu kei na i serau. 27E na qai talai ira yani na agilosi ko koya me soqoni ira vata na digitaki mai na veimatanicagi e va, mai na i yalayala kei vuravura ka yacova na i yalayala kei lomalagi. 28“Dou vulica mada e dua na vosa vakatautauvata baleta na vunilolo: ni sa rovu mai na tabana, ka tubu mai na drauna, dou sa kila ni sa voleka na vula i katakata. 29Me vaka kina, ni dou sa raica ni sa yaco na veika oqo, dou kila ni sa voleka mai ko koya, io sa tu sara ga e katuba. 30Au sa kaya vakaidina vei kemudou, e na yaco mada e liu na veika kece koya ni bera ni takali yani na i tabatamata oqo. 31E na takali ko lomalagi kei vuravura, ia na noqu vosa e na sega sara ni takali. 32“Ia e sega ni dua e kila na siga koya, se na kena gauna, era sega ni kila na agilosi mai lomalagi, se na Luvena; sa kila duadua ga ko Tamaqu. 33Dou qarauni kemudou vinaka, dou yadra tiko ka masu; ni dou sa sega ni kila na kena gauna. 34Sa vaka e dua na tamata e vakarau lako e na dua na i lakolako. Sa biuta tu mai na nona vale me ra vakatawa ko ira na nona tamata, ka solia tu na cakacaka me ra dui qarava. A sa vakarota na i vakatawa ni katuba me yadra tiko. 35O koya gona mo dou yadra tiko, ni dou sega ni kila na gauna e na yaco mai kina na i taukei ni vale, e na yakavi, se e na lomaloma ni bogi, se e na tagi ni toa, se e na mataka lailai; 36de na lako vakasauri mai, ka kunei kemudou ni dou moce lutu tu. 37Na ka au sa kaya vei kemudou, au sa kaya vei ira na tamata kece ga, ʻNi yadra tiko!ʼ “

will be added

X\