MARIKA 11

1Ia ni ratou sa toro voleka tiko yani ki Jerusalemi, volekati Pecifaki kei Pecani, e na Delana Veiolive, sa qai tala e rua vei iratou na nona tisaipeli ko Jisu, 2ka kaya vei rau, “Drau lako ki na koro koya; ni drau sa curu kina, drau na kunea sara e dua na luve ni asa e sa sega ni bau vodoki vakadua, ni vesu tu. Drau sereka ka kauta mai. 3Ke dua e kaya vei kemudrau, ʻNa cava ko drau cakava tiko kina na ka oqori?ʼ Drau kaya, ʻE via vakayagataka na Turaga, ka na qai vakasuka tale mai vakatotolo.ʼ” 4E rau sa mani lako sara ka kunea na luve ni asa ni tu e na gaunisala ka noka tu e na katuba ni dua na vale; ka rau sa sereka sara. 5E ratou a qai kaya mai ko iratou ka tu voli e kea, “Na cava ko drau sereka kina na luve ni asa?” 6E rau sa qai kaya vei iratou na ka e a kaya ko Jisu, ka ratou sa mani laivi rau me rau kauta na asa. 7E rau sa qai kauta na asa vei Jisu, ka tevuka e delana na nodrau i sulu, ka sa vodo sara kina ko koya. 8Era sa tevuka na nodra i sulu e na gaunisala e lewe vuqa, ka ra sa taya e so na taba ni kau e so tale ka veibiuyaka e na gaunisala. 9Ia ko ira era liu tiko kei ira era muri, era sa kailavaka mai, “Osana! Sa kalougata ko koya sa lako mai e na yaca ni Turaga! 10Me kalougata na matanitu i Tevita na noda qase sa lako tiko mai oqo! Osana ki cake sara!” 11Sa qai curu ki Jerusalemi ko Jisu, ka lako sara ki na Valenisoro. Ia ni sa oti na nona vakaraica voli na veika kece ga, sa yakavi mai na vanua. E ratou sa qai lako sara ki Pecani kei iratou na lewe tinikarua. 12Ia ni ratou sa lesu tiko mai Pecani e na siga ka tarava, sa qai via kana ko Jisu. 13Sa raica vakayawa yani e dua na vunilolo bulabula vinaka, ka mani lako sara yani me raica de vua tu. Ni sa yaco kina, e a sega ni kunea e dua na ka, na drauna wale ga, ka ni sega ni vula i lolo koya. 14Sa qai kaya ki na vunilolo ko Jisu, “Me kakua tale ni dua me kana lolo vei iko ka tawa mudu.” E ratou a rogoca kece na ka oqo na nona tisaipeli. 15Ia ni ratou sa yaco ki Jerusalemi, sa la'ki curu sara ki na Valenisoro ko Jisu. Sa qai tekivu vakasavi ira tani na veivoli tiko kina, ka vukica na nodra teveli na dauveisau i lavo kei na nodra i dabedabe na volitaki ruve; 16ka a sega ni vakatara e dua me colata e loma ni Valenisoro e dua na ka. 17Sa qai vakavulici ira, ka kaya, “E sega li ni volai tu e na i Vola Tabu, ʻA noqu vale e na vakatokai me nodra vale ni masu na veimatanitu kece gaʼ? Ia ko ni sa cakava ga me nodra qara na daubutako” 18Ia ni ra sa rogoca na ka oqo ko ira na bete levu kei ira na qasenivuli ni lawa era sa qai saga e dua na sala me ra vakamatei koya kina ni ra sa rerevaki koya, e na vuku ni nodra kurabuitaka na lewe vuqa na nona i vakavuvuli. 19Ia ni sa yakavi mai e ratou sa qai biuta tale na koro ko Jisu kei iratou na nona tisaipeli. 20E na mataka lailai ka tarava ni ratou sa lako tiko e na gaunisala, e ratou sa raica na vunilolo ni sa mate vakadua, me yaco sara ki wakana. 21Sa qai nanuma ko Pita na nona vosa, ka kaya, “Vakavuvuli, ni raica, sa mate na vunilolo ko ni a cudruva!” 22Sa qai kaya vei iratou ko Jisu, “Dou vakabauta na Kalou. 23Au sa kaya vakaidina vei kemudou, ke dua e kaya ki na ulunivanua oqo, ʻMo toki tani ka biu ki wasawasa,ʼ ka vakabauta ni na yaco na ka e tukuna, ka sega tale ni vakatitiqa na lomana, e na vakayacori dina na ka e kaya. 24Sa i koya gona au kaya kina vei kemudou ni ka kece ga dou kerea e na masu, ka vakabauta ni dou na rawata, dou na rawata dina ga. 25Ni dou sa tu mo dou masu, dou vosota ka guilecava taumada na nodra ca era sa caka ca vei kemudou, e na qai bokoca tale ga kina na nomudou i valavala ca na Tamamudou mai lomalagi. 26Ia kevaka dou sa sega ni vosota ka guilecava, e na sega tale ga ni bokoca na nomudou i valavala ca na Tamamudou mai lomalagi.]” 27E ratou sa qai lesu tale ki Jerusalemi. Ia ni sa veilakoyaki voli e loma ni Valenisoro ko Jisu, era sa qai lako vua ko ira na bete levu, ko ira na qasenivuli ni lawa, kei ira na qase, 28ka ra tarogi koya ka kaya, “Ko vakayacora tiko na veika oqo e na lewa mai vei? Ko cei e a solia vei iko na kaukauwa mo cakava kina na veika oqo?” 29Sa qai kaya vei ira ko koya, “Au na tarogi kemuni e na dua na taro; mo ni sauma mai vei au, ka'u na qai tukuna vei kemuni se na lewa mai vei au vakayacora tiko kina na veika oqo. 30E vu mai vei na veipapitaisotaki i Joni, e vu mai lomalagi se vu mai vua na tamata? Ni sauma mada mai” 31Era sa qai veileti vakai ira, ka kaya, “Kevaka eda kaya, ʻMai lomalagi,ʼ e na qai kaya ko koya, ʻNa cava ga ko ni sega ni vakabauti koya kina.ʼ 32Ia keda kaya, ʻMai vua na tamata...ʼ” (Era a rerevaki ira na tamata, ka ni ra sa vakadinata ni a parofita dina ko Joni.) 33Era sa qai kaya vei Jisu, “Keimami sega ni kila” Sa qai kaya vei ira ko Jisu, “Au na sega tale ga ni tukuna vei kemuni se lako mai vei na lewa au vakayacora tiko kina na veika oqo”

will be added

X\