MARIKA 1

1Na i vakatekivu ni Tukutuku Vinaka kei Jisu Karisito, na Luve ni Kalou 2me vaka sa volai tu e na i vola i Aisea na parofita, “Raica, au sa tala na noqu i talai me liu e matamu, e na caramaka ko koya na nomu sala. 3Sa kacikaci voli e loma ni vanua lala e dua na domo, ka kaya: ʻNi caramaka na sala ni Turaga, cakava me dodonu na nona gaunisala!ʼ” 4O koya gona koya e a basika mai kina ko Joni na dauveipapitaisotaki e na vanua lala, ka vunautaka voli me ra papitaiso ko ira sa veivutuni me bokoci kina na i valavala ca. 5Era sa qai lako kece vua na vanua ko Jutia kei ira mai Jerusalemi; ia ni ra sa vakatusa na nodra i valavala ca sa papitaisotaki ira ko koya e na uciwai na Joritani. 6A vakaisulu tu ko Joni e na i sulu vuti ni kameli, ka vau na tolona e na i vau kuli ni manumanu; a kena kakana na vodre kei na oni ni veikau. 7A vunau voli ko koya, ka kaya, “E muri au tiko mai e dua e cecere cake vei keirau, ka sega mada ga ni rauti au me'u sereka na wa ni nona i vava. 8Au sa papitaisotaki kemuni e na wai, ia e na papitaisotaki kemuni ko koya e na Yalo Tabu .” 9A mani yaco e na gauna koya ni sa lako mai kina ko Jisu mai Nasareci mai Kalili, sa papitaisotaki koya ko Joni e na uciwai na Joritani. 10Ia ni sa cabe mai wai, sa raica sara ko koya na lomalagi ni sa wase rua, ka raica tale ga na Yalo Tabu ni sa lako sobu vua me vaka na ruve. 11A sa rogo mai lomalagi e dua na domo, ka vaka, “O iko na noqu Gone ni Toko; au sa dau vinakati iko vakalevu.” 12Sa qai kauti koya sara na Yalo Tabu ki na vanua lala. 13A sa tiko ko koya e na vanua lala ka siga vasagavulu ka sa veretaki koya ko Setani. Era a tiko vata kei koya na manumanu kila ka ra a qaravi koya na agilosi. 14Ia ni sa biu oti ki vale ni veivesu ko Joni, sa qai lako ko Jisu ki Kalili, ka vunautaka na i Tukutuku Vinaka mai vua na Kalou, 15ka kaya, “Sa qai yaco mai na kena gauna, ka sa voleka na matanitu ni Kalou. Ni veivutuni ka vakabauta na i Tukutuku Vinaka!” 16Ia ni sa lako tiko e na baravi mai Kalili ko Jisu sa raici Saimoni sara kei Adriu na tacina ni rau viritaka tiko na lawa ki wai, ka ni rau sa gonedau. 17Sa qai kaya vei rau ko Jisu, “Drau muri au mai ka'u na qisi kemudrau mo drau yaco mo drau gonedau ni tamata” 18E rau sa mani biuta sara na nodrau lawa ka muri koya. 19Ia ni sa lako vakalailai ki liu ko koya, sa raici Jemesa sara na luve i Sepeti, kei Joni na tacina, ni rau oneva tiko na lawa e na nodratou waqa. 20Sa kacivi rau ko koya, ka rau sa biuti Sepeti sara na tamadrau kei iratou na tamata cakacaka ka muri koya. 21E ratou sa qai lako ki Kapenaumi; ia e na Siga ni Vakacecegu sa curu ko koya ki na valenilotu ka veivakatavulici kina. 22Era a kurabuitaka na nona i vakavuvuli ko ira na vakarorogo, ni sa vakatavulici ira me vaka e dua ka tu vua na lewa, ka sega ni vakataki ira na daunilawa. 23Sa qai curu yani kina vakasauri e dua na tamata ka curumi koya tiko e dua na yalo velavala; 24ka kaya vua, “I Jisu na kai Nasareci, a cava ko ni via cakava vei keimami? Ko ni sa mai vakawabokotaki keimami li? Au sa kilai kemuni. Sa i kemuni na Le Dua Yalosavasava ni Kalou!” 25Sa qai karaci koya ko Jisu ka kaya, “Galu sara, ka biuti koya!” 26Ia ni sa bitalaki koya na yalo velavela, ka qoqolou e na domo levu, sa qai biuti koya. 27Era sa kurabui kece ga, ka veitarotarogi vaka i ira, ka kaya, “Na cava beka oqo? A i vakavuvuli vou cava beka oqo? Ni o ira sara mada ga na yalo velavela era talairawarawa ki na nona i vakaro!” 28A sa tete sara vakatotolo na i rogorogo kei Jisu ki na veiyasana kece ga ka vakavolivoliti Kalili. 29E ratou sa qai biuta sara na valenilotu ka la'ki curu ki na nodratou vale ko Saimoni kei Adriu, ka rau a sala vata kei iratou ko Jemesa kei Joni. 30E a davo tiko na tina i wati Saimoni ni tauvi katakata. E ratou sa mani tukuni koya sara vua. 31Sa qai lako sara ko Jisu ka taura na ligana, ka vakaduria cake. A takali vakasauri na katakata; ka sa mai qaravi iratou sara yani ko koya. 32E na yakavi koya, ni sa la'ki dromu na siga, era sa qai lako vua ko ira kece na tauvimate kei ira na curumi tevoro. 33Era a soqo vata yani na lewe ni koro taucoko e na mata ni katuba. 34A sa vakabulai ira e lewe vuqa ka tauvi ira tu e levu na veimataqali mate, ka vakasavi ira tani e vuqa na tevoro ka sega ni via laivi ira na tevoro me ra vosa, ni ra sa kila se ko cei ko koya. 35Ia e na mataka caca ni siga ka tarava a cavutu ko Jisu ka lako ki na dua na vanua lala, ka la'ki masu kina. 36E ratou a qai muri koya ko Saimoni kei iratou ka tiko vata kaya. 37Ia ni ratou sa kunei koya e ratou sa kaya vua, “Era sa vakasaqarai kemuni tiko na tamata kece ga.” 38Ia sa kaya vei iratou ko koya, “Tou lako yani ki na veikoro voleka tale e so, me'u vunau tale ga kina; ni sa i koya oqo na ka au a lako mai kina” 39A vakalakova ko koya na vanua taucoko ko Kalili ka vunau e na nodra veivalenilotu ka vakasavi ira na tevoro. 40A lako vei Jisu e dua na vukavuka, ka tekiduru ka vakamamasu, ka kaya vua, “Kevaka sa lomamuni, sa rawa mo ni vakasavasavataki au.” 41Sa tuburi koya na yalololoma, ka dodoka na ligana ka tara na vukavuka ka kaya vua, “Au sa vinakata; mo savasava mai!” 42A sa takali vakasauri vua na vukavuka, ka sa bula sara ko koya. 43Sa qai vakaroti koya vakaukauwa, ka vakatala, 44ka kaya vua, “Qarauna mo kakua ni tukuna e dua na ka vua e dua tale na tamata, ia mo lako ga ka vakaraitaki iko vua na bete, ka vakacabora na i soro e a vakarota ko Mosese, me i vakadinadina vei ira na tamata kece ga ni ko sa vakabulai.” 45Ia ni sa lako na tamata koya sa qai la'ki talanoataka sara ka vakateteya na kena i tukutuku, ka sa sega kina ni rawa vei Jisu me curu vakarairai e na dua na koro. A sa la'ki tu voli ga ko koya e na vanua lala, ka ra sa qai lako yani kina vua na tamata mai na veiyasana kece ga.

will be added

X\