LUKE 8

1Ni oti toka ga koya sa lako ko Jisu e na veikoro lelevu kei na veikoro lalai, me vunau ka tukuna kina na i Tukutuku Vinaka ni matanitu ni Kalou. E ratou a lako vata kaya kina na lewe tinikarua, 2ka vaka kina ko ira e so na yalewa ka a vakabulai oti mai na yalo velavela kei na tauvimate e so. Koya ko iratou ko Meri, na yalewa ni Makitala, ka a lako tani mai vua e vitu na tevoro, 3kei Joana na wati Kusa, na dauniyau i Eroti, kei Susana, kei ira e lewe vuqa tale, ko ira ka dau qaravi iratou e na nodra i yau. 4Era a tabili tiko ga vei Jisu ko ira na tamata mai na veikoro, ia ni ra sa soqoni vata yani e dua na i lala levu, sa qai tukuna vei ira na vosa vakatautauvata oqo ko koya: 5“E a lako e dua na dauteitei me kaburaka na nona sore ni sila. Ni sa kabukaburaki voli, sa qai lutu e so e na tutu ni sala, a ra sa laubutu kina; ka ra sa kania na manumanu vuka. 6A sa lutu e so e na dela ni vatu; ia ni sa tubu cake, sa raqosa sara, ni a sega ni suasua. 7Ka sa lutu e so e na loma ni veiwavakavotona; a ra sa tubu vata cake ka sa vakaruguti ira na veiwavakavotona. 8A sa lutu e so e na qele vinaka, ka ra sa tubu cake, ka ra mani vua, ka ra sa vuavuaidrau” Ni sa cavuta oti ko koya na veika oqo, sa qai kacivaka, “O koya sa vakadaligana me rogo kina, me rogoca sara.” 9Era sa qai tarogi Jisu na nona tisaipeli sa cava na i balebale ni vosa vakatautauvata koya. 10Sa qai kaya ko koya, “Sa soli ga vei kemuni mo ni kila na veika vuni ni matanitu ni Kalou; ia vei ira na tani sa tukuni ga vei ira na vosa vakatautauvata, me ra raica tu ka sega ni kunea, ka ra rogoca tu ka sega ni kila. 11“Sa i koya oqo na i balebale ni vosa vakatautauvata: Na sore ni sila, koya na vosa ni Kalou. 12Na sore ni sila e tutu ni sala, sa i ira era sa rogoca na vosa, sa qai lako mai na tevoro ka kauta laivi na vosa mai na lomadra, me ra kakua kina ni vakabauta ka vakabulai. 13Kei ira e na dela ni vatu, sa i ira era sa rogoca ka vakabauta na vosa e na reki, ia sa sega na wakadra. Era sa vakabauta vakadede vakalailai ga, ia ni sa yaco na veivakatovolei era sa mani bale tale. 14Kei ira ka ra a lutu e na veiwavakavotona, sa i ira era sa rogoca na vosa, ia ni ra sa lako tu e na nodra sala era sa vakaruguti e na lomaocaoca kei na i yau kei na veika ni lasa ni bula oqo, ka sa sega ni matua rawa na vuadra. 15Ia ko ira e na qele vinaka, sa i ira era sa rogoea na vosa, ka ra sa taura matua sara e na lomadina ka vinaka, ka ra sa vuataka mai na vuadra e na nodra dau vosota. 16“E sega ni dua na tamata e tutuvaka na cina me qai ubia e na dua na dari se biuta e na ruku ni davodavo, ia e na biuta ga e na kena i tutu me ra raica na rarama ko Ira era curu mai. 17Ni sega na ka e vunitaki me sa sega ni vakaraitaka e na matana levu ka sega na ka e tabogo me na sega ni kilai se vakavotui. 18“Ni qarauni kemudou kina e na i tovo ni nomuni rogoca; ko koya ga sa tu vua na ka e na soli vakalevu tale vua, ia ko koya e sega na ka e tu vua, e na kau tani mai vua na ka e nanuma ni sa bau tu vua” 19E ratou sa qai lako vei Jisu ko finana kei rratou na tacrna, ka ratou a sega ni yaco rawa vua e na vukudra na lewe vuqa. 20Sa mani tukuni yani vua, “E ratou tu e tautuba na tinamu kei iratou na taeimu, ka ratou via raici iko.” 21Ia sa qai kaya vei ira ko koya, “Ko Ira ga era rogoca na vosa ni Kalou ka cakava, sa i Ira oqo na tinaqu kei na taciqu.” 22E na dua na siga e ratou sa qai vodoka e dua na waqa ko Jisu kei iratou na nona tisaipeli. A sa kaya vei iratou, “Tou lako mada ki tai kadua ni drano.” E ratou sa mani tekivu soko sara. 23Ia ni ratou sa soko tiko sa qai moce ko koya. E a qai tabaka sobu mai e dua na bati ni cagi kaukauwa, ka sa tekivu luvu na nodratou waqa, ka sa vovoleka sara na leqa. 24E ratou sa qai la'ki vakayadrati koya sara, ka kaya, “Turaga, Turaga, e datou sa leqa!” Sa qai tu cake ko koya ka vunauca na cagi kei na biau cudrucudru; a rau sa mani mudu sara, ka mai lutu yani na maravu. 25Sa qai kaya vei iratou ko koya, “Sa i vei na nomudou vakabauta?” Ia ratou sa rere ga ka kurabui ka veikayaka vakai iratou, “O cei beka oqo? Ni rau sa bau talairawarawa tale ga ki na nona i vakaro na cagi kei na wai!” 26E ratou sa qai kele yani ki na nodra vanua na kai Katara ka toka veidonui kei Kalili. 27Ni sa sobu yani ko Jisu ki vanua, e rau sa sota sara kei na dua na tamata mai na koro, ka curumi tevoro tu. Sa dede na nona sa sega voli ni dau vakaisulu, ka sega tale ga ni dau tiko e vale, ia sa dau tu voli ga e na i bulubulu. 28Ni sa raici Jisu, sa qai qoqolou mai, ka mai cuva sobu e matana, ka kaya e na domo levu, “Na cava ko ni via cakava vei au, Jisu, na Luve ni Kalou Cecere Sara? Au vakamasuti kemuni mo ni kakua ni vakararawataki au.” 29Sa vosa vaka oqo ni a sa vakarota oti na yalo velavela ko koya me lako tani mai vua na tamata koya. Ni sa vaka vuqa sara me curumi koya; ka sa dau yadravi matua kina, ka dau vesu e na sinucodo kei na i vau kaukauwa, ia sa dau drutidrutilaka na kena i vesu ka kauti koya na tevoro ki na vanua lala. 30Sa qai tarogi koya ko Jisu, “O cei na yacamu? Sa qai kaya ko koya, “Ko Vavakoso,” ni ra sa curumi koya tu e lewe vuqa sara na tevoro. 31A ra sa vakamasuti koya me kakua ni vakaroti ira me ra lako tani ki bulu. 32Ia era a kana voli e na dua na baba e dua na qele ni vuaka levu ka ra mani masuti koya me laivi ira me ra la'ki curumi ira na qele ni vuaka. Sa mani laivi ira sara ko koya. 33Era sa qai lako tani mai vua na tamata koya na tevoro ka la'ki curumi ira na vuaka. Era sa qai ciciva sobu na baba na qele ni vuaka ka ra sa la'ki luvu kece sara e na drano. 34Ia ni ra sa raica na i vakatawa ni vuaka na ka sa yaco, era sa qai dro, ka la'ki tukuna ki na koro kei na veiyasana ki vanua. 35Era sa qai lako yani na tamata me ra raica tale ga na ka sa yaco, ka ra sa mani yaco vei Jisu. Era sa raica na tamata sa lako tani oti mai vua na tevoro, ni sa dabe toka e na yava i Jisu, sa vakaisulu tu ka sa tu vinaka na nona vakasama; a sa yacovi ira na rere. 36Era sa qai tukuna vei ira na lako yani, ko ira na raica na ka koya na i tovo ni nona vakabulai ko koya ka a dau curumi tevoro. 37Era sa qai masuti koya ko ira kece ga na lewe ni yasana ko Katara, me lako tani mai vei ira, ni sa yacovi ira e dua na rere levu. Sa mani vodo ki waqa ko Jisu me lesu tale. 38Sa qai vakamasuti koya ko koya na tamata ka a lako tani mai vua na tevoro me bau tiko vata ga kei koya. Ia sa mani vakatalai koya lesu ga yani ka kaya, 39“Lesu ga ki nomudou ka tukuna kina na ka sa cakava vei iko na Kalou.” Sa mani lako sara ko koya ka tukuna yarayara e loma ni koro na ka sa cakava vua ko Jisu. 40Ni sa lesu mai ko Jisu era sa tavaki koya na lewe vuqa, ni ra sa waraki koya kece tiko. 41Sa qai lako mai e dua na tamata, na yacana ko Jairo, ka dua ko koya na i liuliu ni valenilotu, sa mai cuva e yava i Jisu ka masuti koya me lako mada ki na nona vale, 42ka ni dua voli ga na luvena yalewa, ka sa yabaki tinikarua toka, ia sa voleka sara koto ga ni mate. Ni sa lako tiko kina era sa sosori koya ka veidrigidrigi kaya na lewe vuqa. 43Ia vei ira koya, e tiko kina e dua na yalewa ka turidrabalavu tu ka sa yabaki tinikarua, ka sa sega ni dua e vakabulai koya rawa. 44Sa qai lako yani e na daku i Jisu ko koya, ka tara na tutu ni nona i sulu, ka sa mani mudu vakasauri sara na nona turidra. 45Sa qai kaya ko Jisu, “O cei e tarai au?” Ia ni ra sa kaya kece ga ni ra sega ni kila, sa qai kaya ko Pita, “Turaga, era sa osoti kemuni ka drigiti kemuni na lewe vuqa!” 46Ia sa kaya ko Jisu, “E dua e a tarai au, ni'u kila ni sa lako tani mai vei au na kaukauwa.” 47Ni sa raica na yalewa ni na sega ni vuni rawa, sa qai lako sautaninini yani ka cuva e matana, ka tusanaka e matadra na tamata kece ga na vuna e tarai koya kina, kei na nona vakabulai vakasauri. 48Sa qai kaya vua ko Jisu, “Na luvequ, sa vakabulai iko na nomu vakabauta; mo lako e na vakacegu.” 49Ni sa vosa tiko ga, sa tadu mai e dua na tamata mai na nona vale na i liuliu ni valenilotu, ka kaya, “Sa mate na luvemuni, ni kakua ni vakaoga tale na i Vakavuvuli.” 50Ni sa rogoci koya ko Jisu, sa qai kaya vei Jairo, “Kakua ni yalolailai, vakadinata ga, e na qai vakabulai ga ko koya.” 51Ia ni sa yaco yani ki vale ko koya, sa sega ni vakatara e dua tale me curu ki loma, ko Pita ga, kei Joni kei Jemesa, kei rau na tama kei na tina ni gone. 52Era sa tagi kece ga, ka osivaka,ia sa qai kaya ko koya, “Ni kakua ni tagi, o koya e sega ni mate, e moce ga.” 53Era sa qai dredrevaki koya, ni ra kila tu ni sa mate na gone yalewa. 54Ia ni sa taura na ligana ko Jisu, sa qai kaci ka kaya, “Lewa, duri cake!” 55Sa qai lesu tale vua na yalona, ka sa duri cake sara, ka sa vakarota ko Jisu me soli vua e dua na ka me kania. 56E rau a kurabui vakalevu sara na nona qase; ia e a vakaroti ira ga ko koya me ra kakua ni tukuna vua e dua na tamata na ka sa qai yaco.

will be added

X\