LUKE 7

1Ia ni sa tinia ko Jisu na nona vosa vei ira na lewe vuqa, sa qai curu ki Kapenaumi. 2E tiko kina e dua na turaganivalu ka tauvimate tu e dua na nona bobula, ka dau lomana vakalevu, ka sa voleka koto ni ciba. 3Ni sa rogoca na i tukutuku kei Jisu, sa qai tala vua e so na nodra qase na Jiu me ra kerei koya me lako mai ka vakabula na nona tamata. 4Ia ni ra sa yaco vei Jisu era sa vakamasuti koya vagumatua, ka kaya, “Na tamata oqo e ganiti koya kina sara ga na nomuni veivuke, 5ni sa dau lomana na noda mata tamata, ka sa tara oti tale ga e dua na neimami valenilotu” 6Sa qai lako vata kei ira ko Jisu. Ia ni sa voleka ni yaco ki na vale koya, ko koya, sa tala e so na nona i tokani na turaganivalu koya me ra kaya vua, “Turaga, ni kakua ni vakaocai kemuni, ni sa sega ni rauta mo ni curu ki na noqu vale. 7Sa i koya oqo au sega ni doudou kina me'u lako yani vei kemuni. Ia ni cavuta ga na vosa, e na vakabulai kina na noqu tamata. 8Ka ni ko i au tale ga au tu e na ruku ni nodra lewa era liu, ka ra vakarorogo tu vei au na sotia e so. Au kaya vua e dua, ʻLako!' ka sa lako sara; ki vua tale e dua, ʻLako mai!' ka sa lako mai; ki vua na noqu bobula, ʻKitaka oqo!' ka sa kitaka” 9Ni sa rogoca na veika oqo ko Jisu sa kurabuitaki koya, ka sa qai vuki vei ira na lewe vuqa era muri koya tiko, ka kaya, “Au tukuna vei kemuni, au sa sega mada ni bau raica e dua na vakabauta levu vaka oqo, e sega sara tale mada ga e Isireli!” 10Ia ni ra sa lesu tale ki vale ko ira era a talai, era sa kunea ni sa bula vinaka tale na bobula koya. 11Ni oti koya sa lako ko Jisu ki na dua na koro ka yacana ko Neini. Era a salavata kei koya ko iratou na nona tisaipeli kei ira e lewe vuqa sara. 12Ni sa voleka yani ko Jisu ki na matamata ni koro e a sota sara kei na dua na mate ni sa colati tiko ki na i bili ni koro. Na tamata mate koya e sega ni dua na tuakana se tacina, ka sa yada tu e na gauna koya ko tinana. Era lewe vuqa na lewe ni koro era lako vata kaya tiko. 13Ia ni sa raici koya na Turaga, sa lomana ka kaya vua, “Kakua ni tagi” 14Sa qai lako ko koya ka tara na tavata, ka ratou mani tu vakadua ko iratou ka colata tiko. Sa qai kaya ko koya, “I cauravou, au sa kaya vei iko, duri mai!” 15Sa qai duri cake na tamata ka a mate, ka tekivu vosa sara, ka sa soli koya vei tinana ko Jisu. 16A sa tuburi ira kece ga na rere ka ra vakalagilagia na Kalou ka kaya, “Sa tubu cake oqo e na keda maliwa e dua na parofita levu, ka sa mai sikovi ira na nona tamata na Kalou!” 17A sa kuruseta na vanua taucoko ko Jutia kei na veiyasana kece ga e vakavolivolita na kena i rogorogo. 18Era sa qai vakatakila vei Joni na ka kece ga oqo ko ira na nona tisaipeli. 19Sa qai kacivi rau e lewe rua na nona tisaipeli ko Joni ka talai rau vei Jisu me rau la'ki kaya, “Sa i kemuni beka ko koya me lako mai, se me keitou waraka e dua tale?” 20Ni rau sa yaco vua, e rau sa kaya, “E talai keirau mai ko Joni na Dauveipapitaisotaki, ka kaya, ʻSa i kemuni beka ko koya me na lako mai, se me keitou waraka e dua tani tale?ʼ” 21E na gauna koya, e a vakabulai ira kina ko koya e lewe vuqa mai na kedra mate e so, kei na rarawa, kei na yalo velavela e so, ka dolava na matadra e lewe vuqa na mataboko me ra rai rawa kina. 22Sa qai sauma ko Jisu ka kaya vei rau, “Drau lako ka tukuna vei Joni na ka drau sa raica ka rogoca: era sa rai na mataboko, era sa lako na lokiloki, era sa vakabulai na vukavuka, ka ra sa rogo na didivara; era sa vakaturi cake tale na mate, ka sa vunautaki na i Tukutuku Vinaka vei ira na dravudravua. 23Era sa kalougata ko ira sa dei tu ga na nodra vakabauta!” 24Ni rau sa lako tale ko i rau ka a tala mai ko Joni, sa qai tekivu vosa vei ira na lewe vuqa ko Jisu me baleti Joni, ka kaya, “Na cava beka ko ni a lakova ki na loma ni vanua lala mo ni raica? Na gasau sa yavalati e na cagi? 25Ia na cava beka ga ko ni a la'ki raica? Na tamata vakaisulu e na i sulu malumu? Raica, ko ira era dau vakaisulu e na i sulu sau levu ka ra tiko vinaka e na veika ni bula oqo era dau tiko ga e na veivale vakatui. 26Ia na cava beka ga ko ni a la'ki raica? E dua li na parofita? Io, au sa kaya vei kemudou, e dua ka sa levu cake mai na parofita. 27Sa i koya ga sa volai tu vaka oqo e na vukuna: ʻRaica, au sa tala na noqu dautukutuku me liu vei iko, e na caramaka ko koya na nomu sala e matamu.ʼ 28Au sa kaya vei kemuni, vei Ira kece era a sucu mai na yalewa e sega ni dua me uasivi cake mai vei Joni; ia ko koya e lailai duadua e na matanitu ni Kalou e uasivi cake vua.” 29Ni ra sa rogoca oqo ko Ira na tamata kece kei Ira na daukumuni i vakacavacava, era sa qai kaya ni sa dodonu ga na Kalou, ni sa papitaisotaki Ira oti krna ko Joni. 30Ia ko Ira na Farisi kei Ira tale ga na daunilawa era cata na i naki ni Kalou me baleti Ira, ka ra mani sega ni papitaisotaki kina mai vua. 31Sa qai kaya ko Jisu, “Na cava beka me'u vakatautauvatataki Ira kina na tamata e na i tabatamata oqo; era tautauvata beka kei na cava? 32Era sa vakataki Ira na gone era fiko voli e na makete ka ra veikaciyaki ka kaya, ʻKeitou a uvu i vakatagi vei kemudou, ia dou a sega ni meke. Keitou a vutugu, ia dou a sega ni tagi.ʼ 33Ni sa lako oti mai ko Joni na Dauveipapitaisotaki ka sega ni kana madrai se gunu waini, ko ni qai kaya, ʻE tiko vua e dua na tevoro.ʼ 34Sa lako oti mai na Luve ni Tamata ka dau kana ka gunu, ia ko ni a kaya, ʻRaica na tamata dau kana ka dau gunu waini ka nodra i tokani na dau kumuni i vakacavacava kei ira na tamata i valavala ca!' 35Ia na vuku ni Kalou sa laurai na kena dina vei ira kece era ciqoma” 36Sa qai sureti Jisu e dua vei ira na Farisi me rau la'ki kana vata. Sa mani lako ki na vale ni Farisi koya, ka tiko sobu me kana. 37Ia e tiko e na koro koya e dua na yalewa ca; ni sa kila ko koya ni sa kana tiko ko Jisu e na vale ni Farisi, sa qai kauta kina e dua na tavaya waiwai, 38ka la'ki tucake tu e dakuna vaka ki yavana, ka sa tagi tiko. Sa qai tekivu me vakasuasuataka na yava i Jisu e na wai ni matana, ka quwa e na drau ni uluna; sa qai reguregulaka na yavana, ka lumuta e na waiwai. 39Ia ni sa raica na Farisi ka a sureti Jisu sa kaya e lomana, “Ke parofita na tamata oqo, ke kila se ko cei, ka yalewa vakacava tale ga ko koya ka tarai koya tiko oqo; ni sa yalewa i valavala ca ko koya” 40Sa qai vosa ko Jisu, ka kaya vua, “Saimoni, e dua na ka au via kaya vei iko” Sa qai kaya ko koya, “Na i Vakavuvuli, kaya ga mai” 41“E dua na tamata e rau dinau tu vua e lewe rua; e dua e dinautaka tu e lima na drau na tiki ni siliva, ka dua vei rau e limasagavulu. 42Ni rau sa sega ni sauma rawa, sa qai bokoca wale vei rau ruarua ko koya. O cei mada vei rau e na lomani koya vakalevu cake?” 43Sa qai sauma ko Saimoni, “Au nanuma ni sa i koya ga e levu cake na ka e bokoci vua.” Sa qai kaya vua ko koya, “Ko sa vakataulewa vakadodonu” 44Sa qai vuki vua na yalewa, ka mani kaya vei Saimoni, “Ko sa raica na yalewa oqo ne? Au a curu mai ki na nomu vale, ka sega na wai ko solia me vui kina na yavaqu, ia sa vakasuasuataka na yavaqu ko koya e na wai ni matana ka quwaraka e na drau ni uluna. 45Ko a sega ni bau reguci au, ia mai na noqu yaco mai ki ke e sega ni mudu na nona reguca tiko na yavaqu. 46Ko a sega ni bau lumuta na uluqu e na waiwai, ia sa lumuta ko koya na yavaqu e na i lumu. 47O koya oqo au sa kaya kina vei iko na loloma levu sa vakaraitaka oqo ko koya sa i vakadinadina ni ra sa bokoci na nona i valavala e vuqa ka a bini tu vua. Ia ko koya e lailai na ka e bokoci vua, e lailai vaka tale ga kina na nona loloma.” 48Sa qai kaya ko koya vua na yalewa, “Sa bokoci na nomu i valavala ca” 49Ia ko ira era kana vata kaya tiko era veikayaka vakai ira ka kaya, “O cei beka oqo me bokoca rawa tale ga na i valavala ca?” 50Sa qai kaya ko koya vua na yalewa, “Sa vakabulai iko na nomu vakabauta; mo lako e na vakacegu”

will be added

X\