LUKE 6

1E na dua na Siga ni Vakacecegu ni a lako kosova tiko na veiloga ni sila ko Jisu, e ratou a qai doloka e so na sola ni sila na nona tisaipeli, ka qilia e ligadratou ka kania. 2Era sa qai kaya kina e so na Farisi, “Na cava ko dou cakava kina na ka e sega ni tara me caka e na Siga ni Vakacecegu?” 3A qai sauma ko Jisu ka kaya vei ira, “Ko ni a sega beka ni wilika na ka e a cakava ko Tevita ni sa via kana, ko koya kei iratou na tiko vata kaya? 4E a curu ko koya ki na vale ni Kalou, ka taura ka kania na madrai tabu (na ka e sega ni vakatarai me kania e dua, ka sega ni bete), ka solia tale ga vei ira era lako vata tiko. 5Sa qai kaya tale ga vei ira ko koya, “Sa Turaga tale ga ni Siga ni Vakacecegu na Luve ni Tamata.” 6E na dua tale na Siga ni Vakacecegu e a curu ki na valenilotu ko Jisu ka vakatavuvuli kina. E a tiko kina e dua na tamata sa mate tu na ligana i matau. 7Era sa qai vakaraici koya na daunilawa kei ira na Farisi, se na veivakabulai e na Siga ni Vakacecegu se sega, me rawa ni ra kunea kina e dua na ka me ra beitaki koya kina. 8Ia sa kila na nodra vakanananu ko koya, sa qai kaya vua na tamata liga mate, “Tu cake, mai tu e loma donu” Sa qai tucake sara ko koya ka la'ki wavu tu e kea. 9Sa qai kaya vei ira ko Jisu, “Au tarogi kemuni mada: sa tara beka me caka na ka vinaka e na Siga ni Vakacecegu se na ka ca, na veivakabulai se na veivakamatei?” 10Sa qai vakawadravi ira wavoki kece ga ko koya, ka kaya vua na tamata tauvimate, “Dodoka mai na ligamu .” A sa kitaka vaka kina ko koya ka sa vakabulai sara na ligana. 11Ia era sa qai cudru vakalevu sara, ka ra veivosaki vakai ira se cava me ra cakava vei Jisu. 12E na dua na gauna koya e a lako cake kina ko Jisu ki na ulunivanua me la'ki masu, ka a masu tiko vua na Kalou e na bogi taucoko ka la'ki siga vaka. 13Ia ni sa siga na vanua, sa qai kacivi ira vata vua na nona tisaipeli, ka sa digitaka mai vei ira e lewe tinikarua, ka vakatokai iratou me ratou i apositolo: 14ko Saimoni ko koya ka a vakayacana me ko Pita, kei Adriu na tacina, ko Jemesa kei Joni, ko Filipi, kei Pacolomiu, 15ko Maciu kei Tomasi, kei Jemesa na luve i Alifio, kei Saimoni sa vakatokai na Gugumatua, 16kei Jutasa na luve i Jemesa, kei Jutasa Isikarioti, ka koya ka a qai bukiveretaki koya. 17Sa qai lako vata sobu ko Jisu kei iratou na nona apositolo kei na dua na i wase levu ni nona tisaipeli; ka la'ki tu e na dua na vanua buca. Era a lewe vuqa sara na tamata mai Jutia taucoko kei Jerusalemi, kei na baravi kei Taia kei Saitoni era lako yani kina me ra rogoci koya, ka vakabulai tale ga mai na kedra mate. 18Ko ira tale ga era dau vakaleqai mai vei ira na yalo velavela era sa vakabulai. 19Era a saga kece ga na lewe vuqa me ra tarai koya, ka ni sa taka tiko mai vua na kaukauwa mana ka ra sa vakabulai kece kina. 20Sa qai rai vei ira na nona tisaipeli ko Jisu ka kaya: “Ko ni sa kalougata na dravudravua, ni sa nomudou na matanitu ni Kalou. 21“Ko ni sa kalougata na viakana tiko edaidai, ni ko ni na vakamamautaki. “Ko ni sa kalougata na tagi tiko edaidai, ni ko ni na dredre. 22“Ko ni sa kalougata ni ra cati kemuni na tamata, ni ra wasei kemuni tani mai na nodra i soqosoqo, ka vakasewasewani kemudou ka vakarogocataka na yacamudou e na vuku ni Luve ni Tamata! 23Mo ni reki e na siga koya ka rika e na marau; ni sa ka levu na kena i sau vei kemuni mai lomalagi; ni ra a kitaka vaka kina na nodra qase vei ira na parofita. 24“Ia ko ni sa kalouca na vutuniyau, ni ko ni sa taura oti tu na veika ni nomudou vakacegu. 25“Ni ko ni sa kalouca na sa mamau tu edaidai, ni ko ni na qai viakana ga. “Ni ko ni sa kalouca na dredre tiko e daidai, ni ko ni na rarawa ka tagi. 26“Ni ko ni sa kalouca ni ra vosavakavinakataki kemuni na tamata kece ga, ka ni ra a kitaka vaka kina na nodra qase vei ira na parofita vakailasu. 27“Ia au sa kaya vei kemuni na vakarorogo tiko, lomani ira na nomuni meca, caka vinaka vei ira era cati kemuni; 28vosa vinaka vei ira era vosacataki kemuni, ka masulaki ira era vakacacani kemuni. 29Ni sa sabica na balumu e dua, vagolea tale ga vua na kena i karua, ka kakua ni bureitaka na nomu sote vei koya sa kauta tani na nomu kote. 30Mo solia vei ira kece era mai kerekere vei iko na ka era vinakata, ka kakua ni taroga tale na nomu i yau vei koya sa kauta tani. 31Mo ni kitaka vei ira na tamata me vaka na ka ko ni sa vinakata me ra kitaka vei kemuni na tamata. 32“Ia kevaka ko ni dau lomani ira ga era lomani kemuni, a cava mo ni vakalougatataki kina? Ni ko ira sara tale mada ga na tamata i valavala ca era dau kitaka vaka kina. 33Ia kevaka ko ni caka vinaka vei ira ga era caka vinaka vei kemuni, a cava mo ni vakalougatataki kina? Ni ra sa dau kitaka tale ga vaka kina na tamata i valavala ca. 34Kevaka ko ni dau soli i lavo vei ira ga ko ni nuitaka ni ko ni na rawata tale mai kina na i lavo, a cava mo dou vakalougatataki kina? Ko ira tale ga na tamata i valavala ca era dau veisolisoli vakai ira me ra na qai taura lesu tale na ka e tautauvata kei na ka era a solia. 35Ia mo ni dau lomani ira na nomuni meca, ka caka vinaka ga, ka dau solia na ka, ka sega ni namaka e dua na ka mo ni rawata tale mai kina; e na qai levu kina na kena i sau vei kemuni, ka mo ni na qai luve i Koya sa Cecere Sara; ni sa dau lomasoli ko koya vei ira era sega ni dau vakavinavinaka, kei ira era dau nanumi ira ga vakai ira. 36Mo ni dau yalo loloma me vaka sa dau yalo loloma na Tamamudou. 37“Mo ni kakua ni dau veivakalewai, e na qai sega ni lewai kemuni na Kalou; mo ni kakua ni dau veibeitaki, e na qai sega ni beitaki kemuni na Kalou; mo ni dau veivosoti, ka na qai vosoti kemuni na Kalou. 38Mo ni dau solisoli ka na dau soli ka vei kemuni na Kalou - e dina, e na sinai vutuvutu na nomuni i vakarau, ka na tabaki sobu, ka kurekuretaki; ka ra na lulutu e so ki ra e na kena vuabale; e na sega ni caka rawa na ka e na sovaraki yani ki lomaseremuni. Ka ni na vakayagataka tale vei kemuni na Kalou na i vakarau ko ni a vakayagataka e na nomuni soli ka vei ira na tamata.” 39Sa qai cavuta vei ira e dua na vosa vakatautauvata ka kaya: “E rawa li vua na mataboko me tubera na mataboko? E rau na sega beka ni lutu ruarua ki na i keli? 40E sega ni dua na tisaipeli me uasivi cake vua na nona qasenivuli, ia ko koya yadua sa vakaotia vakavinaka na nona vuli sa na qai tautauvata kei na nona qasenivuli. 41“Na cava ko raica ga kina na mala ni kau e na mata ni wekamu ka sega ni raica rawa na tolo ni kau e tiko e matamu? 42Se ko na kaya rawa vakacava vua na wekamu, ʻNa wekaqu, me'u leuta tani mada na mala ni kau e tiko e matamu,ʼ ia ko iko ko sega tiko mada ga ni raica na tolo ni kau ka tiko ga e matamu? Tamata dauveivakaisini, mo biuta tani mada na tolo ni kau mai na matamu ko na qai rai vinaka mo leuta tani kina na mala ni kau e na matai na wekamu. 43“Ni sa sega ni dua na kau vinaka me vuataka na vua ca, se na kau ca me vuataka na vua vinaka. 44Ni sa kilai ga na kau yadua e na vuana. E sega ni dau veti na lolo mai na wa vakavotona, se veti na vua ni vaini mai na soni. 45Sa dau kauta mai na ka vinaka na tamata vinaka mai na lololo vinaka ni lomana, ka dau kauta mai na ka ca na tamata ca mai na lololo ca ni lomana; ni sa dau vosataka na gusuna na ka sa sinai kina na lomana. 46“Na cava ko ni vakatokai au kina me, ʻTuraga, Turaga, ka sega ni muria na noqu vosa? 47O koya yadua e lako mai vei au, ka rogoca na noqu vosa ka cakava, au na vakaraitaka vei kemuni na tamata e tautauvata kaya. 48E tautauvata ko koya kei na tamata e tara e dua na vale, ka kelivaka vakatitobu, ka vakayavutaka e na dela ni vatu. Sa qai yaco mai na ualuvu, ka sa coka vakaukauwa na dobui, ka tabaka e na vale koya, ia e a sega ga ni yavalati rawa ni sa tara tu vakavinaka. 49Ia ko koya sa rogoca ka sega ni cakava sa tautauvata kei na tamata e tara na vale e na dela ni qele ka sega na kena yavu, sa qai coka vakaukauwa na dobui, ka mani bale sara kina, ka sa ka levu na bale ni vale koya”

will be added

X\