LUKE 5

1E na dua na gauna e a tueake tu ko Jisu e na bati ni drano ko Kenisereti. Era sa qai sosovi koya yani na tamata me rogoca na vosa ni Kalou. 2Sa qai raica ko koya e rua na waqa ni rau kele koto, voleka e na bati ni drano; ia e ratou yali kina na gonedau ni ratou se la'ki vuya tiko na nodratou lawa. 3Sa mani vodoka e dua na waqa ko koya, na nei Saimoni, ka kerei koya me tosoya vakalailai ki wai. Sa qai tiko sobu ko Jisu ka vakatavulici ira na lewe vuqa. 4Ni sa tinia na nona vosa sa qai kaya vei Saimoni, “Sudra yani ki na wai titobu ka vakasobura na nomudou lawa me rawa e so na ika.” 5Sa qai kaya vua ko Saimoni, “Turaga, keitou a sasaga tiko e na bogi taucoko ko sega na ka e rawa! Ia e na vuku ga ni nomuni vosa, au sa na vakasobura kina na lawa” 6Ia ni ratou sa kitaka vaka kina, sa ka levu sara na ika e ratou sa tagava mai; ka sa tekivu me bote na nodratou lawa. 7E ratou sa qai yalovi iratou na nodratou i tokani e na waqa kadua me ratou la'ki vukei iratou. E ratou sa qai lako ko iratou koya, ka vakasinaita ruarua na waqa, me yacova ni rau sa voleka ni luvu. 8Ia ni sa raica ko Saimoni Pita na ka oqo, sa cuva sobu e na yava i Jisu, ka kaya, “Mo ni lako tani vei au, Turaga, ni'u sa tamata i valavala ca!” 9Ni sa kurabui ko koya kei iratou kece e ratou tiko vata kaya, e na vuku ni qele ni ika vakaitamera e ratou sa rawata. 10Sa vaka tale ga kina vei Jemesa kei Joni, ko i rau na luve i Sepeti, ka rau i tokani i Saimoni. A sa kaya ko Jisu vei Saimoni, “Kakua ni rere, me tekivu oqo ko sa na dau qolivi ira na tamata.” 11Ia ni ratou sa kauta rawa ga na waqa ruarua ki vanua, e ratou sa biuta sara na ka kece ga ka muri koya. 12E na dua na gauna e a tiko voli ko Jisu e na dua na koro; e a tiko tale ga e kea e dua na tamata e robota tu na yagona na vukavuka. Ni sa raici Jisu ko koya, sa qai cuva vakatoboicu ka masuti koya, ka kaya, “Turaga, kevaka ko ni sa vinakata sa rawa mo ni vakasavasavataki au!” 13Sa qai dodoka na ligana ko Jisu ka tarai koya, ka kaya, “Au sa vinakata! Mo savasava mai!” Sa mani takali sara mai vua na vukavuka. 14Sa qai vakarota vua ko koya me kakua ni tukuna vua e dua, “ia mo la'ki vakaraitaki iko ga vua na bete, ka vakacabora na nomu i soro mo vakasavasavataki kina, me vaka e vakarota ko Mosese, me i vakadinadina vei ira na tamata.” 15Ia sa qai kuruvaki vakalevu sara kina na kena i rogorogo, ka ra lewe vuqa sara era soqo vata vua me ra vakarogoci koya, ka vakabulai tale ga mai na kedra mate. 16Sa dau lako ko koya ki na vanua lala, ka masu kina. 17E na dua na siga ni a vakatavuvuli tiko ko Jisu, era a dabe tale tiko ga kina e so na Farisi kei na qasenivuli ni lawa, ka ra cavutu mai na veikoro kece mai Kalili kei Jutia kei Jerusalemi. A sa tu vua na kaukauwa ni Turaga me veivakabulai kina. 18E ratou sa qai lako yani e so na tamata, ka ratou colata tiko yani e na i mocemoce e dua na tamata tauvi paralasi. E ratou a saga me ratou kauti koya sara ki loma, ka vakadavora e na mata i Jisu. 19Ia ni ratou sa sega ni kunea rawa e dua na sala ki loma e na vukudra na lewe vuqa, e ratou sa qai cabe ki na dela ni vale. Ia ni ratou sa kilica laivi e so na vatu buli ka caka tu kina na dela ni vale, e ratou sa qai tukuca sobu na tauvimate e na nona i mocemoce ka tauca e na mata i Jisu. 20Ni sa raica na nodratou vakabauta ko Jisu, sa qai kaya, “Na wekaqu, sa bokoci na nomu i valavala ca.” 21Era a tekivu vaqaqa e lomadra ko ira na daunilawa kei ira na Farisi ka ra kaya, ʻO cei e mai vosa vakacacataka tiko oqo na Kalou? E sega tale ni dua e rawa ni bokoca na i valavala ca, na Kalou duadua ga!” 22Ia ni sa kila ko Jisu na nodra vakanananu, sa qai sauma, ka kaya vei ira, “Na cava ko ni vaqaqa tiko kina e lomamuni na ka oqo? 23E vei e rawarawa cake, me kainaki, ʻSa bokoci na nomu i valavala ca,ʼ se me tukuni, ʻTu cake, ka lakoʼ? 24Ia mo ni kila rawa kina ni sa tu na kaukauwa vua na Luve ni Tamata e vuravura me bokoca na i valavala ca.” Sa qai kaya ko koya vua e tauvi paralasi, “Au sa kaya vei iko, tucake taura na nomu i mocemoce, ka lako ki nomudou.” 25E a tucake sara ko koya e matadra, ka taura na ka e a davo koto kina, ka lako sara ki na nona vale, ka vakalagilagia tiko na Kalou. 26Era sa qoroqoro kece ga, ka ra vakalagilagia na Kalou; ka sa curumi ira tale ga na rere ka ra kaya, “Sa veivakurabuitaki dina na ka eda raica edaidai!” 27Ni oti koya sa lako sara ko Jisu ka kunea e dua na daukumuni i vakacavacava, na yacana ko Livai. A dabe toka ko koya e na vale ni kumuni i vakacavacava, ka sa kaya vua ko Jisu, “Muri au mai!” 28Sa qai biuta sara na ka kece ga ko koya, ka cavutu ka muri koya. 29Sa qai cakava e dua na magiti levu ko Livai e na nona vale, ka ra lewe vuqa na daukumuni i vakacavacava kei ira tale e so era tiko kina me ra kana. 30Ia era sa qai vosa kudrukudrutaki iratou na tisaipeli ko ira na Farisi kei ira na nodra daunilawa, ka ra kaya, “A cava ko dou kana ka gunu vata kina kei ira na daukumuni i vakacavacava kei ira na tamata i valavala ca?” 31Sa qai sauma ko Jisu ka kaya vei ira, “E sega ni yaga na vuniwai vei ira na bula vinaka, vei ira ga na tauvimate; 32au sega ni lako mai me'u kacivi ira na yalododonu me ra veivutuni, ko ira ga na i valavala ca, me ra veivutuni.” 33Era sa qai kaya vei Jisu e so na tamata, “Era dau lolo ka masu vakavuqa ko ira na tisaipeli i Joni, kei na nodra tisaipeli tale ga na Farisi, ia na nomuni e ratou dau kana ga ka gunu .” 34Sa qai kaya ko Jisu vei ira, “E rawa li mo dou lewa me ra lolo na weka ni tagane vou e na gauna e tiko voli kina kei ira na tagane vou? 35Ia e na yaco mai na gauna e na kau tani kina mai vei ira na tagane vou, era na qai lolo e na gauna koya.” 36Sa qai tukuna tale vei ira e dua na vosa vakatautauvata: “E sega ni dua e dresuka mai e dua na tikina mai na i sulu vou me mai botana kina e dua na i sulu madra; ke caka vaka kina, e na kadresu wale ga na ka vou, ka na sega ni rau sota na tikina vou kei na ka makawa. 37E sega tale ga ni dua me vakataloca na waini vou, ki na tavaya kuli ni manumanu madra; ke kitaka vaka kina, e na vakacabotetaka na tavaya na waini vou, ka na tasova na waini, ka na vakacacani tale ga na tavaya. 38Ia sa dodonu ga me vakataloci na waini vou ki na tavaya vou. 39E sega ni dua na tamata me sa gunuva oti na waini makawa me qai vinakata tale na waini vou; ni na kaya ko koya, ʻE daumaka cake ga na ka makawa.”

will be added

X\