LUKE 4

1Sa sinai tu ko Jisu e na Yalo Tabu ni sa lesu tale mai na Joritani. A sa vakauti koya na Yalo Tabu ki na loma ni vanua lala. 2A sa veretaki koya na tevoro ka siga vasagavulu. A sega ni bau kania e dua na ka e na veisiga koya ko koya, ia ni sa oti sa qai viakana. 3Sa qai kaya vua na tevoro, “Kevaka ko sa Luve ni Kalou dina, mo kaya mada me vuki na vatu oqo me i buli madrai” 4Sa qai kaya vua ko Jisu, “Sa volai tu, ʻE na sega ni bula na tamata e na madrai duadua ga.ʼ” 5Sa qai kauti koya cake na tevoro ki na dua na vanua cecere ka vakaraitaka vua na veimatanitu kece ga e vuravura e na dua vata ga na tiki ni gauna. 6Sa qai kaya vua na tevoro, “Au na solia vei iko na lewa ni ka kece ga oqo kei na kedra lagilagi, ni ra sa soli oti tu vei au, ka'u sa dau volia vei ira yadua sa lomaqu me'u solia vei ira. 7O koya gona kevaka ko na cuva ka vakarokoroko vei au, sa na nomu kece ga oqo.” 8Sa qai sauma ko Jisu ka kaya vua, “Sa volai tu, ʻMo vakarokoroko vua na Turaga na nomu Kalou ka qaravi koya duadua ga.ʼ” 9Sa qai kauti koya ki Jerusalemi na tevoro ka vakaturi koya e na taba ni Valenisoro e cake sara, ka kaya vua, “Kevaka ko sa Luve ni Kalou dina, mo rika sobu mada e ke, 10ni sa volai tu, ʻE na vakaroti ira na nona agilosi ko koya e na vukumu me ra taqomaki iko.ʼ 11Sa volai tale ʻEra na tabei iko cake e na ligadra, de tavutu na yavamu e na dua na vatu.ʼ” 12Sa qai sauma ko Jisu ka kaya vua, “Sa kainaki oti, ʻMo kakua ni temaka na Turaga na nomu Kalou.ʼ” 13Ia ni sa vakaotia na nona veitemaki kece ga na tevoro sa qai biuti koya me yacova e dua tale na kena gauna vinaka. 14Sa mani lesu tale ko Jisu e na kaukauwa ni Yalo Tabu ki Kalili, ka sa rogovaki yani na kena i tukutuku ki na veivanua kece ka tu vakavolivolita. 15A sa veivakatavulici e na nodra veivalenilotu, ka ra sa vakalagilagi koya kece ga. 16Sa qai yaco ko Jisu ki Nasareci, e na koro ka a susugi kina, ka la'ki curu ki na valenilotu, me vaka sa dau nona i vakarau, e na vei Siga ni Vakacecegu. Sa mani tucake me wili vola, 17ka sa soli vua na i vola i Aisea na parofita. Sa qai tevuka na i vola vivigi ka kunea na tikina oqo: 18“Sa tu vei au na Yalo ni Turaga, ni sa lumuti au ko koya me'u vunautaka na i tukutuku vinaka vei ira na dravudravua. Sa talai au ko koya me'u vunautaka na veisereki vei ira na bobula kei na rai tale vei ira na mataboko, me'u vakalalagataki ira era sa buturaki tu, 19me'u vunautaka na gauna vinaka ni Turaga.” 20Sa qai viviga na i vola ka solia tale vua e dau maroroya, ka dabe sobu; ka sa coba vakadua vua na matadra kece era tiko e valenilotu. 21Sa qai kaya vei ira ko koya, “Edaidai, sa vakayacori kina na tiki ni Vola Tabu oqo e na daligamuni .” 22Era a vakacaucautaki koya kece, ka ra kurabuitaka na vosa loloma e basika mai gusuna, ka ra kaya, “E sega li ni ko koya oqo na luve i Josefa?” 23Sa qai kaya vei ira ko koya, “Io, ko ni na cavuta kina vei au na i vosavosa oqo, ʻVuniwai, mo vakabulai iko mada; na veika kece keimami sa rogoca ni ko dau cakava mai Kapenaumi, cakava tale ga e na nomu vanua oqo!ʼ” 24Sa kaya tale ko koya, “Au sa kaya kina sara vei kemuni, e sega ni dua na parofita me vinakati e na nona vanua. 25“Ia me'u tukuna vakadodonu sara vei kemuni, era a lewe vuqa tu na yada e Isireli e na gauna i Ilaija, ni a sogo tu na lomalagi me sega kina ni tau na uca e na tolu na yabaki ka ono na vula, ka a dausiga vakalevu na vanua taucoko; 26ia e a sega ni talai ko Ilaija vua e dua vei ira, ki vua ga e dua na yada mai Sarifaci e na yasayasa vaka-Saitoni. 27Era a lewe vuqa tale ga na vukavuka e Isireli e na gauna i Ilaisa na parofita, ia e sega ni dua vei ira e a bau vakasavasavataki, ko Neamani ga na kai Siria” 28Ia ni ra sa rogoca tiko na veika oqo ko ira kece e na valenilotu era sa cudru sara. 29Era sa qai tucake mai ka dretaki koya ki na i bili ni koro, ka kauti koya cake ki na bati ni delana e tara toka kina na nodra koro me ra la'ki biligi koya sobu e na bari ni vatu. 30Ia e a mani curu maliwai ira ga ko koya ka lako tani sara. 31Sa qai gole sobu ko Jisu ki Kapenaumi, e dua na koro mai Kalili, ka vakatavuvuli kina e na Siga ni Vakacecegu, 32ka ra sa kurabui sara e na nona i vakavuvuli, ni sa vosa me vaka sa nona ga na lewa. 33E a bau tiko tale ga e na valenilotu e dua na tamata e curumi koya tiko e dua na tevoro se yalo velavela. Sa qai kaila mai ko koya e na domo levu ka kaya, 34“Oilei! Jisu na kai Nasareci, na cava ko ni via cakava vei keimami? Ko ni sa mai vakawabokotaki keimami li? Au sa kilai kemuni, oi kemuni na nona Le Dua Yalosavasava na Kalou!” 35Ia sa qai karaci koya ko Jisu ka kaya, “Galu! Biuti koya!” Ia ni sa bitalaki koya oti na tevoro e na kedra maliwa, sa qai biuti koya, ia e a sega ga ni vakamavoataki koya. Era sa qoroqoro kece ga ka veivosakitaka vakai ira ka kaya. 36“A kaukauwa cava beka e tiko e na vosa ni tamata oqo? Ni a vakatalai ira ga na yalo velavela e na nona lewa kei na nona sau, ka ra a lako tani sara!” 37Sa qai kuruvaki na kena i rogorogo ki na veiyasana kece ga e vakavolivolita na vanua koya. 38Sa tucake ka biuta na valenilotu ko koya ka la'ki curu ki na vale i Saimoni. E a tauvi katakata sara tiko vakaukauwa na tina i wati Saimoni, ka ratou sa mani tukuna vua. 39Sa qai la'ki tu e fikina ko Jisu, ka vakatala laivi na katakata, ka sa mani takali sara vua. Sa tucake sara ko koya ka qaravi iratou. 40Ia ni sa la'ki dromu tiko na siga, era sa qai lako yani vua na tamata ka kauti ira yani na dui wekadra ka tauvi ira tu na veimataqali mate e vuqa; a sa tarai ira yadudua ko koya ka vakabulai ira. 41Era sa lako tani tale ga na tevoro mai vei ira e lewe vuqa, ka ra a qoqolou ka kaya, “Sa i kemuni ga na Luve ni Kalou!” Ia sa qai karaci ira ko koya, ka sega ni laivi ira me ra vosa, ni ra sa kila ni sa Karisito ko koya. 42Ia ni sa kida na mataka, sa lako ko koya ki na dua na vanua lala. Era sa qai vakasaqarai koya ko ira na tamata, ka ra mani yaco sara vua, ka via tarovi koya me kakua ni laivi ira. 43Ia sa mani kaya vei ira ko koya, “E dodonu me'u vunautaka tale ga na i tukutuku vinaka ni matanitu ni Kalou e na veikoro tale e so, ni sa i koya oqo na i naki ni noqu talai mai” 44A sa vunau voli ko koya e na veivalenilotu e Jutia.

will be added

X\