LUKE 24

1Ia e na i matai ni siga ni macawa, e na mataka caca sara, e ratou sa qai lako na yalewa ki na i bulubulu, ka kauta kina na i saluwaki boi vinaka e ratou a sa vakarautaka tu. 2E ratou a kunea ni sa vaqiqici tani tu na vatu mai na i bulubulu; 3ia ni ratou sa curu kina, e ratou a sega ni kunea na yago ni Turaga ko Jisu. 4Ia ni ratou se kurabui tu ga vaka koya, e rau sa tu sara e yasadratou e lewe rua na tamata, ka sa ramase tu na nodrau i sulu. 5E ratou sa rere vakalevu ka mai cuva sobu tu yani. E rau sa qai kaya na tamata koya vei iratou, “Na cava ko dou mai vakasaqarai koya kina sa bula e na kedra maliwa na mate? 6Sa sega e ke ko koya, sa tucake tale! Dou nanuma na nona vosa vei kemudou ni a sa tiko voli kei kemudou mai Kalili, 7koya ni na soli yani na Luve ni Tamata ki na ligadra na tamata ca, ka na lauvako e na kauveilatai, ka tucake tale e na i katolu ni siga” 8E ratou sa qai nanuma na nona vosa; 9ka ratou sa lako tani mai na i bulubulu ka tukuna na veika kece koya vei iratou na lewe tinikadua, kei ira na kena vo. 10Ko iratou ka a la'ki tukuna na veika koya vei iratou na i apositolo, sa i iratou ko Meri na yalewa ni Makitala, kei Joana, kei Meri na tina i Jemesa, kei iratou tale e so ka ra tiko vata voli. 11Ia e a vaka e i tukuni wale ga vei iratou na i apositolo, na i tukutuku koya ka ratou a sega kina ni vakadinata. 12Ia sa qai tu cake ko Pita ka cici ki na i bulubulu; sa cuva sobu ka rai ki loma, ka raica na i sole lineni ni sa koto wale ga. A sa lesu tale ki na koro, ka sa kurabuitaka na veika sa yaco. 13E na siga vata tiko ga koya e rau a lako tiko kina e rua vei iratou ki na koro ko Emeo, rauta e tinakadua na kilomita mai Jerusalemi. 14E rau a veitalanoataka tiko na veika kece ga ka sa qai yaco oti. 15Ia ni rau sa veitalanoa ka veisoli vakasama tiko, sa toro voleka vei rau ko Jisu ka mai lako vata sara yani kei rau. 16E a vakabuwawataki na matadrau me rau kakua ni kilai koya. 17Sa qai kaya vei rau ko koya, “Na cava soti ko drau veitalanoataka yarayara tiko oqo?” E rau sa mani tu vakadua, ka sa rarawa na matadrau. 18Sa qai sauma na nona vosa e dua vei rau, ko Kaliopasa na yacana, ka kaya, “O iko duadua beka ga ko vulagi e Jerusalemi ka sega ni kila na veika e sa qai yaco wale ga kina oqo?” 19Sa qai kaya vei rau ko koya, “Na cava soti?” E rau sa qai kaya vua, “Na veika e baleti Jisu na kai Nasareci. O koya e dua na parofita, a tamata kaukauwa e na cakacaka kei na vosa e na mata ni Kalou kei na matadra kece ga na tamata. 20Era a soli koya na bete levu kei ira na neimami turaga me la'ki lewai me mate, ka ra a mani vakota ki na kauveilatai. 21Ia keimami a nuitaka tu ni sa i koya sara ga e na mai sereki Isireli. Sa i koya tale ga oqo na i katolu ni siga mai na kena a yaco na veika koya. 22Ia keimami a kurabui sara vakalevu e na ka e ratou a mai tukuna e so vei ira na neimami yalewa. E ratou a tiko mai na i bulubulu e na mataka caca, 23ka ratou a sega ni kunea kina na yagona. E ratou sa qai lesu tale mai, ka mai kaya ni ratou a raica votu e so na agilosi, ka ra kaya vei iratou ni sa bula tiko ko koya. 24E ratou sa qai lako ki na i bulubulu e so vei ira ka keimami tiko vata ka kunea me vaka sara ga na ka e ratou sa kainaka oti na yalewa; ia e ratou a sega ga ni raici koya.” 25Sa qai kaya vei rau ko koya, “Drau sa sesewa dina, ka berabera ni vakabauta na veika kece era a tukuna na parofita! 26E sega li ni sa dodonu ga me sota kaya mada na veika rarawa oqo na Karisito, ka me qai curu ki na nona i serau?” 27Sa qai serelaka vei rau ko koya na veika e tukuni tu me baleti koya e na i Vola Tabu taucoko, me tekivu mai na i Vola i Mosese ka yaco vei ira kece na parofita. 28Ia ni ratou sa volekata yani na koro e ratou lako tiko kina, sa lako sara ko Jisu me vaka e via lako sivita. 29Ia e rau sa qai tarovi koya, ka kaya, “Tou sa moce mada ga, ni sa yakavi mai na vanua ka sa voleka ni dromu na siga” Sa mani curu kina ka tiko vata kei rau. 30Ni ratou sa tiko me ratou kana, sa qai taura na madrai ko koya ka vakalougatataka, ka dovia, ka solia vei rau. 31Sa qai lau na matadrau, ka rau sa qai kilai koya sara; ia e a takali sara vakasauri mai vei rau ko koya e na tiki ni gauna koya. 32E rau sa qai veikayaka vakai rau, “E sega li ni a katakata na lomadaru e na gauna e a vosa tiko vei kedaru mai gaunisala, ni a serelaka tiko vei kedaru na i Vola Tabu?” 33E rau sa qai tu cake e na tiki na gauna vata ga koya ka lesu tale ki Jerusalemi. E rau a kunei iratou na lewe tinikadua ni ratou soqoni tiko kei ira e so ka ra dau tiko vata kei iratou. 34E ratou sa qai kaya vei rau, “Sa tucake dina na Turaga, ka sa rairai oti vei Saimoni!” 35E rau sa qai tukuna tale ga na ka e a yaco e na gaunisala, kei na nodrau qai kilai koya ni sa dovia tiko na madrai. 36Ia ni rau sa vosa tiko ga vaka koya, sa tu sara ko Jisu e na kedra maliwa. 37Eratou sa qai kidroa ka rere, ka nanuma ga ni ratou sa raica e dua na yalo. 38Sa qai kaya vei iratou ko koya, “A cava ko dou taqaya kina, ka tubu kina na vakatitiqa e lomamudou? 39Dou raica na ligaqu kei na yavaqu, sa i au ga oqo; tarai au, ka raica ni sega ni dau vakalewe se vakasui na yalo, me vaka dou sa raica vei au.” 40Ni sa kaya oti vaka koya, sa qai vakaraitaka vei iratou na ligana kei na yavana. 41la ni ratou sa sega tiko ga ni vakabauta e na vuku ni nodratou reki, kei na vakatataro ni lomadratou, sa mani kaya kina vei iratou, ko koya, “E tiko vei kemudou e so na ka me laukana?” 42E ratou sa qai solia vua e dua na tiki ni ika tavu. 43Sa qai taura ka kania sara e matadratou. 44Sa qai kaya vei iratou ko koya, “Oqo ga na ka au a dau kaya ni'u a sa tiko vata voli kei kemudou, ni na yaco ga na veika kece ka a volai tu me baleti au e na Lawa i Mosese, kei na nodra i vola na parofita kei na Same.” 45Sa qai dolava na nodratou vakasama me ratou kila na i Vola Tabu, 46ka kaya vei iratou, “Sa volai tu vaka oqo, ni sa kena dodonu me sota kaya na rarawa na Karisito, ka qai tu cake tale mai na mate e na i katolu ni siga, 47ka me vunautaki na veivutuni kei na bokoci ni valavala ca e na yacana ki na veimatanitu kece ga, me tekivu e Jerusalemi. 48Dou sa i vakadinadina ni veika oqo ko i kemudou. 49Dou kila, au sa vakarau tala vei kemudou na ka e a yalataka ko Tamaqu; ia dou tiko mada ga e na koro oqo, me yacova ni dou sa vakasulumi e na kaukauwa mai cake” 50Sa qai kauti iratou tani mai Jerusalemi ka yaco sara ki Pecani, ka sa dodoka cake kina na ligana ka vosa vakalougatataki iratou. 51Ia ni sa vosa vakalougatataki iratou tiko ga, sa takali sara mai vei iratou ka sa kau cake ki lomalagi. 52Eratou sa qai vakarokoroko vua ka lesu tale e na marau levu ki Jerusalemi, 53ka ratou sa dau la'ki tiko ga e na Valenisoro me ratou vakavinavinaka tiko kina vua na Kalou.

will be added

X\