LUKE 20

1E na dua na siga ni a vakatavulici ira tiko na tamata e na Valenisoro ko Jisu ka vunautaka tiko na i Tukutuku Vinaka, era sa qai lako yani na bete levu kei ira na daunilawa, kei ira na qase, 2ka kaya vua, “Tukuna mai vei keimami se na kaukauwa cava ko vakayacora tiko kina na veika oqo, se ko cei e a solia vei iko na kaukauwa oqo” 3Sa qai sauma vei ira ko koya, ka kaya, “Au na tarogi kemuni tale ga e na dua na taro, ni tukuna mada mai, 4e vu li mai lomalagi na veipapitaisotaki i Joni, se vu ga mai vei ira na tamata?” 5Era sa qai veivosakitaka vakai ira, ka kaya, “Kevaka eda kaya, ʻMai lomalagi,ʼ e na qai kaya ko koya, ʻA cava ga ko ni a sega ni vakabauti koya kina?ʼ 6Ia kevaka eda kaya, ʻMai vei ira na tamata,ʼ era na vakaviriki keda na tamata kece ga e na vatu, ni ra sa vakabauta dina ni a dua na parofita ko Jom.” 7Era sa qai kaya ni ra sega ni kila se a vu mai vei. 8Sa qai kaya vei ira ko Jisu, “Au na sega tale ga ni tukuna, se na lewa i cei au vakayacora tiko kina na veika oqo.” 9Sa qai tekivu ko Jisu me tukuna vei ira na tamata na vosa vakatautauvata oqo. “E a tea e dua na tamata e dua na loga ni vaini, ka lisitaka vei ira e so na dauteitei, ka lako ki na dua na vanua tani ka la'ki dede tu kina. 10Ia ni sa yaeova na kena gauna, sa qai tala na i taukei ni were e dua na tamata ki vei ira na tauri qele me ra solia vua e so na vua ni loga ni vaini; ia era a qai mokuta ka vakatalai koya tani, ka sega ni solia vua e dua na ka. 11Sa qai tala e dua tale na tamata ko koya, ka ra a mokuta tale ga ka vakamaduataka, ka vakatalai koya tani, ka sega tale ga ni solia vua e dua na ka. 12Sa qai tala na kena i katolu ko koya; ka ra a vakamavoataki koya tale ga ka vakasava lesu. 13Sa qai kaya na i taukei ni loga ni vaini, ʻNa cava beka me'u cakava? Au sa na tala na gone ni toka, de ra na mani dokai koya.ʼ 14Ia ni ra sa raici koya na tauri qele, era sa qai veivosaki vakai ira ka ra kaya, ʻO koya oqo e na kena i taukei mai muri; me da vakamatea, me na qai noda na veika e na nona.ʼ 15Era sa qai biliraki koya tani mai na loga ni vaini ka vakamatea. “Na cava beka e na qai cakava vei ira na i taukei ni loga ni vaini? 16E na lako yani ka vakamatei ira sara na tauri qele, ka soli na loga ni vaini vei ira e so tale” Ni ra sa rogoca koya, era sa kaya, “Me kakua sara!” 17Ia sa qai vakaraici ira ko koya, ka kaya, “Sa qai cava beka na i balebale ni tiki ni Vola Tabu oqo? ʻNa vatu sara ga era a cata na matai, sa qai yaco me i vakadei e na tutu ni vale.ʼ 18O koya yadua e lutu e na dela ni vatu koya e na dasila kina, ia ko koya e na lutuka e na vurumemea me vaka na nuku” 19Era a tovolea na daunilawa kei ira na bete levu me ra vesuki koya e na tiki ni gauna vata ga koya, ni ra kila rawa ni a vosataki ira ko koya e na vosa vakatautauvata koya. Ia era a rerevaki ira ga na tamata. 20Era sa mani qai vakaraici koya lo tiko, ka tala e so me ra veretaki koya. Era la'ki lasutaka ni ra tamata dodonu, me rawa kina ni ra toboka na ka e tukuna, me ra soli koya kina ki na vakatulewa kei na kaukauwa ni kovana. 21Era sa mani tarogi koya ko ira ka talai, ka kaya, “Vakavuvuli, keimami kila ni ko ni dau vosa ka vakatavuvuli vakadodonu, ka sega ni dau totaka e dua, ia ko ni dau vakatavuvulitaka vakadodonu ga na sala ni Kalou. 22Sa tara li vei keda me da soli vakacavacava vua na Sisa se sega?” 23Ia sa kila rawa ko koya na nodra i lawaki ka mani kaya vei ira, 24“Vakaraitaka mada mai vei au e dua na i lavo siliva. Na mata i cei kei na yaca i cei e tu kina?” Era sa kaya, “A nona na Sisa.” 25Sa qai kaya vei ira ko koya, “Sa vinaka, ni solia vua na Sisa na ka sa nona na Sisa, ka solia vua na Kalou na ka sa nona na Kalou .” 26Sa mani sega ni rawa, me ra toboki koya e na matadra na tamata e na dua na ka e kaya; ia era qoroqoro ga e na nona vosa, ka galu. 27Era sa qai lako vua e so na i tokani i Setoki, ko ira era kaya ni sega na tucake tale mai na mate, 28ka tarogi koya ka kaya, “Vakavuvuli, e a vola tu vei keda ko Mosese, kevaka sa mate na tuakana e dua na tagane, ka a vakawati ka sega na luvena, me qai vakawatitaka na watina ko tacina me so kina na gone me ra wili vua na tuakana. 29Ia e na dua na gauna e ratou a tiko e lewe vitu na veitacini. E a vakawatitaka e dua na yalewa ko koya na i matai, ka mani mate ka sega na luvena. 30E vaka kina ko koya na i karua. 31Sa qai tauri koya na i katolu, ka vaka kina ko iratou kece na lewe vitu; e ratou mate kece ka sega na luvedratou. 32Sa qai mate tale ga e muri na yalewa. 33Ia ni sa yaco na tucake tale mai na mate, e na qai wati cei na yalewa koya? Ka ni ratou a lewe vitu na a vakawatitaki koya!” 34Sa qai kaya vei ira ko Jisu, “Era sa dau vakawati ka veimusumusukitaki me ra vakawati na gone ni vuravura oqo; 35ia ko ira sa ganiti ira me ra rawata yani na vuravura vou kei na tucake tale mai na mate, era na sega ni vakawati se veimusumusukitaki me ra vakawati. 36Ni ra sa na sega tale ni mate. Era sa na tautauvata kei ira na agilosi. Era sa na luve ni Kalou, ni ra sa na tucake tale mai na mate. 37Ia na nodra vakaturi cake tale na mate, e a sa vakatakila sara tale ga ko Mosese e na tiki ni vola ka baleta na vunikau kama, e na tikina sa vakatoka kina ko koya na Turaga me Kalou i Eparaama, ka Kalou i Aisake, ka Kalou i Jekope. 38Sa sega kina ni nodra Kalou na mate ko koya, sa nodra ga na bula. Vua na Kalou e sega ni dua na tamata e sa mate.” 39Era sa qai sauma e so vei ira na daunilawa ka kaya, “Na i Vakavuvuli, sa vinaka sara na nomuni vosa” 40A ra sa sega tale ni doudou me ra taroga vua e dua na ka. 41Sa qai kaya vei ira ko Jisu, “Era kainaka rawa ga vakaevei ni luve i Tevita na Karisito? 42Ni ko Tevita mada ga vakai koya e kaya e na i Vola ni Same, ʻSa kaya na Turaga ki vua na noqu Turaga: Mai dabe e na yasaqu i matau 43me yacova ni'u sa vakamalumalumutaki ira na nomu meca me ra i tutu ni yavamu.ʼ 44Sa vakatokai koya ko Tevita me ʻTuragaʼ; ia me qai luvena tale vakacava?” 45Ia ni ra vakarorogo tiko na lewe vuqa, sa qai kaya ko koya vei iratou na nona tisaipeli, 46“Dou qarauni kemudou mai vei ira na daunilawa, ka ni ra dau vinakata na lako voli e na i sulu balavu, ka taleitaka na veivakabulataki e na vanua ni veivoli, kei na i dabedabe e cake e na veivalenilotu, kei na veitikotiko vakaturaga e na gauna ni kana magiti. 47Era kovea vakailawaki na nodra veivale na yada dravudravua, ka ra veivakaisini wale ga e na nodra masu balavu. Na ka oqo e na bibi vakalevu cake sara kina na kedra i totogi”

will be added

X\