LUKE 2

1E na gauna ko ya sa vakarota na tui ko Akusito me caka e dua na wili lewenivanua e na matanitu taucoko. 2Oqo na i matai ni wili lewenivanua vaka oqo ka a vakayacori donuya na gauna e Kovana tiko kina mai Siria ko Kirinio. 3Era a dui lako kece na tamata ki nodra koro me ra volai kina. 4E a lako cake tale ga ko Josefa mai Kalili, mai na koro ko Nasareci, ki Jutia, ki na koro i Tevita, na yacana ko Peceliema; ni rau mataqali vata kei Tevita, ka kawa mai vua. 5E rau la'ki volai vata kei Meri, ko koya ka sa musuki tu vua me watina, ka sa bukete tiko. 6E na gauna e rau tiko kina mai ke ya, sa mani yaco na siga me vakasucu kina. 7Sa mani vakasucuma na nona ulumatua gone tagane, ka sa viviraki vua na i sulu ni gone ka vakadavora e na nodra i kanakana na manumanu; ni sa sega na tiki ni bure ni vulagi e lala me ratou tiko kina. 8E ratou a tiko voli e na vanua veico e na yasayasa ko ya e so na i vakatawa ni sipi, ka ratou veivuke vakatawa sipi tiko e na bogi. 9Sa qai rairai vei iratou e dua na agilosi ni Turaga, ka cila vakavolivoliti iratou na i serau ni Turaga; ka ratou sa rere vakalevu sara kina. 10Sa qai kaya vei iratou na agilosi, 'Dou kakua ni rere, dou rogoca mada, au sa kauta tiko mai vei kemudou e dua na i tukutuku vinaka, ka ra na reki vakalevu kina ko ira kece ga na tamata, 11ni sa sucu vei kemuni edaidai, e na koro i Tevita, na i Vakabula, ko koya na Karisito, na Turaga! 12Oqo na kena i vakatakilakila vei kemudou: dou na kunea na gone ni sa viviraki tu vua nai sulu ni gone, ka davo koto e na nodra i kanakana na manumanu.” 13E ratou qai kidacala ni sa rairai vata mai kei na agilosi ko ya e dua na i lala levu mai lomalagi, ka ra sa vakacaucautaka na Kalou, ka kaya, 14“Sa nona na Kalou na lagilagi e na veiyasana cecere sara, ka sa veisaututaki rawa e vuravura ko ira sa vinakata ko koya. Sa lomani ko ira na tamata!'' 15Ia ni ra sa biuti iratou na agilosi, ka lesu tale ki lomalagi, e ratou sa qai veikayaka vakai iratou na i vakatawa ni sipi, “Tou laki ki Peceliema, ka la'ki raica na veika sa qai yaco oqo, me vaka sa vakaraitaka oti vei kedatou na Turaga.” 16E ratou sa mani lako vakatotolo sara yani, ka kunei Meri kei Josefa kei na gone ni davo koto e na nodra i kanakana na manumanu. 17Ia ni ratou sa raici koya, e ratou sa qai tukuna na vosa e a tukuni vei iratou me baleta na gone ko ya. 18Era sa kurabui kece ga ko ira era sa rogoca na veika e ratou tukuna ko iratou na i vakatawa ni sipi. 19A taura matua sara na ka kece ga ko ya ko Meri, ka vakananuma voli e lomana. 20E ratou sa mani lesu tale na i vakatawa ni sipi, ka ratou sa vakarokorokotaka, ka vakacaucautaka na Kalou e na vuku ni veika kece ga e ratou a rogoca ka raica; era a yaco kece me vaka e a tukuni vei iratou. 21Ni sa oti na bogi walu me qai cilivi kina na gone, sa mani vakatokai me yacana ko Jisu, me vaka ga ka a vakatoka na agilosi ni sa bera ni kunekunetaki. 22Ia ni sa oti na gauna ni vakasavasava-taki i tinana me vaka e tu e na Lawa i Mosese, e rau sa qai kauta na gone ki Jerusalemi me rau vakacabori koya vua na Turaga. 23Me vaka ga e volai tu ena lawa ni Turaga, “Ni gone tagane kece ga e sucu ulumatua, era na vakatabui me ra nona na Turaga.” 24Ia, me rau vakacabora tale ga na i soro me vaka na ka e kaya na lawa ni Turaga ko ya, “me rua na soqe, se rua na luve ni ruve.” 25Ia e tiko voli mai Jerusalemi e na gauna ko ya e dua na tamata yalo dodonu ka lotu dina, a yacana ko Simione. Sa bula ka waraka wale tu ga ko koya na nodra vakacegui na Isireli, ka sa tiko vua na Yalo Tabu. 26E a sa vakatakila oti vua na Yalo Tabu, ni bera ni mate e na raica mada na Karisito ni Turaga. 27A sa vakauqeti koya na Yalo Tabu ka sa lako ki na Valenisoro, ia ni rau sa kauta kina na gone ko Jisu ko i rau na nona qase me caka vua na valavala ni Lawa, 28sa qai keveti cake e ligana ka vakavinavinaka vua na Kalou, ka kaya, 29“Kemuni na Turaga, ni qai laiva na nomuni tamata me lako e na vakacegu me vaka na nomuni vosa. 30Ni sa qai raica na mataqu na vu ni bula mai vei kemuni, 31o koya ko ni sa vakarautaka e matadra na tamata kece ga: 32Na rarama me vakararamataki ira na veimatanitu tani, ka me nodra lagilagi na nomuni tamata na Isireli!'' 33Ia e rau sa kurabui ko tamana kei tinana ena vuku ni veika sa tukuni me baleti koya. 34Sa qai vosa vakalougatataki rau ko Simione ka kaya vei Meri na tinana, “Raica, na gone oqo sa lesi me ra tarabe kina ka vakaduri tale ga kina e lewe vuqa e Isireli. Sa na i vakatakilakila mai vua na Kalou ko koya ka ra na lewe vuqa era na vosa vakacacataka, 35me vakavotui kina na nanuma vuni ni lomadra. E na laubasikata tale ga na yalomu na i seleiwau.” 36E tiko tale ga e ke ya e na gauna ko ya e dua na parofita yalewa; a yacana ko Ana, ka luve i Fanueli e na yavusa i Aseri. E a sa qase sara ko koya. A vakawati e na gauna ni nona gone yalewa donu, ka rau a tiko vata voli kei na watina me vitu na yabaki, 37ia oqo sa yada tu ka yabaki walusagavulukava. E sega ni dau lako tani mai na Valenisoro ko koya ni sa dau lotu, ka lolo ka masu e na siga kei na bogi. 38E a baci cabe kina e na tiki ni gauna ga ko ya ka la'ki vakavinavinaka vua na Kalou, ka tukuni koya vei ira kece era waraka tiko na vakabulai nei Jerusalemi. 39Ia ni rau sa qarava oti na veika kece me vaka e tu e na lawa ni Turaga, e ratou sa lesu tale ki Kalili, ki na nodratou koro ko Nasareci. 40Saqai tubu cake na gone me levu ka kaukauwa mai; sa sinai e na vuku, ka sa tu vua na loloma ni Kalou. 41E rau dau lako na qase i Jisu e na veiyabaki ki Jerusalemi ki na Kanavata ni Lakosivia. 42Ena gauna sa yabaki tinikarua kina ko koya, e ratou a lako ki Jerusalemi, me vaka ga na kena i vakarau. 43Ia, ni sa oti na Kanavata me ratou sa lesu tale, e a mani tiko laivi ga na gone ko Jisu mai Jerusalemi, ka rau sega ni kila na nona qase. 44Ia ni rau sa nanuma ga ni tiko ko koya e na dua na mata i lakolako ka ra lako vata tiko, e rau sa mani lako tu ga e na dua na siga ka bogi. E rau sa qai vakasaqarai koya vei ira na kai nodrau kei ira era veikilai kei rau; 45ia ni rau sa sega ni kunei koya, e rau sa qai lesu tale ki Jerusalemi ka la'ki vakasaqarai koya kina. 46Ni sa oti e tolu na siga, e rau sa qai kunei koya, e na Valenisoro ni dabe tiko e na kedra maliwa na i vakavuvuli, ka vakarogoci ira tiko ka vakatarogi ira tale ga. 47Era a kurabui ko ira kece era rogoci koya ena nona vuku kei na nona i sau ni taro. 48Ni rau sa raici koya ko i rau na nona qase, e rau sa kurabui, ka sa kaya vua ko tinana, “Na luvequ, a cava ko cakava kina vaka oqo vei keirau? Raica, keirau sa vakasaqarai iko tiko kei tamamu ka keirau sa nuiqawaqawa vakalevu.” 49Sa qai kaya vei rau ko koya, “Na cava ko drau vakasaqarai au kina? Drau sega ni kila ni sa dodonu me'u tiko e na vale nei Tamaqu?” 50Ia e rau a sega ni kila rawa na i balebale ni vosa e cavuta vei rau ko koya. 51Sa qai lako sobu vata kei rau ko koya ka yaco ki Nasareci; sa dau talairawarawa vei rau, ka sa maroroya e lomana na vosa kece ga ko ya ko tinana. 52A sa tubu cake tiko ga me levu ko Jisu, ka sa toro cake tiko ga na nona vuku; a sa vinakati koya vakalevu na Kalou ka vaka tale ga kina ko ira na tamata.

will be added

X\