LUKE 18

1Sa qai tukuna ko Jisu vei ira na tisaipeli e dua na vosa vakatautauvata, me ra dau masu tiko ga kina ka kakua ni cegu koso. 2“E a tiko e na dua na koro e dua na turaganilewa ka sega ni dau rerevaka na Kalou se dokai ira na tamata. 3E tiko tale ga e na koro koya e dua na yada ka dau lako wasoma yani mai vua, ka kaya, ʻMo ni vakadinadinataka mada na noqu dodonu vua na noqu meca.ʼ 4E na dua na gauna balavu e a sega ni via cakava kina ko koya e dua na ka, ia e muri sa qai kaya e lomana, ʻE dina ga ni'u sega ni rerevaka na Kalou se doka na tamata, 5ia e na nona vakasosataki au ga na yada oqo, au sa na vakadodonutaka kina na ka e baleti koya, de na qai vakaocai au ga e na nona lakolako tiko ga mai.ʼ” 6Sa qai vakuria na Turaga ka kaya, “Dou rogoca vinaka na ka e kaya na turaganilewa tawa dodonu koya. 7Ia e na sega li ni na vakadodonutaka na Kalou na ka e baleti ira na nona digitaki era dau tagi vua e na siga kei na bogi? E na berabera li na nona veivuke? 8Au sa kaya vei kemudou, e na vakadodonutaka vakatotolo sara na ka e baleti ira. Ia ni sa lako mai na Luve ni Tamata e na kunea li e vuravura na vakabauta?” 9Sa qai tukuna tale ga na vosa vakatautauvata oqo ko Jisu vei ira e so era vakabauti ira ga vakai ira ni ra sa tamata dodonu, ka beci ira na tani. 10“E rau a lako cake ki na valenisoro e lewe rua na tamata me rau la'ki masu: e dua e Farisi, ka dua e daukumuni i vakacavacava. 11“Sa tu na Farisi ka masu vakai koya vaka oqo, ʻKemuni na Kalou, au vakavinavinaka vei kemuni ni'u sa sega ni vakataki ira na tani, era dau kocokoco, era dau veivakaisini, ka ra dauyalewa; au sega tale ga ni vakataki koya na daukumuni i vakacavacava koya. 12Au dau lolo vakarua e na veimacawa, ka'u dau solia na i katini ni veika kece au rawata.ʼ 13“Ia e a tu vakayawa ga yani na daukumuni i vakacavacava, ka sega mada ga ni tacake rawa ki lomalagi; e a tavia ga na lomaserena e na loma rarawa, ka kaya ʻKemuni na Kalou, ni lomani au mai na tamata i valavala ca!' 14Au sa tukuna vei kemudou, ni a lako sobu ki na nona vale na tamata koya ka sa vakadonui, ka sega ga ko koya kadua; ni ko koya yadua e vakalevulevui koya e na vakalolovirataki, ia ko koya e vakalolovirataki koya e na vakalevulevui” 15Era a qai kauti rra yani na gone lalai e so na tamata ki vei Jisu me tarai Ira. Ia ni ratou sa raica na tisaipeli, e ratou sa qai karalaki ira. 16Ia e a kacivi rra ga vua na gone ko Jisu, ka kaya, “Laivi rra na gone lalai me ra lako mai vei au, ka kakua ni tarovi rra, ni sa nodra na gone vaka oqo na matanitu ni Kalou. 17Au sa kaya vakaidina vei kemudou, ko koya e na sega ni ciqoma na matanitu ni Kalou me vaka na gone lailai e na sega ni curu kina .” 18A qai tarogi koya e dua na turaga ka kaya, “Vakavuvuli vinaka, na cava me'u cakava me'u taukena kina na bula tawa mudu?” 19Sa qai kaya vua ko Jisu, “Na cava ko vakatokai au kina me'u vinaka? E sega ni dua e vinaka, na Kalou duadua ga. 20Ko sa kila na i vakaro: ʻKakua ni ia na veibutakoci, kakua ni laba, kakua ni butako, kakua ni veibeitaki vakailasu. Vakarokoroko vei rau na tamamu kei na tinamu” 21Sa qai kaya ko koya, “A veika kece ga oqori au sa dau muria tiko mai na gauna au a se gone kina ka yacova mai oqo.” 22Ni sa rogoca koya ko Jisu sa qai kaya vua, “E dua ga na ka e sa vo tiko vei iko. Volitaka na ka kece ga e tu vei iko, ka veivotayaka vei ira na dravudravua na kena i lavo; ko na qai vakaiyau mai lomalagi. Ia ko iko, mo lako mai ka muri au.” 23Ia ni sa rogoca koya ko koya sa rarawa sara na lomana ni sa rui levu na nona i yau. 24Ia ni sa raica ko Jisu, sa kaya, “Sa dredre dina vei ira na vutuniyau me ra curu ki na matanitu ni Kalou! 25Ni sa rawarawa cake me curuma na mata ni cula na kameli, ka dredre me curuma na matanitu ni Kalou na tamata vutuniyau” 26Era sa qai kaya ko ira ka rogoca, “Ko cei beka ga e na qai vakabulai rawa?” 27Sa qai kaya ko koya, “Na ka sa sega ni rawa vei ira na tamata, sa rawa vua na Kalou.” 28Sa qai kaya vua ko Pita, “Ni raica, keitou sa biuta na veika kece ga e neitou ka muri kemuni” 29Sa qai kaya vei iratou ko koya, “Au sa kaya vakaidina vei kemudou, e sega ni dua na tamata e sa biuta na nona vale, se watina, se tuakana se tacina, se ko i rau na nona i tubutubu, se ko ira na luvena e na vuku ni matanitu ni Kalou, 30me na qai sega ni rawata vakalevu cake na ka e na bula oqo, ka vaka kina na bula tawa mudu e na gauna sa bera mai .” 31Sa qai kauti iratou na lewe tinikarua ko Jisu, ka kaya vei iratou, “Raica, tou sa vakarau lako cake ki Jerusalemi, ka sa na la'ki vakayacori kina na veika kece ga era a vola tu na parofita me baleta na Luve ni Tamata. 32E na soli ko koya vei ira na kai tani, ka na vakalialiai, ka vakamaduataki, ka kasiviti. 33Era na vakanakuitataka ka vakamatea, ia e na tucake tale ko koya e na i katolu ni siga” 34Ia e ratou a sega ni kila rawa e dua na ka koya na tisaipeli. E a vunitaki vei iratou na i balebale ni vosa koya, ka ratou a sega kina ni kila rawa na ka e tukuni. 35Sa voleka sara yani ki Jerrko ko Jisu. E a dabe toka e na yasa ni sala e dua na tamata mataboko, ka kerekere fiko. 36Ia ni sa rogoci ira na lewe vuqa ni ra sa lako tiko e yasana, sa taro ka kaya, “A cava koya?” 37Era sa qai kaya vua, “E lako tiko mai oqo ko Jisu na kai Nasareci” 38Sa qai kaci ko koya ka kaya, “I Jisu, na Luve i Tevita, ni lomani au mai!” 39Era sa qai karaci koya ko ira na fiko e liu, ka kaya vua me tiko lo; ia sa qai kaci vakalevu cake ga kina ko koya, ka kaya, “Na Luve i Tevita, ni lomani au mai!” 40A sa tu vakadua ko Jisu, ka vakarota me kau yani vua ko koya. Ia ni sa lako voleka yani vua, sa qai tarogi koya ka kaya, 41“Na cava ko vinakata me'u cakava vei iko?” Sa qai kaya ko koya, “Turaga, me'u rai rawa.” 42A sa kaya vua ko Jisu, “Mo rai rawa! Sa vakabulai iko na nomu vakabauta!” 43A sa mani rai rawa sara ko koya, ka muri Jisu, ka vakacaucautaka tiko na Kalou. Ia ni ra sa raica ko ira na tamata kece ga, era sa qai vakavinavinaka vua na Kalou.

will be added

X\