LUKE 17

1Sa qai kaya vei iratou na nona tisaipeli ko Jisu, “E na yaco dina ga na veivakacalai, ia sa na kalouca ko koya e vakavuna! 2E na vinaka cake vua kevaka e a vakarubeci e domona e dua na vatu i qaqi levu, ka biu ki wasawasa, ka ca ni vakacala e dua vei ira na lalai oqo. 3Dou qarauni kemudou vinaka! “Kevaka e cala vei iko e dua na wekamu, vunauci koya; ia kevaka sa veivutuni, kakua ni cudruva. 4Ia kevaka e cala vakavitu vei iko ko koya e na dua na siga, ka saumaki vakavitu vei iko, ka kaya, ʻAu sa veivutuni,ʼ ia kakua ni cudruva.” 5E ratou sa qai kaya na i apositolo vua na Turaga, “Ni vakalevutaka na neitou vakabauta!” 6Sa qai kaya na Turaga, “Kevaka e tu vei kemudou na vakabauta lailai sara me vaka na sore ni musita, e rawa mo dou kaya ki na vunilolo oqo, ʻCavu i vuvu mai, ka la'ki tei e na loma ni wasawasa,ʼ e na talarrawarawa vei kemudou na vunilolo. 7“E na dua beka vei kemudou e siviyara trko na nona tamata, se vakatawa sipi, e na kaya vua ni sa lesu mai e na cakacaka, ʻLako sara mai, ka dabe mo kana!' 8E na sega beka ni kaya vua, ʻVakarautaka na qau i vakayakavi, vauca na wa ni tolomu, ka qaravi au me'u kana mada ka gunu, ka oti ko na qai kana ka gunuʼ? 9E na vakavinavika li ko koya vua na tamata koya ni sa vakayacora na ka e vakaroti vua? 10Me vaka tale ga krna ko i kemudou, ni dou sa vakayacora na ka kece ga ka a vakaroti vei kemudou, dou kaya, ʻE sega na ka keitou uasivi cake krna ko i keitou mai vei Ira na kena vo ni tamata; ni keitou sa vakayacora ga na ka sa neitou i tavi me keitoucakava.” ʼ 11E na i lakolako i Jisu ki Jerusalemi, e a lakova kina na loma i Samaria kei Kalili. 12Ia ni sa curu ko koya ki na dua na koro, e a sota kina kei na lewe tini na tamata vukavuka. E ratou tu vakayawa tu yani; 13ka ratou kaci vua ka kaya, “I Jisu, na Turaga, ni lomani keitou mai!” 14Ia ni sa raici iratou ko koya, sa kaya vei iratou, “Dou la'ki vakaraitaki kemudou vei ira na bete” Ni ratou sa lako tiko ga e ratou sa vakabulai. 15Ia ni sa raica e dua vei iratou ni sa vakabulai, sa lesu tale vua, ka vakacaucautaka na Kalou e na domo levu. 16A sa cuva sobu vakatoboicu e na mata i Jisu, ka vakavinavinaka vua. Ia e kai Samaria na tamata koya. 17Sa qai kaya ko Jisu, “E sega li ni lewe tini e ratou a vakasavasavataki? E ratou sa i vei ga na lewe ciwa? 18E sega tale ni dua e kune me lesu mai ka vakavinavinaka vua na Kalou, ko koya duadua ga na kai tani oqo” 19Sa qai kaya vua ko koya, “Tucake, ka lako, sa vakabulai iko na nomu vakabauta.” 20E na dua na gauna era a tarogi Jisu kina na Farisi se na yaco mai e na gauna cava na matanitu ni Kalou. E a qai sauma vei ira ko koya, ka kaya, “E na sega ni yaco mai na matanitu ni Kalou kei na i vakatakilakila e so me rawa ni laurai kina. 21Era na sega tale ga ni kaya, ʻRaica, sa i koya oqo! se sa i koya oya!' ka ni sa tu ga na matanitu ni Kalou e na lomamudou” 22Sa qai kaya vei iratou na tisaipeli ko koya, “E na yaco mai na siga dou na gadreva kina mo dou raica e dua na nona siga na Luve ni Tamata, ia dou na sega ni raica. 23Era na qai kaya vei kemudou, ʻRaica, e kea!' se ʻRaica, e ke!' Kakua ni lako, ka kakua ni muri ira. 24Me vaka ni sa tibi na livaliva ka cilava na lomalagi mai na dua na yasana ki na yasana kadua, sa na vaka tale ga kina na Luve ni Tamata e na nona siga. 25Ia e na vosota mada e liu ko koya na veika rarawa e vuqa, ka ra na besetaki koya na i tabatamata oqo. 26Me vaka e a yaco e na gauna i Noa, e na vaka tale ga kina e na gauna ni Luve ni Tamata. 27Era a kana tiko, ka gunu, ka vakawati, ka veimusumusuki me ra vakawati, ka yacova na siga sa vodoka kina na waqa ko Noa. Sa qai lako yani na waluvu ka vakarusai ira kece ga. 28E na tautauvata tale ga kei na gauna i Lote. Era a kana tiko, ka gunu, ka veivoli; era a teitei, ka tara vale. 29Ia e na siga e a biuti Sotoma kina ko Lote, e a tau mai lomalagi na bukawaqa kei na sulifure ka vakamatei ira kece ga. 30E na vaka koya e na siga sa na vakaraitaki mai kina na Luve ni Tamata. 31“E na siga koya, ko koya e tiko e na dela ni vale, ka tu na nona i yaya e loma ni vale, me kakua ni lako sobu me la'ki kauta mai; ka vaka kina ko koya e tu mai na vanua ni teitei, me sa kakua ni lesu tale ki vale. 32Dou nanuma na wati Lote! 33O koya e saga me maroroya na nona bula e na vakayalia, ia ko koya sa vakayalia na nona bula e na maroroya. 34Au sa tukuna vei kemudou, e na bogi koya e rau na davo tu e lewe rua na tamata e na dua na i davodavo, e na kau tani e dua, ka biu tu e dua. 35E rau na qaqi sila vata tiko e lewe rua na yalewa, e na kau tani e dua ka biu tu e dua. 36[E rau na tiko e na were e rua na tagane, e na kau tani e dua ka biu tiko e dua.]” 37E ratou sa qai kaya vua, “Ki vei koya, Turaga?” Sa qai kaya vei iratou, ko koya, “E na vanua ga e koto kina na yago, era na sosorata vata yani kina na manumanu vuka dau kana yago ni mate.”

will be added

X\