LUKE 16

1Sa qai kaya tale ga ko Jisu vei iratou na nona tisaipeli, “E a tiko kina e dua na tamata vutuniyau ka dua tiko na nona dauniyau. Sa qai beitaki vua na nona dauniyau ni sa vakayalia tiko na nona i yau. 2Sa qai kacivi koya ka kaya vua, ʻA cava au sa mai rogoca oqo me baleti iko? Solia mai e dua na i tukutuku ni nomu qarava na i yau, ni sa sega ni rawa mo dauniyau tiko ga.ʼ 3Sa qai vakananuma e lomana na dauniyau ka kaya, ʻNa cava beka me'u eakava ni sa vakarau kauta tani vei au na noqu turaga na cakacaka vakadauniyau? Au sega soti ni kaukauwa me'u rawata na cukicuki, ka'u madua ni kerekere. 4Oi au sa qai kila na ka me'u cakava, me rawa ni ra kauti au kina na tamata ki na nodra veivale ni'u sa sivo mai na cakacaka vakadauniyau.ʼ 5“Sa qai kacivi ira yadudua mai era dinau tu vua na nona turaga. Sa kaya vua na i matai, ʻE vica na nomu dinau vua na noqu turaga?ʼ 6A sa kaya ko koya, ʻE dua na drau na i vakarau waiwai.ʼ Sa qai kaya vua na dauniyau, ʻTaura na nomu i vola ni dinau, dabe ka vola sara me limasagavulu.ʼ 7Sa qai taroga e dua tale ko koya, ka kaya, ʻE vica na nomu dinau ko iko?ʼ Sa kaya ko koya, ʻE dua na drau na i vakarau sila.ʼ Sa qai kaya vua na dauniyau, ʻTaura na nomu i vola ni dinau ka vola me walusagavulu.ʼ 8“E a vakacaucautaki koya na dauniyau tawa dodonu na turaga koya, e na nona i vukivuki vuku; ni ra sa vuku vakalevu cake na gone ni vuravura oqo e na veika e baleti ira, ka sega soti ko ira na gone ni rarama. 9“Ka'u sa kaya vei kemudou, Dou vakayagataka na i yau vakavuravura me so kina na wekamudou, ia ni sa cagina na i yau me ra na qai kauti kemudou na wekamudou koya ki na veitikotiko tawa mudu. 10“O koya sa dina e na ka lailai, e na dina tale ga e na ka levu; ia ko koya sa sega ni dodonu e na ka lailai, e na sega ni dodonu tale ga e na ka levu. 11Ia kevaka dou sa sega ni dina e na i yau vakavuravura, ko cei e na nuitaki kemudou e na i yau dina? 12Kevaka tale ga dou sa sega ni dina e na ka e nona e dua tani, ko cei e na solia vei kemudou na ka e nomudou? 13“E sega ni dua na tamata e qarava rawa e rua na turaga; ni na cata e dua ka lomani koya ka dua; se ni na soli koya sara vua e dua ka beci koya ka dua. Dou na sega ni qaravi rau vata rawa na Kalou kei na i yau.” 14Ia ni ra sa rogoca koya ko ira na Farisi, era sa qai vosa vakacataki koya, ka ni ra sa dau domona na i lavo. 15Sa qai kaya vei ira ko koya, “Sa i kemuni ko ni sa dau vakadonui kemuni ga e matadra na tamata; ia sa kila na lomamuni na Kalou; ni sa ka vakasisila e na mata ni Kalou na ka e vakadokadokai vei ira na tamata. 16“E a sa tu na Lawa i Mosese kei na nodra volavola na parofita me yaco mai vei Joni na Dauveipapitaisotaki; mai kea, sa qai tekivu me vunautaki na matanitu ni Kalou, ka ra sa gu sara na tamata kece ga me ra curu kina. 17Ia sa rawarawa cake me takali laivi ko lomalagi kei vuravura, sa dredre ga me lutu wale e dua na tiki ni lawa lailai sara. 18“O koya yadua sa biuta na watina, ka la'ki vakawati kei na dua tale, sa dauyalewa ko koya; ia ko koya sa vakawatitaka e dua na yalewa sa biuti koya na watina, sa dauyalewa tale ga ko koya. 19“E a tiko e dua na tamata vutuniyau, ka dau vakaisulu e na i sulu lokaloka kei na lineni malumu, ka dau kana ka marau vakalevu tu ga e na veisiga. 20E a tiko tale ga e kea e dua na tamata dravudravua e na nona matavuvale. A yacana ko Lasarusa, ka robota tu na yagona na vidikoso. 21Sa dau garova ko Lasarusa me vakani e na meme ni kakana e lutu mai na teveli ni tamata vutuniyau. Era sa dau lako tale ga mai na koli ka vakadramica na nona vidikoso. 22“Sa mani mate na tamata dravudravua ka ra sa kauta na agilosi ki na lomasere i Eparaama. Sa qai mate tale ga na tamata vutuniyau ka bulu. 23A sa tacake mai Etesi ni sa vakararawataki tu ka raici Eparaama sara tu vakayawa, kei Lasarusa ni koto e lomaserena. 24A sa kaci ka kaya, ʻI Tamaqu Eparaama, lomani au mai, talai Lasarusa mada me tonia na mua ni nona i qaqalo e na wai ka mai vakabatabatataka na yamequ; ni sa ka levu na noqu rarawa e na vuku ni yameyame ni buka oqo!ʼ 25“Ia e a qai kaya ga ko Eparaama, ʻNa luvequ, nanuma tiko ni ko a dau taura na veika vinaka kece ga e na gauna ko a sa bula voli kina, ia e a vaka tale ga kina ko Lasarusa ni a taura na veika ca; ia oqo sa vakacegui e ke ko koya, ia ko iko sa vakararawataki. 26A kena i kuri, e tu oqo e na kedaru maliwa e dua na i keli vakaitamera, e dredre kina vei ira e ke me ra lako yani vei kemuni, ka sega tale ga ni dua me lako rawa mai keri vei keimami.ʼ 27Sa qai kaya kina ko koya, ʻIa au sa masuti iko, tamaqu Eparaama, mo talai koya ki na vale nei tamaqu, 28ni ratou lewe lima tiko na taciqu, me rawa ni la'ki vakasalataki iratou, de ratou na qai lako tale ga mai ki na vanua ni veivakararawataki oqo.ʼ 29“Ia sa qai kaya vua ko Eparaama, ʻSa tu vei iratou ko Mosese kei ira na parofita. Me ratou qai rogoci ira ga.ʼ 30A sa kaya ko koya, ʻE sega, tamaqu Eparaama, kevaka ga e dua mai vei ira na mate e lako vei iratou, e ratou na qai veivutuni.ʼ 31Sa qai kaya vua ko koya, ʻKevaka e ratou sa sega ni vakarogoci Mosese kei ira na parofita, e na sega tale ga ni rawai na lomadratou; veitalia sara mada ga ke mani tucake tale e dua mai na mate.ʼ”

will be added

X\