LUKE 15

1E na dua na siga era a lako vata yani vei Jisu ko ira na daukumuni i vakacavacava, kei ira na tamata i valavala ca, me ra vakarorogo ki na nona vosa. 2Era a qai vosa kudrukudru kina na Farisi kei ira na daunilawa ka kaya, “Na tamata oqo e dau veilasamaki kei ira na tamata i valavala ca ka kana vata kei ira.” 3Sa qai tukuna vei ira na vosa vakatautauvata oqo ko koya, ka kaya, 4“Kevaka e dua vei kemuni e dua na drau na nona sipi, ka qai yali e dua vei ira; e na sega li ni laivi ira tu na lewe ciwasagavulukaciwa e na vanua veico, ka la'ki vakasaqara na le dua ka yali me yacova sara ni sa kunea? 5Ia ni sa kunea, sa biuta ki na usouso ni domona ka colata lesu e na mamarau. 6Ni sa yaco ki na nona vale, sa qai kacivi ira vata yani na nona i tokani kei ira ka tiko voleka ka kaya vei ira, ʻMe da mai reki vata mada, ni'u sa kunea tale na noqu sipi ka a yali.ʼ 7Au sa kaya vei kemuni, e na vaka kina na levu ni reki mai lomalagi e na vukuna e dua bau ga na tamata i valavala ca sa veivutuni, ka sega soti e na vukudra na lewe ciwasagavulukaciwa na tamata yalo dodonu ka sega ni yaga me ra veivutuni. 8“Se kevaka e dua na yalewa e tini na nona tiki ni siliva ka qai vakayalia e dua, e na sega li ni tutuvaka na cina ka taviraka na vale, ka vakasaqara matua sara me yacova sara ni sa kunea? 9Ia ni sa kunea sa kacivi ira vata mai na nona i tokani kei ira ka tiko voleka, ka kaya, ʻMe da mai reki vata mada, ni'u sa kunea tale na tiki ni siliva ka'u a vakayalia.ʼ 10Au sa kaya vei kemuni ni sa tubu vaka kina na reki e na matadra na agilosi ni Kalou e na vuku ni dua bau ga na tamata i valavala ca sa veivutuni” 11Sa qai kaya tale ko Jisu, “E a tiko kina e dua na tamata ka lewe rua na luvena tagane. 12Sa qai kaya vei tamadrau ko koya e gone vei rau, ʻTamaqu, solia mada mai vei au na i votavota ni yau sa baleti au.ʼ Sa qai vota vei rau ko koya na i yau. 13Ni sa oti e vica na siga sa qai kumuna vata na nona ka kece ga na gone ka lako ki na dua na vanua yawa; ka vakasabusabutaka kina na nona i yau e na veimataqali marau ca. 14Ia ni sa vakayalia taucoko na nona i yau, sa qai tubu e dua na dausiga levu e na vanua koya, ka sa tekivu me leqa sara mai ko koya. 15Sa qai la'ki tiko kei na dua na lewe ni vanua koya; ka sa talai koya sara na tamata koya ki na nona i teitei me vakana vuaka kina. 16Sa dau garova ko koya me kania na kedra kakana na vuaka, me mamau kina; ka a sega ni bau dua na tamata me solia vua e dua na ka me kania. 17Ia ni sa qai vakilai yalona tale, sa kaya, ʻSobo! na kedra lewe vuqa na tamata cakacaka nei tamaqu; era kana ka mamau ka mai vo tu yani na kedra, ia ka'u sa mai mate tu e ke e na viakana! 18Au na tu ka lako vei tamaqu, ka'u na kaya vua, “Tamaqu, au sa i valavala ca ki lomalagi, e na matamuni tale ga. 19Sa sega ni ganita me'u vakatokai tale me'u luvemuni; ni okati au me'u vaka ga e dua na nomuni tamata cakacaka” ' 20Sa qai tu sara ko koya ka lako vei tamana. “Ia ni sa tu vakayawa tu ga yani, sa raici koya mai ko tamana, ka sa tuburi koya na loloma; ka sa qai cici yani vua, ka mokota ka reguca. 21Sa qai kaya na luvena vua, ʻTamaqu, au sa i valavala ca ki lomalagi, e na matamuni tale ga, ka sa sega ni ganita me'u vakatokai tale me'u luvemuni.ʼ 22Ia sa kaya ko tamana vei ira na nona tamata, ʻDou kauta vakatotolo mai na i sulu vinaka sara ka vakasulumi koya kina, ka daramaka e dua na mama e na nona i qaqalo, kei na i vava e na yavana. 23Dou la'ki mokuta tale ga mai na luve ni bulumakau uro, ka me da kana ka mamarau; 24ni a sa mate na luvequ oqo, ka sa qai bula tale; a sa yali, ka sa qai kune tale.ʼ Era sa qai vakatekivu me ra mamarau. 25“Ia e a tiko mai na vanua ni teitei na luvena ka qase. Ni sa lesu tale tiko ko koya ka sa lako voleka yani ki vale, sa rogoca sara na domo ni vakatagi kei na meke. 26Sa qai kaciva e dua vei ira na tamata ko koya, ka taroga se soqo ni cava ka yaco tiko koya. 27Sa qai kaya vua ko koya, ʻSa lesu tale mai na taeimuni, ka sa mokuta na tamamuni na luve ni bulumakau uro, ni rau sa veikune tale ka sa bula vinaka.ʼ 28“A sa cudru ko koya ka bese ni curu ki vale. Sa qai curu ki tuba ko tamana ka la'ki vakamasuti koya. 29Sa qai kaya vei tamana ko koya, ʻRaica, Tamaqu, e na veiyabaki kece oqo au cakacaka tu kina vei iko me vaka e dua na bobula, ka'u sega sara ni bau talaidredre ki na nomu lewa; ia ko sega ni bau solia vei au e dua wale mada ga na luve ni me, me'u marau vata kina kei ira na noqu i tokani. 30Ia ni sa lako ga mai na luvemu oqo, ko koya ka sa la'ki vakayalia na nomu i yau vei ira na yalewa dautagane, ko sa qai vakamatea vua na luve ni bulumakau uro!ʼ 31Ia sa qai kaya vua ko tamana, ʻNa luvequ, ko iko ko sa tiko vata voli ga kei au, ka sa nomu tu na veika kece ga e noqu. 32Sa dodonu ga me da marau ka reki, ni a sa mate na tacimu oqo, ka sa bula tale; e a sa yali, sa qai kune tale!ʼ “

will be added

X\