LUKE 14

1E na dua na Siga ni Vakacecegu, a la'ki kana e na vale ni dua na nodra i liuliu na Farisi ko Jisu, ka a vakaraici koya matua e so na tamata. 2E a qai lako yani vua e dua na tamata e tauvi koya tu na buketevatu. 3Sa qai vosa vei Ira na Farisi kei na daunilawa ko Jisu, ka kaya, “Sa tara li me caka na veivakabulai e na Siga ni Vakacecegu se sega?” 4Ia era a sega ni kaya rawa e dua na ka. Sa qai tauri koya ko Jisu ka vakabula ka kaya me lako. 5Sa qai kaya vei rra ko koya, “Ke dua vei kemuni e lutu ki na toyevu na luvena se na nona bulumakau e na Siga ni Vakacecegu, e na sega beka li ni la'ki vueta mai vakatotolo e na siga trko ga koya?” 6Era a sega ni sauma rawa na taro koya. 7Sa qai tukuna ko Jisu e dua na vosa vakatautauvata vei ira ka a sureti yani, ni sa raica na nodra digitaka ga na veitikina dokai; ka sa kaya vei ira, 8“Ni sa sureti iko e dua ki na dua na kana ni vakamau, kakua ni la'ki dabe e na dua na tikina dokai, de sa sureti tale ga e dua e cecere cake mai vei iko, 9ka na qai lako yani ko koya e a sureti kemudrau ka kaya vei iko, ʻVagalala mada me dabe e keri ko koya oqo,ʼ ko na qai madua ni ko sa na la'ki tiko e na tikina e ra sara. 10Ia ni ko sa sureti, la'ki tiko e na tikina e ra sara, me na qai lako mai ko koya ka sureti iko, ka na qai kaya vei iko, ʻNoqu i tokani, lako yani ki cake,ʼ ko na qai dokai e matadra kece ko ni tiko vata e na kana. 11O koya yadua e dau vakalevulevui koya e na vakalolovirataki, ia ko koya yadua e dau vakalolovirataki koya, e na vakalevulevui” 12Sa qai kaya tale ga ko Jisu vua na tamata ka a sureti koya, “Ni ko sa cakava e dua na magiti me i vakasigalevu se i vakayakavi, kakua ni sureti ira na nomu i tokani, se na tuakamu, se na tacimu, se ko ira na wekamu, se ko ira na kai nomu vutuniyau, de ra na sureti iko tale e muri me kena i dole, ka sa na saumi lesu kina vei iko. 13Ia ni ko sa caka magiti, sureti ira na dravudravua, na lokiloki, na gera, na mataboko; 14ko na qai kalougata kina, ka ni ra na sega ni dolea rawa vei iko. E na qai dolei vei iko ni ra sa tu cake tale mai na mate na yalododonu” 15Ia ni sa rogoca na ka oqo e dua vei ira ka ra kana vata tiko kei Jisu sa qai kaya vua, “Sa kalougata ko koya e na kana e na kanavata ka na caka e na matanitu ni Kalou!” 16Ia e a qai kaya vua ko koya, “E a cakava e dua na magiti levu ni kanavata e dua na tamata, ka sureti ira kina e lewe vuqa. 17Ia ni sa yaco na gauna me caka kina na vakayakavi, sa qai talai ira na nona tamata me ra tukuna vei ira ka sureti tu, ʻMo ni lako mai, ni sa vakarau oti tu na veika kece!' 18Ia era sa qai vakaiulubale kece. E a kaya na i matai ni tamata ki vua, ʻAu sa volia e dua na tiki ni vanua, ka sa dodonu me'u la'ki raica mada; au sa kerea mo vosota ni'u na sega ni lako yani!' 19E dua tale e kaya, ʻAu sa volia e tini na bulumakau, ka'u sa lako tiko me'u la'ki vakatovolei ira. Au kerea me'u vosoti kina.ʼ 20E dua tale e kaya, ʻAu sa qai vakamau wale ga oqo, sa i koya sa na sega kina ni rawa ni'u lako yani.ʼ 21“Sa qai lako na tamata koya ka tukuna na veika koya vua na nona turaga. A sa cudru vakalevu na i taukei ni vale, ka kaya vua na nona tamata, ʻLako vakatotolo ki na veigaunisala kei na veisaqata ni koro ka kauti ira mai na dravudravua, kei ira na gera, kei ira na mataboko, kei ira na lokiloki.ʼ 22Oti koya sa qai mai kaya tale na tamata koya, ʻSa vakayacori oti saka na nomuni lewa, ka sa vo ga na vale.ʼ 23Sa qai kaya vua na tamata koya na nona turaga, ʻLako ki na veigaunisala lelevu kei na veisala lalai, ka cikevi ira na tamata me ra lako mai, me sinai sara na noqu vale. 24Ni'u sa kaya vei kemudou, e na sega sara ni dua vei ira na sureti me na kania e dua na ka e na noqu i vakayakavi oqo!ʼ “ 25Era a salavata tiko kei Jisu e lewe vuqa sara, ka a vuki ko koya ka kaya vei ira, 26“Kevaka e lako mai vei au e dua na tamata ka sega ni uasivi cake na nona lomani au mai na nona lomani tamana, kei tinana, kei na watina, kei iratou na luvena, kei iratou na tuakana kei na tacina, kei iratou na ganena, io kei na nona bula sara tale ga ko koya, e na sega ni rawa me noqu tisaipeli. 27O koya tale ga e sega ni colata na nona kauveilatai ka muri au, e na sega ni rawa me noqu tisaipeli. 28“Se ko cei vei kemuni e via tara e dua na vale cecere, me na sega ni tiko sobu mada e liu ka cakacakataka na kena i sau, se na rauta na ka e tu vua me vakaotia kina se sega? 29De lakolako e na qai cakava rawa wale ga na kena yavu ka sa oti na i lavo. Era na qai vakalialiai koya ko ira kece ga ka raica, 30ka ra kaya, ʻE a tekivu tara vale na tamata oqo, ia sa sega ni rawa ni vakaotia.ʼ 31“Se ko cei na tui e la'ki vala kaya e dua tale na tui, me na sega ni tiko sobu mada e liu ka vakasamataka, se sa na rawa vua kei na nona lewe tini na udolu, me ra vala kaya na nona meca kei na nona ruasagavulu na udolu se sega? 32Ia kevaka e sega, e na tala ko koya e dua na mata ni sa yawa sara yani ko koya ka dua, me vakamasuta me rau veisaututaki. 33O koya gona e na sega kina ni rawa me noqu tisaipeli e dua vei kemuni kevaka e sega ni biuta tani na veika kece e tu vua. 34“E ka vinaka na masima, ia kevaka sa seyavu mai na masima e na kena tuituina, e na qai vakatuituinataki tale e na cava? 35Sa na qai tawa yaga ki na vanua se ki na i vakabulabula ni qele; ka ra sa na biuta tani ga na tamata. O koya e vakadaligana me rogo kina, me rogoca sara.”

will be added

X\