LUKE 13

1Era a tiko e so e na gauna vata koya, ka ra tukuna vei Jisu na ka e baleti ira na kai Kalili ka a bosoka vata ko Pailato na nodra dra kei na nodra i soro. 2Sa qai kaya vei ira ko Jisu, “Ko ni nanuma beka ni ra sa i valavala ca vakalevu cake ko ira koya vei ira na vo ni kai Kalili, ka ra mani sota kaya kina na veika rarawa koya? 3Au sa kaya vei kemuni, e segai; ia, kevaka ko ni sega ni veivutuni, ko ni na rusa kece ga vaka kina. 4Se ko ni nanuma beka ni ko ira na lewe tinikawalu ka a lutuki ira na doka ni vale cecere mai Sailoama ka vakamatei ira, era tamata ca cake sara mai vei ira kece na tani ka ra tiko e Jerusalemi e na gauna koya? 5Au sa kaya vei kemuni, E segai; ia, kevaka ko ni sa sega ni veivutuni, ko ni na mate kece tale ga vaka kina” 6Sa qai tukuna tale ga vei ira ko Jisu na vosa vakatautauvata oqo: “E dua na tamata e tea e na loma ni nona were ni vaini e dua na vunilolo. Ia ni sa lako me la'ki vakasaqara kina e so na vuana, e a sega ni kunea kina e dua. 7Sa qai kaya vua na i vakatawa ni vaini ko koya, ʻRaica, sa tolu na yabaki oqo na noqu dau lako tiko mai me'u mai vaqara na vua ni lolo oqo; ka sega ni'u sa bau kunea kina e dua na vuana. Taya laivi; na cava e mai vakamaumautaka wale tiko ga kina na vanua?ʼ 8Sa qai sauma vua ko koya, ka kaya, ʻNi laiva saka me yabaki tale mada ga oqo, me'u sa tei cukiraka vakavolivolita mada, ka biuta kina na i vakabulabula ni qele. 9Kevaka e mani vua e na yabaki ka tarava, sa daumaka; ia kevaka e sega, mo ni qai taya laivi.ʼ” 10E a veivakatavulici tiko e na dua na valenilotu e na Siga ni Vakacecegu ko Jisu. 11A tiko kina e dua na yalewa ka curumi koya tu e dua na yalo ka sa vakamalumalumutaki koya voli ka yabaki tinikawalu. Sa vakalairoro vakalevu sara ko koya ka sega ni duri cake rawa vakadodonu. 12Ia ni sa raici koya ko Jisu, sa kaciva ka kaya vua, “Yalewa, ko sa sereki mai na nomu malumalumu .” 13Sa qai tarai koya ko Jisu, ka sa tucake rawa sara vakadodonu ko koya ka vakacaucautaka na Kalou. 14Ia e a cudru kina na i liuliu ni valenilotu ni veivakabulai tiko ko Jisu e na Siga ni Vakacecegu. Sa qai kaya ko koya vei ira na tamata, “Sa tu e ono na siga me ia kina na cakacaka, mo ni lako mai kina mo ni vakabulai, ka kakua ga e na Siga ni Vakacecegu” 15A sauma vua na Turaga ka kaya, “O i kemudou na dauveivakaisini! E sega li ni ko ni dau sereki ira na nomuni bulumakau kei na asa e na Siga ni Vakacecegu mai na vale ni manumanu ka la'ki vagunuvi ira? 16E sega li ni dodonu vua na yalewa oqo, o koya e dua na kawa i Eparaama, ka sa vauci koya tu ko Setani ka sa yabaki tinikawalu, me sereki mai na i vau oqo e na Siga ni Vakacecegu?” 17Ia ni sa kaya na ka oya ko koya, era sa madua kece ga na nona meca, ka ra sa marau na tamata kece ga e na vuku ni veika talei sa cakava ko koya. 18Sa qai kaya tale ko Jisu, “E vaka tu beka evei na matanitu ni Kalou; me'u vakatautauvatana beka kei na cava? 19Sa tautauvata kei na dua na sore ni musita, sa taura e dua na tamata ka tea e na nona were, ka sa tubu ka yaco me dua na vunikau levu, ka ra sa caka sova na manumanu vuka e na veitabana” 20A sa kaya tale ko Jisu, “Me'u vakatauvatana na matanitu ni Kalou kei na cava? 21Sa tautauvata kei na i vakatubu, ka a taura e dua na yalewa, ka biuta ki na tolu na i vakarau falawa me yacova ni sa curuma vakavinaka kece na falawa koya na i vakatubu. 22A veilakoyaki voli ko Jisu e na veikoro lelevu kei na veikoro lalai, ka veivakatavulici tiko, ka lako tiko vaka ki Jerusalemi. 23Sa qai kaya vua e dua, “Turaga, era na lewe lailai wale beka ga era na vakabulai?” A sa kaya vei ira ko koya, 24“Ni gumatua sara mo ni curu e na katuba qiqo; ni'u sa kaya vei kemuni, e lewe vuqa era na saga me ra curu ki loma ka ra na sega ni rawata. 25Ni sa na tucake na i taukei ni vale, ka sogota na katuba, ko ni sa na qai tu ga e tautuba, ka tukituki e na mata ni katuba ka kaya, ʻTuraga, ni dolava mada vei keimami!' E na qai sauma vei kemuni ko koya, ka kaya, ʻAu sega ni kila se ko ni lako mai vei!' 26Ko ni na qai kaya, ʻKeimami a dau kana ka gunu e matamuni, ka ko ni a dau veivakatavulici e na neimami veigaunisala.ʼ 27Ia e na qai kaya ko koya, ʻAu sa kaya vei kemuni, au sega ni kila se ko ni lako mai vei; ni lako tani, ni ko ni tamata i valavala ca!' 28Ko ni na qai tagi ka vakasequruquru bati ni ko ni sa na raici Eparaama, kei Aisake kei Jekope kei ira na parofita e na matanitu ni Kalou, ia ko i kemuni ko ni sa biu tani ki tautuba. 29Ia era na lako mai na tamata mai na tokalau, kei na ra, mai na vualiku kei na ceva tale ga, ka ra na tiko me ra kana e na matanitu ni Kalou. 30Ka raica, e so era tu e muri era na liu, ka so era tu e liu era na muri” 31E na gauna vata koya era a lako mai eso na Farisi ka kaya vei Jisu, “Lako tani e ke, ni via vakamatei iko tiko ko Eroti” 32Sa qai kaya ko koya vei ira, “Ni la'ki tukuna vua na fokisi koya, me kila, au na vakasavi ira na tevoro ka veivakabulai fiko edaidai kei na siga ni mataka tale ga, ka'u na qai vakaotia na noqu cakacaka e na siga ka tarava. 33Ia sa dodonu me'u ia mada ga e na noqu i lakolako edaidai, ni mataka, kei na siga ka tarava; ni sa sega ni dodonu me mate e dua na parofita e na dua na vanua tani, mai Jerusalemi duadua ga. 34Isa, Jerusalemi! Jerusalemi! Ko iko ko a vakamatei ira na parofita, ka vakaviriki rra e na vatu ko Ira era a talai yani vei iko. Sa vakavuqa na noqu vakasoqoni ira vata na luvemu, me vaka na nona vakasoqoni rra vata na luvena na tina ni toa e na ruku ni tabana, ia ko ni a sega ga ni vinakata! 35Raica, sa biu wale tu ka laladidi na nomuni veivale. Ka'u sa kaya vei kemuni, ko ni na sega ni raici au tale me yacova ni ko ni na kaya, ʻSa kalougata ko koya sa lako mai e na yaca ni Turaga!ʼ “

will be added

X\