LUKE 12

1E na gauna koya, ni ra a soqo vata e vica vata na udolu na tamata, ka ra sa veidrigidrigi e na kedra lewe levu, sa qai tekivu me vosa ko Jisu. A vosa taumada vei iratou na nona tisaipeli ko Jisu, ka kaya, “Dou qarauni kemudou mai na nodra i vakatubu na Farisi, oya na nodra dau veivakaisini. 2E sega na ka e tabogo tu me na sega ni vakaraitaki; se vunitaki me na sega ni vakatakilai. 3Na veika kece dou a cavuta e na buto e na rogoci e na rarama, kei na ka dou a vakasolokakanataka e na veiyasana vuni e na kaeivaki e na veidela ni vale. 4“Au sa kaya vei kemudou na noqu i tokani, dou kakua ni rerevaki Ira era vakamatea na yago, ka sega ni cakava rawa tale e dua na ka e muri. 5Ia au na vakasalataki kemudou se ko cei mo dou rerevaka: dou rerevaki koya ga e tu vua na kaukauwa me veibiu ki eli ni sa veivakamatei oti, io, au sa kaya vei kemudou, dou rerevaki koya! 6“E sega li ni sau wale ga ni lima na siparo e rua na sede? Ia e sega ni dua bulu na siparo e bau guilecavi e na mata ni Kalou. 7Ia ko i kemudou, na drau ni ulumudou yadudua sara mada ga era wili. O koya gona mo dou kakua kina ni rere, ni dou sa bibi cake vua na Kalou mai vei ira na siparo e vuqa. 8“Au sa kaya vei kemudou, O koya yadua e vakatusai au e na matadra na tamata, e na vakatusai koya tale ga na Luve ni Tamata e na matadra na agilosi ni Kalou, 9ia ko koya e cakitaki au e na matadra na tamata e na cakitaki e na matadra na agilosi ni Kalou. 10“O koya yadua e vosa vakacacataka na Luve ni Tamata e na bokoci rawa na nona i valavala ca, ia ko koya e vosa vakacacataka na Yalo Tabu e na sega ni bokoci rawa na nona i valavala ca. 11“Ia ni ra sa kauti kemudou ki na veivalenilotu vei ira na i liuliu kei ira na daulewa, dou kakua ni lomaleqataka se dou na sauma vakacava na taro, se na cava mo dou kaya; 12ni na vakavulici kemudou na Yalo Tabu e na gauna sara ga koya e na ka e dodonu mo doukaya” 13E a qai kaya vei Jisu e dua vei ira na lewe vuqa, “Na i Vakavuvuli, ni vakaroti tuakaqu mada me solia vei au na noqu i votavota i yau mai vei tama i keirau.” 14Ia e a qai kaya vua ko koya, “Na wekaqu, ko cei sa lesi au me'u lewa ka vota na i yau vei kemudrau?” 15Sa qai kaya vei ira ko koya, “Ni yadra tiko ka qarauni kemuni mai na veivalavala kocokoco kece ga, ni sa sega ni vakatau na bula ni tamata e na levu ni ka e tu vua.” 16Sa qai cavuta vei ira ko koya e dua na vosa vakatautauvata, ka kaya, “E a vakalewe vinaka sara na nona vanua e dua na tamata vutuniyau. 17A sa vakananuma e lomana ko koya, ʻNa cava mada me'u cakava, ni sa sega na vanua me'u maroroya kece kina na noqu vuata?ʼ 18Sa qai kaya tale ko koya, ʻAu na cakava na ka oqo: au na basuka na noqu veilololo, ka'u na tara e so era lelevu cake, ka maroroya kina na noqu vuata kece ga, kei na noqu i yau. 19Ka'u na kaya ki yaloqu, Yaloqu sa levu tu oqo na veika e nomu me rauta na veiyabaki e vuqa: mo vakacegu mada, kana, gunu ka marau tiko.ʼ 20Ia e a qai kaya vua na Kalou, ʻTamata lialia! E na bogi ga e daidai e na tarogi kina vei iko na yalomu, era na qai nei cei na ka ko sa vakarautaka tu?ʼ 21“Sa na vaka kina vei koya e dau binia na i yau me nona ga, ka sega ni vutuniyau e na mata ni Kalou.” 22Sa qai kaya tale vei iratou na nona tisaipeli ko Jisu, “O koya gona au sa kaya kina vei kemudou; dou kakua ni lomaocaoca me baleta na nomudou bula, na ka mo dou kania, se me baleta na yagomudou, na ka mo dou vakaisulu kina. 23Ni sa bibi cake na bula mai na kakana, ka bibi cake na yago mai na i sulu. 24Dou vakasamataki ira mada na reveni: era sega ni dau kabukaburaki se tatamusuki, ka sega na nodra vale ni yau se lololo, ia sa vakani ira tiko na Kalou. Ia ko i kemudou, dou sa bibi cake sara vei ira na manumanu! 25O cei mada vei kemudou sa rawa me vakaikuritaka tale vakalailai na gauna ni nona bula e na vuku ni nona lomaocaoca? 26Ia ke sega ni dou cakava rawa na ka lailai wale ga oya, na cava ga ko dou lomaocaocataka kina na kena vo? 27Dou vakasamataka mada na veisenikau, na i tovo ni nodra tubu; era sega ni dau cakacaka se dau tali i sulu, ia oqo au kaya vei kemudou, o Solomoni e na nona i ukuuku kece ga, e a sega ni vakaisulu me bau vaka e dua vei ira oqo. 28Ia kevaka sa vakaisulutaka vaka oqo na Kalou na co era bula tu e veivanua e daidai, ka ra biu ki na lovo ni mataka, sa na qai wacava sara na ka e vakasulumi kemudou kina, o i kemudou sa lailai na nomudou vakabauta! 29“Dou kakua ni vakasaqara na ka mo dou kania, se na ka mo dou gunuva, ka me kakua tale ga ni veidreyaki na yalomudou. 30Ni ra sa dau vakasaqara na veika oqo na veimatanitu kece ga kei vuravura, ia sa kila tu na Tamamudou ni ra yaga vei kemudou na veika oqo. 31Ia dou vakasaqara mada ga na nona matanitu, ka na soli na veika oqo vei kemudou me kena i kuri. 32“Dou dakua ni rere na qele ni sipi lailai, ni sa ka ni marau vua na Tamamudou me solia vei kemudou na matanitu. 33Dou volitaka na veika e tu vei kemudou ka solia na kena i lavo vei ira na dravudravua; dou vakarautaka ga na nomudou taga ni lavo e sega ni madra rawa, ka maroroya na i yau mai lomalagi e na sega ni oti rawa, e na tikina e sega ni torova rawa na daubutako, se kakana kina na sarasara. 34Ka ni vanua ga e tiko kina na nomudou i yau, e na tiko tale ga kina na lomamudou. 35“Me vauci tiko ga na tolomudou, ka caudre tiko ga na nomudou cina, 36ka mo dou vakataki ira na tamata era waraka tiko na nodra turaga me lesu mai ki vale mai na kana magiti ni vakawati, ka me ra na dolava sara vua na katuba ni sa mai tukituki. 37Era sa kalougata na dauveiqaravi e kunei ira na nodra turaga ni ra yadra tiko e na gauna sa yaco mai kina ko koya. Au sa kaya vei kemudou, e na vakadreta vakavinaka na nona i sulu, ka vakatikori ira me ra kana, ka na lako yani ko koya ka qaravi ira. 38Ia e vaka e lako mai e na i karua ni wase ni bogi se ua i katolu, ka kunei ira ni ra sa vakarau tu, era sa kalougata ko ira na dauveiqaravi koya! 39Ia mo dou kila oqo, kevaka e kila na i taukei ni vale na gauna e na lako mai kina na daubutako, ke a yadra tiko, ka sega ni laiva tu ga na nona vale me mai basuki. 40O i kemudou tale ga mo dou vakarau tu, ni na yaco mai na Luve ni Tamata e na dua na gauna ko dou sega ni namaka” 41Sa qai kaya ko Pita vei Jisu, “Turaga, ko ni cavuta tiko na vosa vakatautauvata oqo vei keitou ga, se vei keimami taucoko?” 42A sauma na Turaga ka kaya, “O cei mada na dauniyau yalo dina ka vuku, ko koya e na lesia na nona turaga me lewa na nona matavuvale, me solia vei ira na kedra i vakarau kakana e na kena gauna dodonu? 43Sa kalougata na tamata e kunei koya na nona turaga e na gauna e yaco mai kina ni sa cakava tiko vaka kina. 44Au sa kaya vakaidina vei kemudou, e na lesi koya na nona turaga me lewa na veika kece e tu vua. 45Ia kevaka e a mani kaya e lomana na tamata koya, ʻE na yaco vakaberabera toka mai na noqu turaga,ʼ ka sa mani tekivu kina me mokulaki ira na tagane kei na yalewa veiqaravi, ka mai dau kana yani, ka dau gunu, ka dau mateni. 46E na qai yaco mai na nona turaga na tamata koya e na dua na siga e sega ni namaki koya kina, e na tiki ni gauna e sega ni kila, ka na totogitaki koya, ka biuti koya vata kei ira na tamata tawa vakabauta. 47“Ia ko koya na tamata e sa kila tu na loma ni nona turaga, ka qai sega ni vakarau kina se cakava na ka e vaka na lomana, e na sota kaya e dua na i kuita bibi. 48Ia ko koya ga e sega ni kila, ka qai cakava na ka sa dodonu me kuita kina, e na sota kaya e dua na i kuita mamada ga. Na tamata e soli vakalevu vua na ka e na namaki tale ga mai vua e levu na ka; ia ko koya e soli vakalevu cake vua na ka, e na levu cake vaka kina na ka era namaka na tamata mai vua. 49“Au sa lako mai me'u mai vakamai vuravura e na bukawaqa, ka'u diva mada ga me a sa waqa oti tu! 50Sa tu e dua na papitaiso me'u papitaisotaki kina ka sa ka levu na noqu rarawa me yacova ni sa vakayacori oti! 51Dou nanuma beka ni'u sa lako mai me'u solia na veisaututaki e vuravura? Au kaya vei kemudou, e sega, ia na veitawasei ga. 52Ni sa tekivu oqo e ratou na veisei e lewe lima e na dua na vale; e lewe tolu me veimecaki kei na lewe rua, ka lewe rua me veimecaki kei na lewe tolu. 53Era na veimecaki vakai ira na veitamani tagane; kei ira na veitinani yalewa; kei ira na veivugoni yalewa.” 54E a qai kaya tale vei ira na lewe vuqa ko Jisu, “Ni ko ni sa raica ni sa tubu e dua na o mai na ra, ko ni sa dau kaya sara, ʻSa lako mai oqo e dua na ucaʼ, ka dau mani yaco sara vaka kina. 55Ia ni ko ni sa raica ni sa liwa tiko na cagi mai na ceva, ko ni sa kaya sara, ʻE na ka levu na katakataʼ, ka sa dau mani yaco vaka kina. 56O i kemuni na dauveivakaisini! Ko ni sa kila rawa na i balebale ni rairai ni vuravura kei na macawa, ia a cava ga ko ni qai sega ni vakaibalebaletaka rawa kina na dela ni gauna oqo? 57“Ia na cava ko ni sega ni lewa kina vakai kemuni na ka e dodonu mo ni kitaka? 58Ni drau sa salavata yani kei koya sa beitaki iko ki vua na turaganilewa, mo saga sara me sereki iko rawa ko koya e gaunisala, de qai kauti iko vua na turaganilewa, ka soli iko na turaganilewa vua na ovisa, ka qai biuti iko na ovisa ki na vale ni veivesu. 59Au kaya vei iko, ko na sega ni sereki mai kina me yacova ni ko sa sauma oti sara na i otioti ni sede.”

will be added

X\