LUKE 11

1A masu tiko ko Jisu e na dua na vanua. Ia ni sa oti na nona masu, sa qai kaya vua e dua na nona tisaipeli, Turaga, ni vakavulici keitou mada me keitou masu me vaka na nona vakavulici iratou na nona tisaipeli ko Jom.” 2Sa qai kaya vei iratou ko koya, “Ni dou sa masu, dou kaya, ʻTama i keimami, me vakarokorokotaki na yacamuni, me yaco mai na nomuni matanitu. 3Ni solia mai vei keimami e na veisiga na kakana e rauti keimami. 4Ni kakua ni cudruvi keimami e na vuku ni neimami i valavala ca; ni keimami sa sega ni cudruvi ira era sa i valavala ca vei keimami. Ka mo ni kakua ni kauti keimami ki na vere.ʼ” 5Sa qai kaya tale vei iratou ko koya, “O cei mada vei kemudou me na lako vua e dua na wekana e na lomaloma ni bogi ka kaya vua, ʻNa wekaqu, au kerea mo solia mada la vei au e tolu na i buli madrai. 6E sa qai yaco wale ga mai oqo e dua na noqu i tokani e na nona i lakolako, ka sega sara ga na ka e tu vei au me'u tauca e matana.ʼ 7Ka me na qai sauma mai loma ko koya, ʻKakua ni mai vakaogai au! Sa sogo tu na katuba, ka keitou sa davo tu kei iratou na luvequ. Sa sega ni rawa me'u tucake tale ka solia vei iko e dua na ka!' 8Au sa tukuna vei kemudou, e dina beka ni na sega ni via tucake ka solia vua e dua na ka na tamata koya e na vuku ni nodrau veiwekani, ia e na nona cikecike ga, e na tucake kina ko koya ka solia vua na ka e rauti koya. 9“Ka'u sa tukuna vei kemudou, Dou kerekere ka na soli vei kemudou; dou vakasaqara ka dou na kunea; dou tukituki ka na dolavi vei kemudou. 10Ni sa dau rawata ko koya yadua sa dau kerekere, ka dau kunea ko koya yadua sa dau vakasaqara, ka na dolavi vua sa dau tukituki. 11O cei li vei kemudou na tama kevaka e kere ika vua na luvena, me na solia vua e dua na gata, 12se kevaka e kere yaloka, me na solia vua e dua na pi? 13O koya gona kevaka dou sa kila, ko i kemudou na tamata ca, mo dou solia na ka vinaka vei ira na luvemudou, sa na qai wacava sara na levu ni nona via solia na Yalo Tabu na Tamamudou vakalomalagi vei ira era kerea vua!” 14E a vakasava tani tiko ko Jisu e dua na tevoro galu. Ia ni sa lako tani na tevoro, sa qai vosa sara na tamata galu ka ra sa qoroqoro na lewe vuqa. 15Ia era a kaya e so vei ira, “Sa vakasavi ira na tevoro ko koya e na kaukauwa i Pielisepupi, na nodra i liuliu na tevoro” 16E so tale era vakatovolei koya, ka taroga vua e dua na i vakatakilakila mai lomalagi. 17Ia ni sa kila ko koya na nodra vakasama, sa kaya vei ira, “Na matanitu yadua era tatawasewase ka veisei vakai ira na lewena e na rusa ga, kei na vuvale era veisei vakai ira na lewena e na bale ga. 18Kevaka tale ga era na veisei vakai ira na lewe ni matanitu i Setani e na tudei vakaevei na nona matanitu? Me vaka ni dou kaya tiko ni'u sa vakasavi ira tani na tevoro e na kaukauwa i Pielisepupi. 19Ia kevaka au sa vakasavi ira tani na tevoro e na kaukauwa i Pielisepupi, a kaukauwa ga i cei era vakasavi ira tani kina ko ira na nomuni? E na vuku ni ka oqo era na qai nomuni turaganilewa kina ko ira koya. 20Ia kevaka ga au sa vakasavi ira tani na tevoro e na kaukauwa ni Kalou, sa qai yacovi kemuni kina mai na matanitu ni Kalou. 21“Ni sa vakaiyaragi vinaka tu e dua na qaqa, ka yadrava tu na nona vale, sa na tu vinaka tu ga na nona i yaya. 22Ia ni sa lako mai vua e dua e qaqa cake vua ka vakamalumalumutaki koya, sa na kaliraka tani na nona i yaragi ka dau vakararavi tu kina, ka veivotayaka na nona i yau. 23“O koya e sega ni to vata kei au sa noqu meca, kei koya e sega ni kumuna vata vei au sa veibiuyaka. 24“Ni sa takali mai vua e dua na tamata na yalo velavela sa na veilakoyaki voli e na vanua veitalasiga me vaqara i vakavakacegu; ia ni sa sega ni kunea, sa mani kaya, ʻAu na lesu tale ki na noqu vale ka'u a lako mai kina.ʼ 25Ni sa yaco kina, sa kunea ni sa samaki oti ka tuvani vinaka tu na kena i yaya. 26Sa qai lako ko koya ka kauta mai e vitu tale na tevoro e ratou ca vakalevu cake mai vua. E ratou sa curu ka tiko kina, ka sa yaco e muri me ca cake sara na tamata koya mai na nona bula e liu” 27Ni sa cavuta tiko na veika koya ko koya, e a qai rogo cake mai na domona e dua na yalewa mai vei ira na lewe vuqa, ka kaya vua, “Sa kalougata na kete ko ni a sucu mai kina, kei na sucu ko ni a sucuma!” 28Ia e a qai kaya ga ko koya, “Era sa kalougata cake ga ko ira era rogoca na vosa ni Kalou ka muria!” 29Ni ra sa soqoni vata tiko vei Jisu na lewe vuqa, sa qai kaya ko koya, “Oqo e dua na i tabatamata ca; e vakasaqara e dua na i vakatakilakila, ia e na sega ni soli e dua na i vakatakilakila, vakavo ga na i vakatakilakila i Jona na parofita. 30Me vaka ga ni a i vakatakilakila ko Jona vei ira na kai Ninive, e na i vakatakilakila vaka kina na Luve ni Tamata ki na i tabatamata oqo. 31E na tucake mai na Radi ni Ceva e na Siga ni Lewa ka na vakadinadinataka na nodra cala na i tabatamata oqo, ni a lako sara mai ko koya mai na i yalayala kei vuravura me mai rogoca na vuku i Solomoni, ia sa tu oqo e dua e levu cake vei Solomoni. 32Era na tucake na kai Ninive e na Siga ni Lewa ka ra na beitaki kemuni ni ra a veivutuni e na vunau i Jona; ia sa tu oqo e dua e levu cake vei Jona! 33“E sega ni dua na tamata, ni sa tutuvaka oti na cina, me qai biuta e na dua na trkina vuni, se e na ruku ni vakarau ni sila; ia e biuta ga e na kena i tutu ka me ra raica rawa na kena rarama ko Ira era curu mai. 34A cina ni yago na mata. Ni sa vrnaka tu na matamu, sa rarama kina na yagomu taucoko; ia ni sa ca tu na matamu, sa butobuto kina na yagomu taucoko. 35O koya mo qai qarauna kina, de na qai butobuto na rarama sa tu vei iko. 36Kevaka sa sinai e na rarama na yagomu taucoko, ka sega na tikina e butobuto, e na rarama taucoko sara, me vaka sa cinavi Iko na cina e na kena i serau.” 37Ia ni sa vosa tiko ko Jisu, sa qai sureti koya sara e dua na Farisi me rau la'ki kana vata. A sa curu ki loma ko koya ka tiko sobu me kana. 38E a kurabui na Farisi ni raica ni a sega ni vuluvulu ko koya ni bera ni kana. 39Sa qai kaya vua na Turaga, “O kemuni na Farisi ko ni sa dau vakasavasavataka ga na taudaku ni bilo kei na veleti, ia na lomamuni sa sinai tu e na kocokoco kei na i valavala ca. 40Ko ni sa rui yalowai! E sega li ni a cakava tale ga na tikina e loma ko koya ka a cakava na tikina e taudaku? 41Ia ni soIia me ka ni loloma vei ira na dravudravua na veika sa tu vei kemuni, ka raica sa na savasava vei kemuni na ka kece ga. 42“Ia ko ni sa kalouca na Farisi! Ni ko ni sa dau solia na i katini ni veimataqali kau lalai sara, na i vakaboi ni kakana, ia ko ni sa biuta vakatikitiki tani toka ga na lewa dodonu kei na loloma ni Kalou. E dodonu mo ni vakayacora na veika oqo, ka kakua tale ga ni guilecavi ira na kena vo. 43“Ko ni sa kalouca na Farisi! Ni ko ni dau domona ga na i tikotiko cecere e na veivalenilotu, kei na veikidavaki e naveivanua ni veivoli. 44Ko ni sa kalouca! Ni ko ni sa vaka na i bulubulu e sa sega tu ni laurai; era lako voli e delana na tamata ka ra sega ni kila” 45E a qai sauma lesu vua e dua na daunilawa, ka kaya, “Na i Vakavuvuli, e na nomuni kaya na ka oqori, ko ni sa vosa beci keimami sara tale ga kina.” 46Sa qai kaya ko koya, “Ko ni sa kalouca tale ga na daunilawa! Ni ko ni sa vakataqara vei ira na tamata na i colacola ka dredre me eolati, ka sega mada ga ni bau yavalata e dua na i qaqalo ni ligamuni mo ni tara kina na i colacola! 47Ko ni sa kalouca! Ni ko ni sa tara na veivale ni kedra i bulubulu na parofita - ko ira na parofita era a vakamatea ko ira na nomuni qase. 48Ko ni sa qai tukuni kemuni sara ni ko ni sa totaka na nodra i valavala na nomuni qase; ni ra sa vakamatei ira na parofita ko ira ka ni sa qai tara na veivale ni kedra i bulubulu ko i kemuni. 49O koya gona e a kaya kina na Vuku ni Kalou, ʻAu na tala vei ira e so na parofita kei na so na i apositolo, ka na so vei ira oqo era na vakamatea ka vakacacana.ʼ 50Ka me ra na tarogi kina na i tabatamata oqo e na vuku ni kedra dra na parofita keee ga ka a vakadavei mai na i vakatekivu kei vuravura; 51mai na dra i Epeli ka yaeova na dra i Sakaraia, ko koya ka a vakamatei e na tadrua ni eabocabo ni soro kei na Loqi Tabu. Io au sa kaya vei kemuni, e na tarogi kina na i tabatamata oqo. 52“Ko ni sa kalouea na daunilawa! Ni ko ni sa kauta tani na ki me dola kina na katuba ni vuku, ko ni a sega ni curu ko i kemuni, ka ko ni sa vakataotaki ira tale ga era via curu tiko kina!” 53Ia ni sa lako tani mai kea ko Jisu era sa tekivu na daunilawa kei ira na Farisi me ra vakalewai koya vakaca sara kavaqaqai koya matua e na veika e vuqa, 54ka ra tovolea me ra lawakitaka ka coriti koya e na vosa e lutu mai gusuna.

will be added

X\