LUKE 10

1Ni sa oti koya, sa qai lesia tale na Turaga e lewe vitusagavulukarua na tamata, ka talai ira me ra lakolako yarurua ka liu tiko vua ki na veikoro kece kei na veivanua e vakarau me lakova. 2A sa kaya vei ira ko koya, “Sa levu sara na i teitei sa matua vinaka tu, ia sa lewe lailai ga na tamata cakacaka; mo ni masuti koya kina na Turaga ni tatamusuki me talai ira mai na tamata cakacaka ki na i teitei. 3Mo ni lako; ka raica, au sa talai kemuni yani me vaka na lami e na kedra maliwa na wolifa. 4Ni kakua ni kau taga ni lavo, kakua na taga ni vaqa, kakua na i vava, ka kakua tale ga ni tu ka veikidavaki kaya kei na dua e gaunisala. 5E na vale kece ga ko ni curu kina ni kaya taumada kina, ʻMe yaco mada ga na vakacegu e na vale oqo!' 6Kevaka e tiko kina e dua na tamata dau veivakacegui, e na yaco sara vua na nomuni veivakacegui; kevaka e sega, e na lesu tale mai vei kemuni. 7Ia mo ni tiko ga e na vale ko ni sa dui curu kina, ka kania ka gunuva na veika e ratou solia; ni sa dodonu ga me taura na kena i sau na tamata cakacaka. Mo ni kakua ni veitokiyaki e veivale. 8E na gauna ko ni sa curuma kina e dua na koro ka ra ciqomi kemuni vinaka na lewena, ni kania na ka e mai tauci e matamuni. 9Mo ni vakabulai ira na tauvimate era tiko kina, ka kaya vei ira, ʻSa volekati kemuni mai na matanitu ni Kalou.ʼ 10Ia na koro kece ga ko ni curu kina, ka ra qai sega ni ciqomi kemuni, ni lako ki na kena veigaunisala ka kaya, 11ʻKeimami sa quaraka me lutu tale vei kemuni na kuvu ni qele mai na nomuni koro, ka ra kabita tu mai na yavai keimami; ia mo ni kila tiko oqo, sa voleka na matanitu ni Kalou.ʼ 12Au kaya vei kemuni e na lailai cake na ka e yaco vei Sotoma e na siga koya, ka na ca vakalevu na koro koya. 13“Ko sa kalouca sara, Koresini! Ko sa kalouca sara, Peciseita! Ni kevaka e a caka mai Taia kei Saitoni na cakacaka mana ka a caka vei kemudrau, ke rau a sa veivutuni makawa, ka dabe tiko e na i sulu taga kei na dravusa me i vakaraitaki ni nodra veivutuni. 14E na rawa cake ni mamada na kedrau i totogi ko Taia kei Saitoni e na Siga ni Lewa, ka na sega ga ko i kemudrau. 15Ko iko tale ga Kapenaumi, mo na vakacerecerei iko li mo yaco ki lomalagi? Ko na biu sobu ga ki Etesi! 16“O koya sa rogoci kemuni sa rogoci au, ia ko koya sa besetaki kemuni sa besetaki au; ia ko koya sa besetaki au sa besetaki koya sa talai au mai.” 17Era sa qai lesu tale vua na lewe vitusagavulukarua e na marau ka kaya, “Turaga, era sa bau gu ce tale ga vei keimami na tevoro e na vuku ni yacamuni!” 18Sa qai kaya vei ira ko Jisu, “Au a raici Setani ni sa lutu sobu mai lomalagi me vaka na livaliva. 19Mo ni kila, au sa solia na kaukauwa vei kemuni mo ni butuka kina na gata kei na batibasaga, ka rawa na kaukauwa kece ga ni meca, ka na sega na ka me na vakacacani kemuni. 20Ia mo ni kakua ni reki e na ka oqo, koya e na nodra sa gu ce vei kemuni ko ira na yalo, ia mo ni reki ga ni sa volai tu na yacamuni mai lomalagi” 21E na gauna vata ga koya, sa vakasinaiti koya e na reki na Yalo Tabu ka sa kaya, “Au sa vakavinavinaka vei kemuni Tamaqu, na Turaga ni lomalagi kei vuravura, ni ko ni sa vunia na veika oqo vei ira na vuku kei ira na kilaka, ka vakatakila ga vei ira na gone lalai. Io, Tamaqu, ni sa vaka oqori na i naki ni lomamuni. 22“Sa solia mai vei au ko Tamaqu na ka kece ga. E sega ni dua e kila se ko cei na Luvena, na Tamana duadua ga; ka sega ni dua e kila se ko cei na Tamana, na Luvena duadua ga, kei ira sa digitaka ko koya me vakaraitaki Tamana vei ira.” 23Sa qai vuki vei iratou na tisaipeli, ko koya, ka kaya lo vei iratou, “Era sa kalougata na mata era raica na ka dou sa raica! 24Ni'u sa kaya vei kemudou ni ra lewe vuqa na parofita kei na tui era a gadreva me ra raica na ka dou sa raica, ka ra mani sega ni raica; me ra rogoca tale ga na ka dou sa rogoca, ka ra mani sega ni rogoca.” 25Raica, sa qai tucake e dua na daunilawa me vakatovolei koya, ka kaya, “Na i Vakavuvuli, na cava me'u cakava me'u taukena kina na bula tawa mudu?” 26Sa qai kaya vua ko Jisu, “Na cava so era volai tu e na lawa? Ka cava na kedra i balebale ko kila rawa?” 27Sa qai sauma ko koya ka kaya, “Mo lomana na Turaga na nomu Kalou e na lomamu taucoko, kei na yalomu taucoko, kei na nomu kaukauwa taucoko, kei na nomu vakasama taucoko; ka lomana na kai nomu me vakataki iko.” 28Sa qai kaya vua ko Jisu, “Ko sa sauma vakadodonu; la'ki vakayacora na veika oqori, ko na bula kina.” 29Ia ni sa via vakadonui koya vakai koya ga, sa qai kaya vei Jisu, “Ia ko cei na kai noqu?” 30Sa qai sauma ko Jisu ka kaya, “E a lako sobu e dua na tamata mai Jerusalemi ki Jeriko, ka ra mani vesuki koya vakasauri na daubutako; era a qai luvata na nona i sulu, ka mokuta, ka lako tani ka biuti koya tu, ni sa voleka tu ni mate. 31Sa qai lako sobu e na sala koya e dua na bete, ia ni sa raici koya sa vakatikitikitaka ka lako sara. 32E vaka tale ga kina e dua na kawa i Livai, ni sa yaco yani ki kea ka raici koya sa vakatikitikitaka tale ga ka lako sara. 33Ia sa qai lako yani e dua na kai Samaria, ka mani yaco sara vua. Ni sa raici koya sa lomana sara, 34ka sa lako yani vua, ka vauca na veitikina e mavoa, ka livia kina na waiwai kei na waini, ka sa vakavodoka ki na nona manumanu ka kauta ki na bure ni vulagi, ka qaravi koya kina. 35E na siga ka tarava sa qai taura e rua na tiki ni siliva, ka solia vua na i vakatawa ni bure, ka kaya vua, ʻQai qaravi koya tiko; ke so tale na ka ko na vakayagataka vua, au na sauma vei iko ni'u sa lesu tale mai.ʼ 36“O cei vei iratou oqo e na nomu vakasama, e kai nona na tamata ka ra a vesuka na daubutako?” 37Sa qai kaya ko koya, “O koya ka a lomana ko koya.” Sa qai kaya vua ko Jisu, “Lako, la'ki kitaka vaka kina” 38Ia ni ratou sa lako tiko e na nodratou i lakolako, e ratou sa qai yaco ki na dua na koro, ka tiko kina e dua na yalewa, a yacana ko Marica. A sa kauti Jisu ko koya ki na nona vale. 39Ia e dua tiko na tacina yalewa, a yacana ko Meri. A dabe tiko e na yasa ni yava ni Turaga ko Meri ka vakarorogo ki na nona vosa. 40Ia sa veidreyaki na loma i Marica e na levu ni ka me cakava. A sa mani lako kina vua ka kaya, “Turaga, ko ni sega ni kauwaitaka ni laivi au ko taciqu me'u veiqaravi duadua ga? Ni tukuna mada vua me mani vukei au.” 41Sa qai sauma ko Jisu ka kaya vua, “Marica, Marica! Ko sa rui lomaocaocataka ka leqataka na veika e vuqa: 42ia sa dua bau ga na ka e yaga. Sa digitaka ko Meri na i votavota vinaka, na ka e na sega ni kau tani rawa mai vua.”

will be added

X\