LUKE 1

1Me vaka ni ra sa tovolea oti e lewe vuqa me ra vola na i tukutuku ni veika e a yaco vakaidina e na keda maliwa, 2me vaka na nodra vakadewataka mai vei keda ko ira era a raica e matadra ka ra dauqarava na vosa mai na i vakatekivu, 3sa rairai daumaka tale ga kina vei au, e na noqu sa vakatarotaroga matua sara na veika kece ga mai na i vakatekivu, me'u tuvana vakavinaka e na i vola vei kemuni Ceofilo, na turaga dokai, 4mo ni kila kina na dina ni veika ko ni sa vakatavulici kina. 5E na gauna e tui tiko kina mai Jutia ko Eroti, e a tiko kina e dua na bete ko Sakaraia na yacana, e na matabete i Apaijia; a watina e dua vei ira na kawa i Eroni, ka yacana ko Ilisapeci. 6E rau dodonu ruarua e na mata ni Kalou ko i rau oqo, e rau dau muria na i vakaro kei na lawa kece ga ni Turaga, ka rau sega ni vakalewai rawa. 7E sega na luvedrau, ni a yava ko Ilisapeci ka rau sa qase ruarua tale ga mai. 8E na dua na gauna ni a cakacaka vakabete tiko e na mata ni Kalou ko Sakaraia, oya ni a vakaitavi kina na nona matabete, 9a mani donui koya e na vakawirimadigi me vaka na i vakarau vakabete, me curu ki na Valenisoro ni Turaga ka vakama na ka boi vinaka. 10Ia ko ira na lewe vuqa era a masu tu ga e tautuba ni sa kama tiko na ka boi vinaka. 11Sa qai rairai vua e dua na agilosi ni Turaga ni wavu tu e na yasa i matau ni cabocabo ni ka boi vinaka. 12Ia ni sa raica ko Sakaraia sa kidroa, ka sa tuburi koya na rere. 13Sa qai kaya vua na agilosi, “Kakua ni rere, Sakaraia, ni sa rogoci na nomu masu; ka na vakasucuma e dua na luvemu tagane ko Ilisapeci na watimu, ka mo na vakayacani koya me ko Joni. 14Ko ne reki ka marau kina, e na lewe vuqa tale ga era na reki e na nona sucu. 15Ni na dokai vakalevu ko koya e na mata ni Turaga, ka na sega ni gunuva na waini se yaqona kaukauwa, ia e na vakasinaiti e na Yalo Tabu, me tekivu sara mai na kete i tinana. 16E na saumaka lesu ko koya e lewe vuqa vei ira na luve i Isireli ki vua na Turaga na nodra Kalou. 17Ka na liu tiko e na mata ni Turaga e na yalo kei na kaukauwa i Ilaija, me vagolea na lomadra na qase ki vei ira na gone, kei ira na dautalaidredre ki na nodra vuku na yalododonu, me vakarautaka kina e dua na mata tamata me vakarau tu vua na Turaga .” 18Sa qai kaya vua na agilosi ko Sakaraia, “Au na kila vakacava na ka oqo, ni'u sa qase, ka sa qase tale ga na watiqu?” 19Sa qai sauma na agilosi ka kaya vua, “Ko i au ko Keperieli, au sa dau tu me'u veiqaravi e na mata ni Kalou, ka'u sa talai mai me'u vosa vei iko ka tukuna vei iko na i tukutuku vinaka oqo. 20Ia ko na galu tu mada ka sega ni vosa rawa me yacova na siga e na vakayacori kina na veika oqo, ni ko sega ni vakadinata na noqu vosa, ka ni na vakayacori ga e na kena gauna.” 21Era a waraki Sakaraia tiko na tamata, ka ra kurabui ni sa la'ki dede tiko ko koya e na loma ni Valenisoro. 22Ia ni sa curu mai ki tautuba ko koya, sa sega ni vosa rawa vei ira, ka ra sa qai kila ni a raica ko koya e dua na raivotu e na Valenisoro. E a vakatabataba ga vei ira ko koya ni sa galu tu. 23Ia ni sa oti na nona cakacaka vakabete, sa qai lako ki na nona vale. 24Ni sa oti na veisiga koya sa qai kunekune na watina, ko Ilisapeci, ka sa vunitaki koya ka vula lima, ka kaya, 25“Sa i koya oqo na cakacaka ni Turaga vei au, ni sa raici au e na mata loloma ko koya, me kauta laivi kina na vu ni noqu madua e na kedra maliwa na tamata!” 26E na i kaono ni vula sa talai na agilosi ko Keperieli mai vua na Kalou, ki na dua na koro mai Kalili ko Nasareci na yacana, 27ki vua e dua na goneyalewa ka sa musuki tu vua e dua na tagane ko Josefa na yacana, e na mataqali i Tevita; a yaca ni goneyalewa koya ko Meri. 28Sa yaco yani vua na agilosi ka kidavaki koya, ka kaya, “Mo reki mada, ko iko ko sa lomani vakalevu! Sa tiko vata kei iko na Turaga! Ko sa kalougata vakalevu ko iko mai vei ira kece ga na yalewa.” 29Sa kidroa ko koya e na vosa koya, ka vakasamataka e lomana se cava na i balebale ni veikidavaki vaka koya. 30Sa qai kaya vua na agilosi, “Kakua ni rere, Meri, ni sa lomani iko na Kalou. 31Raica, ko na kunekune, ka vakasucuma e dua na gonetagane; mo na vakayacani koya me ko Jisu. 32E na ka levu ko koya, ka na vakatokai me Luve i Koya sa Cecere Sara; ia na Turaga na Kalou e na solia vua na i tutu vakatui nei tamana ko Tevita. 33E na tui tiko ko koya e na mataqali i Jekope ka sega ni mudu; e na sega tale ga ni mudu na nona matanitu .” 34Sa qai kaya ko Meri vua na agilosi, “E na yaco rawa vakacava na ka oqo, ni'u sa sega ni veiyacovi kei na dua na tagane?” 35Sa qai sauma na agilosi ka kaya vua, “E na lako sobu mai vei iko na Yalo Tabu, ka na vakarurugi iko na kaukauwa i Koya sa Cecere Sara, e na vakatokai kina me ka tabu, na Luve ni Kalou, ka na sucu mai vei iko. 36Raica na wekamu ko Ilisapeci, ko koya sa vakatokai me yava, e sa kunekunetaka tiko e dua na gonetagane ni sa qase tu oqo, ka sa i kaono ni nona vula oqo. 37Ni sa sega ni dredre vua na Kalou e dua na ka.” 38Sa qai kaya ko Meri, “Ko i au na vada ni Turaga; me yaco mada ga vei au me vaka na nomuni vosa.” Sa qai biuti koya sara na agilosi. 39Sa qai cavutu ko Meri e na gauna koya ka lako vakusakusa ki na dua na koro e na veidelana mai Jutia; 40ka la'ki curu ki na vale i Sakaraia ka veikidavaki kei Ilisapeci. 41Ia ni sa rogoca na vosa ni veikidavaki i Meri ko Ilisapeci, sa yavala e ketena na gone, ka sa vakasinaiti ko Ilisapeci e na Yalo Tabu. 42Sa qai tabalaka cake na domona, ka kaya, “Ko sa kalougata vakalevu mai vei ira kece na yalewa, ka sa kalougata tale ga na lewe ni ketemu! 43A cava au sa rui kalougata kina, me mai sikovi au kina na tina ni noqu Turaga? 44Kila ga, ni sa rorogo e daligaqu na nomu vosa ni veikidavaki, sa yavala e na reki na gone e ketequ. 45Sa kalougata ko koya sa vakadinata ni na vakayacori dina ga na veika sa tukuna vua na Turaga.” 46Sa qai kaya ko Meri, “Sa vakalagilagia na Turaga na yaloqu, 47ka sa reki na yaloqu vua na Kalou na noqu i Vakabula! 48Ni sa nanuma na i tutu vakaloloma ni nona vada. Ka raica, me tekivu mai na gauna oqo era na kaya na veitabatamata kece ga ni'u sa kalougata; 49ni sa cakava vei au na veika lelevu ko koya sa qaqa. Ka sa yaca tabu na yacana. 50Sa tu na nona lewa loloma vei ira sa rerevaki koya e na veitabatamata kece ga. 51Sa dodoka na ligana kaukauwa, ka ra sa veiseyaki na viavialevu e na vakanananu ni yalodra. 52Sa talaraki ira na kaukauwa mai na nodra i tikotiko vakatui, ka laveti ira cake na tamata lalai. 53Sa vakamamautaki ira na viakana e na ka vinaka; ka vakatalai ira wale na vutuniyau. 54Sa vukei ira na nona tamata na Isireli, ni sa nanuma lesu na nona loloma, 55me vaka e a vosa kina vei ira na noda qase, vei Eparaama kei na nona kawa ka tawa mudu!” 56A tiko vata kei Ilisapeci ko Meri ka rauta e vula tolu, ka sa qai lesu tale ki na nona vale. 57Sa mani yaco na gauna me vakasucu kina ko Ilisapeci, ka a vakasucuma e dua na gonetagane. 58Era sa mani rogoca ko ira era tiko voleka e kea kei ira na wekana ni sa lomani koya vakalevu na Turaga, ka ra sa qai reki vata kaya. 59E na i kawalu ni siga era sa qai lako me ra ciliva na gone, ka ra a nanuma me rau sa veiyacani kei tamana ko Sakaraia. 60Ia sa qai kaya ko tinana, “Sega, me yacana ga ko Joni.” 61Era sa qai kaya vua, “E sega ni dua na wekamu e vakayacani e yaca oqo.” 62Era sa qai vosa dusidusi me vaka na galu vei tamana se cava e vinakata ko koya me yacana. 63Sa qai kerea ko koya e dua na papa ni volavola, ka vola kina, “Na yacana ko Joni.” A ra sa kurabui kece ga. 64Sa qai sereki vakasauri na gusu i Sakaraia kei na yamena, ka sa qai vosa ka vakarokorokotaka na Kalou. 65A ra sa rere kece ga ko ira, era tiko vakavolivoliti ira, ka sa veitalanoataki na veika oqo e loma ni vanua taucoko vaka-Jutia. 66Ko ira kece era rogoca na veika oqo e ra sa tugana e lomadra, ka ra kaya, “E na yaco beka me cava na gone oqo?” ni sa tiko vata kaya na kaukauwa ni Turaga. 67Sa qai vakasinaiti e na Yalo Tabu ko Sakaraia na tamana, ka sa parofisai kaya, 68“Me vakacaucautaki na Turaga na Kalou ni Isireli, ni sa mai sikovi ira ka vakabulai ira na nona tamata. 69Ka sa vakatubura vei keda e dua na i vakabula kaukauwa, e na mataqali i Tevita na nona tamata. 70Me vaka a vosataka ko koya e na gusudra na nona parofita e na gauna makawa sara, 71me da vakabulai mai na noda meca, kei na ligadra kece ga era cati keda. 72Me vakayacora na yalo loloma vei ira na noda qase ka me nanuma tale ga na nona veiyalayalati tabu. 73Na bubului ka a bubului kina ko koya vei Eparaama na tamada, 74me qisi keda, ni da sa vakabulai mai na ligadra na noda meca, me da qaravi koya ka sega ni rere, 75e na yalosavasava ga kei na i valavala dodonu e na matana e na veisiga kece ga ni noda bula. 76“Ia ko iko na gone, ko na vakatokai na parofita i Koya sa Cecere Sara. Ni ko na liu e na mata ni Turaga mo caramaka na nona sala; 77mo vakatakila vei ira na nona tamata na ka me ra vakabulai kina, ni sa bokoci na nodra i valavala ca. 78E na yalo loloma ni noda Kalou, ka na kida mai kina vei keda na rarama mai cake, 79me vakararamataki ira na tiko e na butobuto kei na yaloyalo ni mate, ka vakauta na yavada ki na sala ni veisaututaki” 80A sa tubu cake na gone, ka yaco me yalomatua sara, ka sa dau tiko voli ga e na loma ni vanua lala me yacova na gauna sa qai vakaraitaki koya kina vei ira na Isireli.

will be added

X\