JUTA 1

1Oqo na i vola i Juta, e dua na bobula i Jisu Karisito na taci Jemesa. Ki vei ira era sa kacivi mai vua na Kalou ka ra sa bula voli e na loloma ni Kalou na Tamada kei na veimaroroi i Jisu Karisito. 2Me vakalevutaki mada ga vei kemuni na yalololoma, na vakacegu kei na loloma! 3O i kemuni na noqu i tokani, e na noqu gadreva vagumatua tiko me'u volavola yani vei kemuni me baleta na veivakabulai sa mai noda vata oqo, au kunea ni ganita me'u volavola ka vakamamasu vei kemuni mo ni taqomaka na vakabauta e a sa solia oti mai vakadua na Kalou vei ira na nona tamata yalosavasava ka na sega ni vakaruataka tale. 4Ni ra sa curu lo mai e so na tamata tawa lotu, ka ra sa vakatanitaka na loloma ni noda Kalou me ra ia kina na i vakarau vakasisila, ka cakitaka na noda i Vakavuvuli ka noda Turaga e dua bauga, ko Jisu Karisito. Ia e a sa tukuna makawa sara tu na i Vola Tabu na cudru sa tau vei ira oqo. 5Ia e dina ga ni ko ni a sa kila taucoko tu mada e liu na ka oqo, au gadreva me'u tukuna tale vei kemuni na sala e a vakabulai ira na Isireli na Turaga mai Ijipita, ia e muri e a qai vakarusai ira era sega ni vakabauta. 6Ko ira tale ga na agilosi era a biuta na nodra i tikotiko dodonu, ka ra a sega ni tiko dei ga e na nodra dui i tutu, sa maroroi ira tiko na Kalou e na butobuto ka ra sa vesu tu e na sinucodo me yacova ni sa tau na lewa e na siga bibi ko ya. 7Ni nanumi Sotoma kei Komora kei na veikoro lelevu era vakavolivoliti rau, ni ra a ia vaka kina na i valavala vakasisila ni dauyalewa kei na dautagane kei na garogaro ca sa sega ni vaka na i tovo ni tamata. Era a vakaitotogitaki e na bukawaqa tawa mudu, me ka ni vuli vei keda kece ga. 8Ia era sa vaka kina ko ira na tamata oqo, mai na tadra e so era tadra sa vakavuna me ra i valavala ca kina ki na yagodra; era cata ni liutaki ira na Kalou ka ra vosa vakacacataki ira na veikabula vakaiserau mai cake. 9Ia ko Maikeli mada ga, na agilosi liu, ni rau sa veisaqasaqa tiko kei na Tevoro, ka veiletitaka na yago i Mosese, e a sega ni bau doudou me vosa vakacacataki koya, ia e a kaya ga, “Me cudruvi iko na Turaga!” 10Ia ko ira na tamata oqo era vosa vakacacataka na ka kece ga era sega ni kila. Ia na veika era sa dau kila vaka i ira ga, me vaka na nodra kilakila na manumanu sega ni vakayalo, sa i ira ga na veika sa vakarusai ira. 11Me nodra mada ga na rarawa! Ni ra sa muria tiko na i vakarau i Keni; e ra sa soli ira yani ki na ca e na vuku ni yau, me vakataki Pelame, ka ra sa vakarusai e na veivorati me vakataki Kora. 12Sa i ira oqo na veika e dau vakadukadukalitaka na nomuni kana ni veilomani, ni ra sa dau kasou vata vakadoudou ka ra sa dau qarauni ira ga vaka i ira. Era sa na vaka na o e sega na kena uca sa veikauyaki e na cagi. Era sa vaka tale ga na veivunikau ka sega na vuadra e na vula i vuata; era sa cavuivuvu ka mate vakadua. 13Era sa vaka na ua cudrucudru ni wasawasa sa vakaraitaka cake mai vaka na vuso na nodra i valavala veivakamaduataki. Era sa vaka na veikalokalo dau veicavuyaki; ka sa maroroya tu na Kalou me nodra na vanua butobuto loaloa ka tawa mudu. 14Sa i ira tale ga oqo e a parofisaitaki ira ko Inoke, e na i ka vitu ni tabatamata e kawa mai vei Atama, ni a kaya “Raica, e na lako mai na Turaga kei na le udolu vakaudolu na nona agilosi yalosavasava, 15me vakatauca na lewa vei ira na tamata kece ga, ka me vakarusai ko ira kece sa sega ni doka na Kalou e na vuku ni nodra i valavala ca kece ga era sa kitaka e na sala sa sega ni sala Vakalou, kei na veika viavialevu kece ga era sa vosataka ko ira na i valavala ca me baleta na Kalou!” 16Sa i ira oqo na dau vosa kudrukudru, ka dau didi. Era sa dau vakamuria ga na nodra garogaro ca; era sa dau tauca na vosa qaciqacia, ka ra sa dau cavilaki ira na tamata me ra rawata ga kina na ka era vinakata. 17Ia, o i kemuni na noqu i tokani lomani, e dodonu mo ni nanuma na veika era a kaya ko ira na i apositolo ni noda turaga ko Jisu Karisito ni na yaco. 18Era a kaya vaka oqo vei kemuni: “Era na yaco mai e so na dauveivakasewasewani e na i otioti na gauna, ka ra na dau muria ga na nodra gagadre ca.” 19Sa i ira oqo era sa vakavuna na tatawasewase; era sa tamata vakavuravura ka sega vei ira na Yalo Tabu. 20Ia ko i kemuni na noqu i tokani lomani, ni veivakatataki cake tiko ga vaka i kemuni e na nomuni vakabauta savasava sara; ka masu tiko e na kaukauwa ni Yalo Tabu. 21Ni tikotiko ga e na loloma ni Kalou, ka waraka tiko me kauti kemuni ki na bula tawa mudu na noda Turaga ko Jisu Karisito e na nona yalololoma. 22Ia ni lomani ira era vakatitiqa; 23ka vakabulai ira e so tale e na nomuni kaliraki ira laivi mai na bukawaqa. Ni yalololoma vei ira e so tale, ia ni qarauni kemuni vinaka tale ga mai vei ira ka cata sara mada ga na nodra i sulu, ni sa vakadukadukalitaki e na i valavala ca ni yagodra. 24Ia oqo, ki vei koya sa rawata me taqomaki kemuni mo ni kakua kina ni bale, ka me vakaraitaki kemuni tale ga e na reki e na vanua sa tiko kina na nona i serau ni sa sega na nomuni cala. 25Me nona na Kalou e dua bauga, na noda i Vakabula, e na vuku i Jisu Karisito na noda Turaga, na lagilagi, na cecere, na kaukauwa kei na lewa e na veitaba gauna kece ga sa oti yani kei na gauna oqo kei na veigauna kece ga ka tawa mudu! Emeni.

will be added

X\