JONI 9

1Ia ni sa lako tu yani ko Jisu, sa raica sara e dua na tamata ka a sucu mataboko. 2E ratou a qai tarogi koya na nona tisaipeli, ka kaya, “Vakavuvuli, ko cei e i valavala ca, ka mani sucu mataboko kina na tamata oqo, ko koya se ko i rau na nona qase?” 3Sa qai sauma ko Jisu ka kaya, “E a sega ni valavala ca ko koya oqo, se ko i rau na nona qase, ia sa mataboko ga me na vakatakilai ga kina na cakacaka yaco ni Kalou e na vukuna. 4Sa dodonu me da cakava tiko na cakacaka i koya ka talai au mai ni se siga toka; sa voleka mai na bogi, e na sega ni cakacaka rawa kina e dua na tamata. 5Ni'u sa tiko e vuravura, au sa rarama kei vuravura.” 6Ni sa vosa oti vaka koya ko koya sa qai kasivita na qele, ka ulia na qele e na i kasivi, ka boroya kina na mata ni tamata mataboko. 7Sa qai kaya vua, “La'ki tavoi e na i Sisili ko Sailoama ” (Na yaca ko ya e kena i balebale, “Sa Talai”.) 8Era sa qai kaya na lewe ni koro kei ira ka a raica na nona dau kerekere tu e liu, “E sega li ni ko koya oqo na tamata ka a dau kerekere dabedabe tiko?” 9Era a kaya e so, “O koya dina oqo .” E so tale era kaya, “E segai, e vakataki koya ga .” Sa qai kaya vaka i koya ko koya, “O i au dina oqo ” 10Era sa qai kaya vua, “O a qai rai rawa ga vakacava?” 11Sa qai sauma ko koya, ka kaya, “Na tamata ka yacana ko Jisu, e a ulia na qele e na i kasivi, ka boroya kina na mataqu, ka kaya vei au, ʻLako ki Sailoama, ka la'ki tavoi kina.' Ia ni'u sa tavoi oti, au sa rai rawa sara.” 12Era sa qai kaya vua, “Ia sa i vei 'qo o koya?” Sa qai kaya ko koya vei ira, “Au sega ni kila ” 13Era sa qai kauti koya ka a mataboko tu e liu vei ira na Farisi. 14Ia na siga ka a ulia kina na qele ko Jisu, ka vakabulai koya mai na nona mataboko, na Siga ni Vakacecegu. 15Era sa qai tarogi koya tale na Farisi se a qai rai rawa vakacava. Sa qai kaya vei ira ko koya, “E a boroya na mataqu ko koya e na qele, ka'u tavoi, ka'u sa mani rai rawa.” 16Era sa qai kaya e so vei ira na Farisi, “E sega ni lako mai vua na Kalou na tamata oqo, ni sega ni vakatabuya na Siga ni Vakacecegu” Era sa qai kaya e so tale, “E cakava rawa ga vakacava na cakacaka mana vaka oqo e dua na tamata i valavala ca?” Era sa mani veidre kina. 17Era sa qai kaya tale vua na tamata mataboko, “Me vaka ni a vakabulai iko ko koya mai na nomu mataboko, a cava sara mada ko kaya ko iko me baleti koya?” Sa qai kaya ko koya, “O koya e dua na parofita.” 18Ia era sega tiko ga ni vakadinata ko ira na nodra i liuliu na Jiu ni a mataboko e liu ko koya ka ni sa qai rai rawa oqo, me yacova ni ra sa kacivi rau na nona i tubutubu 19ka tarogi rau, ka kaya, “Oqo li na luvemudrau, ko drau kaya ni a sucu mataboko? Ia sa qai rai rawa vakacava oqo?” 20E rau sa qai sauma na nona i tubutubu ka kaya, “Keirau kila ni luve i keirau oqo, ka kila tale ga ni a sucu mataboko. 21Ia na nona sa qai rai oqo, keirau sega ni kila. Keirau sega tale ga ni kila se ko cei ka a vakabulai koya mai na nona mataboko. Ni tarogi koya ga. Sa tamata bula ko koya ka na rawa ni vakamacalataka ga vaka i koya.” 22E rau a vosa vaka koya na nona i tubutubu ni rau rerevaki ira na nodra i liuliu na Jiu; ni ra a sa lomavata oti me na vakatabui ni tiko tale e na nodra i soqosoqo ni lotu e dua na tamata e vakatusa ni sa Karisito ko Jisu. 23O ya na vuna e rau a kaya kina na nona i tubutubu, “Sa tamata bula ko koya; ni tarogi koya ga ” 24Era sa qai kaciva tale na tamata ka a mataboko e liu ka kaya vua, “Yalataka mada e na mata ni Kalou ni ko na tukuna na ka dina! Keimami kila ni tamata i valavala ca ko koya ka vakabulai iko.” 25Sa qai sauma ko koya, ka kaya, “Au sega mada ni kila se tamata i valavala ca ko koya se sega. A ka ga au kila, ni'u a mataboko e liu, ia oqo au sa rai rawa.” 26Era sa qai kaya tale vua, “A cava sara mada e cakava vei iko ko koya? A cava e cakava mo rai rawa kina?” 27Sa qai kaya vei ira ko koya, “Au a sa tukuna oti vei kemuni ko ni qai sega ni vakarogoca. Ko ni via rogoca tale e na vuku ni cava? Ko ni sa via nona tisaipeli tale beka ga?” 28Era sa qai vakalialiai koya, ka kaya, “O iko ga o nona tisaipeli, o i keimami na tisaipeli i Mosese. 29Keimami kila ni a vosa vei Mosese na Kalou. Ia, na tamata ga oqo, keimami sega ni kila se a lako mai vei.” 30Sa qai sauma na tamata koya ka kaya vei ira, “Sa qai dua na ka veivakurabuitaki oqo! O ni sega ni kila na vanua e lako mai kina ko koya, ia e qai vakabulai au ga mai na noqu mataboko! 31Eda kila ni sega ni dau rogoci ira na tamata i valavala ca na Kalou. E dau rogoci ira ga era dau qaravi koya ka dau cakava na lomana. 32Mai na i tekivu kei vuravura e sega ni sa bau rogoci mada me dua na tamata me vakabula, me rai rawa tale, na yaloka ni mata ni dua na tamata e a sucu mataboko. 33Kevaka e a sega ni lako mai vua na Kalou na tamata oqo, ke a sega ni rawata e dua na ka.” 34Era sa qai sauma vua, ka kaya, “O iko o a sucu tu mai e na i valavala ca; o qai mai via vakatavulici keimami?” Era sa qai vakasavi koya me kakua ni tiko tale e na nodra i soqosoqo ni lotu. 35E a qai rogoca ko Jisu ni ra sa biuti koya tani. Ia ni sa kunei koya, sa qai kaya vua, “Ko sa vakabauta li na Luve ni Kalou?” 36Sa qai sauma ko koya, ka kaya, “Ko cei ko koya, Turaga, me rawa ni'u bau vakabauti koya.” 37Sa qai kaya vua ko Jisu, “Ko sa raici koya oti, ka sa i koya ko drau sa veivosaki vata tiko.” 38Sa qai kaya ko koya, “Turaga, au sa vakabauta. “ Sa qai cuva sobu ko koya ka so-Kalou vua. 39Sa qai kaya ko Jisu, “Au sa lako mai oqo ki vuravura me'u veilewai, oya me ra rai ko ira ka sega tu ni rai, ka me ra mataboko ko ira ka rai.” 40Era a rogoca na ka koya ko ira e so na Farisi ka ra tiko vata kaya, a ra sa kaya vua, “Keitou sa mataboko tale beka ga ko i keitou?” 41Sa qai kaya vei ira ko Jisu, “Kevaka dou a mataboko ke a sega na nomudou cala, ia, oqo ni dou sa kaya, ʻSa rai na mata i keitou' e sa tiko ga kina na nomudou cala.”

will be added

X\