JONI 8

1A sa lako ga ko Jisu ki na Delana Veiolive. 2Ia e na mataka lailai ni siga ka tarava sa qai lako tale ko koya ki na Valenisoro, ka ra a soqoni vata yani vua na tamata kece ga; sa qai mai dabe yani ka vakatavulici ira. 3Era sa qai kauta yani vua ko ira na daunilawa kei ira na Farisi e dua na yalewa ka vesu ni veibutakoci tiko. Ni ra sa vakaturi koya e na kedra maliwa, 4era sa qai kaya vua, “Vakavuvuli, e a vesu na yalewa oqo ni se veibutakoci sara tiko ga. 5E na noda Lawa e vakarota tu kina ko Mosese me ra vakaviriki ko ira era cakava na ka oqo. Ia, na cava ko na kaya kina?” 6Era a kaya koya me ra veretaki koya ka me ra beitaki koya rawa kina. Ia e a cuva ga ko Jisu ka volavola e na qele e na nona i qaqalo. 7Ia ni ra se tarogi koya tiko ga, sa qai tu cake, ka kaya vei ira, “O koya vei kemuni e sega na nona i valavala ca, me viritaka na i matai ni vatu.” 8Sa qai cuva ka volavola tale e na qele e na nona i qaqalo. 9Ia ni ra sa rogoca, era sa qai curucuru yadudua yani ki tautuba, ka tekivu sara ga vei ira na qase. E rau sa qai mai vo tiko ga e kea ko Jisu kei na yalewa koya. 10Sa qai tu cake, ko Jisu, ka kaya vua, “Kemuni, era sa i vei ko ira oqo? Sa sega ni dua e kunea ni dodonu mo totogi?” 11Sa qai kaya ko koya, “E sega, Turaga.” Sa qai kaya ko Jisu, “Sa noqu lewa tale ga mo kakua ni totogitaki. Lako, ka kakua ni valavala ca tale!” 12Sa qai vosa tale vei ira na Farisi ko Jisu, ka kaya, “O i au na rarama kei vuravura, ko koya e muri au e na sega ni lako e na butobuto, ia e na tiko ga vua na rarama ni bula.” 13Era sa qai kaya vua na Farisi, “O iko o tukuni iko tiko ga; e sega ni dina na nomu i tukutuku.” 14A sauma ko Jisu, ka kaya vei ira, “Kevaka sara mada ga au tukuni au tiko ga, e na dina ga na noqu i tukutuku; ni'u kila na vanua au lako mai kina, kei na vanua au lako tiko kina; ia ko i kemuni ko ni sega ni kila na vanua au a lako mai kina se na vanua au lako tiko kina. 15Ko ni sa dau vakalewa na ka e na kena i rairai ga vakatamata; ia, ko i au, au sega ni vakalewa e dua na tamata. 16Ia kevaka au mani vakalewa e dua na ka, e na dina ga na noqu vakalelewa, me vaka ni'u sega ni tiko duadua ga, keirau tiko ga kei Tamaqu, o koya ka talai au mai. 17Io sa volai tu e na nomuni lawa, ni dina na i tukutuku ni lewe rua na tamata. 18Ko i au, au sa tukuni au, ka sa tukuni au tale ga ko Tamaqu, o koya ka a talai au mai ” 19Era sa qai kaya vua, “E vei ko Tamamu?” Sa qai sauma ko Jisu ka kaya, “Ko ni sa sega ni kilai au se Tamaqu. Kevaka ko ni sa kilai au, ko ni na kilai Tamaqu tale ga.” 20E a cavuta na veivosa oqori ko Jisu e na tiki ni Valenisoro ka ra dau tu kina na kato ni soli e na gauna e vakatavuvuli tiko kina. Ia e a sega ni dua e vesuki koya, ni a se sega ni yaco na nona gauna. 21Sa qai kaya tale vei ira ko Jisu, “Au sa lako tiko e na noqu i lakolako; ko ni na qai vakasaqarai au, ia ko ni na mate e na vuku ni nomuni i valavala ca; ko ni na sega ni lako rawa ki na vanua au sa lako tiko kina ” 22Era sa qai kaya kina na nodra i liuliu na Jiu, “E na vakamatei koya beka vakai koya, me vaka ni kaya, ʻKo ni na sega ni lako rawa ki na vanua au sa lako tiko kina’?” 23Sa qai kaya vei ira ko koya, “O i kemuni, o ni lewe ni vuravura ka tiko oqo e ra, ia o i au, au lako mai cake. O i kemuni, o ni lako mai na vuravura oqo, ia o i au, au sega ni lako mai kina. 24O koya oqo au sa kaya kina vei kemuni, ni ko ni na mate e na vuku ni nomuni i valavala ca; ni kevaka ko ni sega ni vakadinata ni ʻSa i Au ko i Au,' ko ni na mate e na vuku ni nomuni i valavala ca ” 25Era sa qai kaya vua, “O cei o iko?” Sa qai kaya vei ira ko Jisu, “Na ka ga au sa tukuna vei kemuni mai na i vakatekivu. 26E vuqa tu na ka me'u tukuna ka vakalewa me baleti kemuni, ia sa dina ko koya ka a talai au mai; ka'u sa tukuna ki vuravura na ka ga au a rogoca mai vua .” 27Era a sega ni kila rawa ni a vosa tiko ko Jisu me baleti Tamana. 28Sa qai kaya tale vei ira ko koya, “Ni ko ni sa na laveta cake na Luve ni Tamata, ko ni na qai kila ni Sa i Au ko i Au; ko ni sa na qai kila tale ga ni sega ni dua na ka me'u cakava vaka i au ga. Ia au sa dau tukuna ga na veika e vakatavulici au kina ko Tamaqu. 29Sa tiko vata ga kei au ko koya ka a talai au mai; e sega ni biuti au me'u tiko duadua ga; ni'u sa dau cakava tiko ga na ka e vinakata.” 30Era a mani vakabauti koya e lewe vuqa vei ira era a rogoca na nona vosa. 31Sa qai kaya ko Jisu vei ira na Jiu ka ra sa vakabauti koya, “Kevaka ko ni muria tiko ga na noqu vosa, ko ni sa qai noqu tisaipeli dina; 32ka ko ni na kila na ka dina, ka na sereki kemuni na ka dina.” 33Era sa qai kaya vua, “O i keimami na kawa i Eparaama; keimami a sega ni bau bobula vua e dua na tamata e na dua na gauna. A cava na i balebale ni nomu kaya, ʻKo ni na sereki’?” 34Sa qai kaya vei ira ko Jisu, “Au tukuna vakadodonu sara vei kemuni, ko koya ga sa i valavala ca sa bobula ki na i valavala ca. 35E na dua na vuvale, e sega ni lewe ni vuvale tu dei na bobula; ia na luve ni taukei ni vale ga e lewe ni vuvale koya ka tawa mudu. 36O koya gona kevaka sa sereki kemuni na Luvena, ko ni sa na qai sereki dina sara. 37Au sa kila ni ko ni kawa i Eparaama; ia ko ni sa via vakamatei au tiko baleta ni ko ni sega ni vakadinata na noqu vosa. 38Au sa dau tukuna ga na veika au sa raica mai vei Tamaqu, ia ko i kemuni ko ni sa dau cakava na ka ko ni sa rogoca mai vei tamamuni ” 39Era sa qai vosa ka kaya vua, “Na tama i keimami ko Eparaama.” Sa qai kaya vei ira ko Jisu, “Kevaka ko ni sa luve i Eparaama dina ke ko ni na kitaka na veika e a cakava ko Eparaama. 40Na ka ga au sa bau kitaka, koya me'u tukuna na veika dina au a rogoca mai vua na Kalou, ia ko i kemuni, ko ni via vakamatei au tiko. E a sega ni bau cakava e dua na ka vakaoqo ko Eparaama! 41Ko ni sa cakava tiko ga na ka e a cakava na tamamuni.” Era sa qai kaya vua, “Keimami a sega ni sucu mai e na veibutakoci. E duabau ga na tama i keimami, koya ga na Kalou ” 42Sa qai kaya vei ira ko Jisu, “Kevaka e tamamuni dina na Kalou, ke ko ni a lomani au. Ni'u a tubu mai vua na Kalou, ka lako mai vua. Au a sega ni lako ga mai vaka i au, ia e a talai au ga mai ko koya. 43A cava ko ni sega ni kila tiko kina na i balebale ni noqu vosa? E baleta ga ni ko ni sega ni via vakarogoca. 44A tamamuni na Tevoro; ko ni sa gadreva tale ga mo ni cakava na gagadre i tamamuni. A daulaba mai na i vakatekivu ko koya; e sega ni dau tovaka na dina, ka ni sega ga vua na dina. Ni sa tukuna ko koya e dua na i tukutuku lasu sa dodonu sara tu ga vua koya, ka ni sa dau lasulasu ka sa vu mai vua na lasu kece ga. 45Ia o i au, au mai tukuna tiko oqo na ka dina; o ya na vuna ko ni sega kina ni vakabauti au. 46Ko cei vei kemuni e rawa ni vakadinadinataka ni tiko e dua na noqu i valavala ca. Kevaka au sa tukuna tiko vei kemuni na ka dina, a cava ko ni qai sega ni vakadinati au kina? 47O koya sa lako mai vua na Kalou sa dau vakarorogo ki na vosa ni Kalou. Ia, ko i kemuni, ko ni sega ni lako mai vua na Kalou; oya na vuna ko ni sega ni vakarorogo kina ” 48Era sa qai sauma na Jiu, ka kaya vua, “E sega li ni dina na neimami a kaya ni ko kai Samaria, kei na neimami a kaya tale ga ni curumi iko tiko e dua na tevoro?” 49Sa qai kaya ko Jisu, “E sega ni curumi au tiko e dua na tevoro. Au sa vakarokorokotaki Tamaqu, ia ko ni sa vakalialiai au ga. 50Au sa sega ni vakasaqara na noqu lagilagi, sa tiko e dua sa vakasaqara ka vakatau lewa kina. 51Au tukuna vakadodonu sara vei kemuni, kevaka e dua e katona e lomana na noqu vosa ka talairawarawa kina, e na sega sara ni mate.” 52Era sa qai kaya vua ko ira na Jiu, “Sa qai macala vei keimami ni curumi iko dina tiko e dua na tevoro! Sa mate ko Eparaama; era sa mate tale ga na parofita; ia ko iko, ko kaya, ʻKevaka e dua sa katona na noqu vosa ka talairawarawa kina e na sega sara ni mate.' 53O iko beka o cecere cake vei Eparaama, na tama i keimami? Sa mate ko koya ka ra sa mate tale ga na parofita; o nanuma tiko o cava o iko?” 54Sa qai sauma tale ko Jisu, ka kaya, “Kevaka au vakalagilagi au ga, e na ka wale na noqu lagilagi; ia ko Tamaqu, o koya ko ni kaya tiko ni nomuni Kalou, o koya ga e vakalagilagi au. 55Ko ni sega ni kilai koya: ia au kilai koya ko i au. Kevaka au na kaya ni'u sega ni kilai koya, au sa na wili vaka tamata lasulasu me vakataki kemuni; ia au sa kilai koya, ka sa katona ka muria tiko na nona vosa. 56E a marautaka vakalevu ko Eparaama, na tamamuni, ni a tiko me raica na gauna ni noqu lako mai. Ia sa mani raica ka reki kina ” 57Era sa qai kaya vua ko ira na Jiu, “Ko sa raici Eparaama dina? E se sega mada ga oqo ni ko yabaki limasagavulu!” 58Sa qai kaya vei ira ko Jisu, “Au tukuna vakadodonu sara vei kemuni, ni se bera ni sucu ko Eparaama, au sa bula tu o i au ” 59Era sa qai tomi vatu me ra vakaviriki koya; ia e a vunitaki koya ko Jisu, ka biuta na Valenisoro.

will be added

X\