JONI 7

1Ni sa oti na veika koya, sa qai vakalakova ko Jisu na veivanua e so e Kalili. E a sega ni via lako ki Jisutia ko koya me vaka ni ra via vakamatei koya tiko na Jiu. 2A sa voleka tiko na gauna ni nodra Solevu ni Vale Vakacevaceva na Jiu. 3E ratou a mani kaya kina vua na tacina, “Lako tani e ke, ka lako ki Jutia, me ra na raica tale ga na nomu tisaipeli na cakacaka ko cakava tiko. 4Ni sega ni dua e dau cakava vuni tu ga na ka, kevaka e gadreva tiko me kilai. Me vaka ni ko sa cakava tiko na veika oqo, vakaraitaki iko ki vuravura.” 5(Ka ni ratou a sega tale tiko ga ni vakabauti koya ko iratou na tacina.) 6Sa qai kaya kina vei iratou ko Jisu, “E se sega tiko ni yaco mai na noqu gauna, ia vei kemudou sa tautauvata tu ga na gauna kece ga. 7Era sega ni cati kemudou rawa na lewe i vuravura; ia era cati au ga, ni'u sa vakatakila tiko ni sa ca na nodra i valavala. 8Dou lako cake ga ko i kemudou ki na Solevu: au na sega mada ni lako ki na Solevu oqo; ka ni sa sega ni yaco sara mai na noqu gauna.” 9Ia ni sa kaya oti na veika oqo vei iratou, sa qai mai tiko voli ga yani e Kalili. 10Ia ni ratou sa lako oti na tacina ki na Solevu, sa qai lako cake tale ga kina ko Jisu; a sega ni lako e na matana levu, ia e a lako vakavuni ga. 11Era a vakasaqarai koya na Jiu e na Solevu, ka ra kaya, “E vei mada ko koya?” 12E a levu na veivosaki lo baleti koya vei ira na lewe vuqa. Era a kaya e so, “A tamata vinaka ko koya.” Era kaya e so tale, “E sega, sa vagolei ira vakatani na lewe vuqa ko koya ” 13Ia e sega ga ni dua me vosa doudou me baleti koya, ni ra sa rerevaki ira na nodra i liuliu na Jiu. 14Ia ni sa rauta na veimama ni gauna ni Solevu, sa qai lako cake ko Jisu ki na Valenisoro, ka tekivu me veivakatavulici. 15Era a kurabui kina na nodra i liuliu na Jiu, ka kaya, “Sa dua tani na levu ni kila ka ni tamata oqo! E la'ki rawata tu beka mai vei, ni a sega tu ni vuli?” 16Sa qai sauma vei ira ko Jisu, ka kaya, "E sega ni noqu na i vakavuvuli au sa vakatavuvulitaka tiko vei kemuni, e nei koya ga ka a talai au mai. 17Kevaka e dua na tamata e via cakava na loma ni Kalou, e na kila na i vakavuvuli, se sa ka mai vua na Kalou, se'u sa vosa tiko vakai au ga. 18Ko koya e vosa e na nona kaukauwa ga vaka i koya, e vakasaqara tiko na nona dokai, ia ko koya e vakasaqara na dokai nei koya ka talai koya mai, e tamata dina ka sega vua na cala. 19E sega li ni a solia vei kemuni na Lawa ko Mosese? Ia e sega ga ni dua vei kemuni e muria na Lawa. A cava ko ni via vakamatei au tiko kina?” 20Era sa qai sauma mai na lewe vuqa ka kaya, “E tiko vei iko e dua na tevoro: ko cei e via vakamatei iko?” 21Sa qai sauma ko Jisu ka kaya vei ira, “Au a cakava e dua na cakacaka mana, ia ko ni a kurabui kece kina. 22E a vakaroti kemuni ko Mosese mo ni cilivi ira na luvemuni tagane (e dina ga ni a sega ni vu mai vei Mosese na veicilivi, mai vei ira ga na qase), ka ko ni a mani ciliva e dua na gone tagane e na Siga ni Vakacecegu. 23Ia kevaka sa cilivi na gone tagane e na Siga ni Vakacecegu, me kakua kina ni voroki na Lawa i Mosese me baleta na veicilivi, a cava ko ni qai cudruvi au kina ni'u a vakabula, me bula vinaka sara e dua na tamata e na Siga ni Vakacecegu? 24Ni kakua ni dau lewa na ka e na kena i rairai ga, ia ni vakataulewa ga e na i vakarau ni lewa dodonu.” 25Era sa qai kaya e so vei ira na kai Jerusalemi, “E sega li ni ko koya oqo era a saga tiko na veiliutaki me ra vakamatea? 26Ia raica, e vosa tiko koya ko koya e na matana levu, ka ra bau sega ni kaya vua e dua na ka! E vakaevei? Era sa vakadeitaka beka e lomadra ko ira na i liuliu ni sa i koya dina oqo na Karisito? 27Ia na Karisito, ni sa lako mai, e na sega e dua e kila se lako mai vei. Ia na tamata oqo eda kila na vanua e lako mai kina.” 28Ia ni sa veivakatavulici tiko ko Jisu e na Valenisoro sa kaci e na domo levu, ka kaya, “Ko ni sa kilai au dina li, ka kila tale ga na vanua au lako mai kina? Au sega ni lako mai e na noqu lewa vakai au. Ia sa dina ko koya ka talai au mai, ko koya ko ni sega ni kila. 29Ia au sa kilai koya ko i au, ka ni'u a lako ga mai vua, ka a talai au mai ko koya.” 30Era sa qai saga me ra vesuki koya, ia e a sega ga ni bau dua e tarai koya, ni a se sega ni yaco mai na nona gauna. 31Ia era a vakabauta e lewe vuqa vei ira na tamata ka ra kaya, “Ni sa na lako mai na Karisito, e na levu cake beka na cakacaka mana e cakava mai na kena sa cakava rawa na tamata oqo?” 32Era a rogoca ko ira na Farisi na nodra veivosakitaki Jisu lo tiko vaka koya ko ira na lewe vuqa, ka ra a mani talai ira na ovisa ko ira na bete levu kei ira na Farisi me ra la'ki vesuki koya. 33Sa qai kaya vei ira ko Jisu, “Au na tiko vakalailai wale tale ga kei kemuni, ka'u sa na qai lako vua ka a talai au mai. 34Ko ni na vakasaqarai au, ka na sega ni kunei au, baleta ni ko ni na sega ni rawa ni lako ki na vanua au na tiko kina.” 35Era a veikayaka kina vakai ira na nodra i liuliu na Jiu, “Evei beka na vanua e na lako kina na tamata oqo, me da na sega ni kunei koya rawa kina? E na lako beka li vei ira na noda era dui veiseyaki tu e na veikoro va-Kirisi, ka la'ki vakatavulici ira na kai Kirisi? 36A cava beka na i balebale ni nona kaya, ʻDou na vakasaqarai au ka sega ni kunei au; na vanua tale ga au na tiko kina dou na sega ni lako rawa kina?’ “ 37E na i otioti ni siga ni Solevu, na siga bibi duadua sara e na Solevu, sa qai tu cake ko Jisu ka kaci, ka kaya, “Kevaka sa via gunu e dua na tamata, me lako mai vei au, ka gunu! 38Ko koya sa vakabauti au, me vaka e kaya na i Vola Tabu, e na dave mai lomana na veiuciwai ni wai bula!” 39E a vosataka na ka oqo ko koya me baleta na Yalo Tabu, na Yalo ka na soli vei ira era na vakabauti koya e muri. Ka ni a se sega ni soli na Yalo Tabu e na gauna koya baleta ni se bera ni kau cake ko Jisu ki na nona i tikotiko lagilagi. 40Ni ra sa rogoca na vosa koya e lewe vuqa vei ira na tamata, era sa qai kaya, “Sa i koya dina oqo na Parofita.” 41E so tale era kaya, “E na lako li mai Kalili na Karisito? 42E a sega li ni kaya na i Vola Tabu ni na tubu mai na kawa i Tevita na Karisito, ka ni na mai sucu mai Peceliema, na koro ka a tiko kina ko Tevita?” 43A mani tubu kina e dua na veileti vei ira na tamata me baleti koya. 44Era a via vesuki koya e so, ia e a sega ga ni bau tarai koya e dua na tamata. 45Ia ni ra sa lesu tale na ovisa era sa qai tarogi ira ko ira na bete levu kei ira na Farisi, ka ra kaya, “A cava ko ni sega ni kauti koya mai kina?” 46Era sa qai sauma na ovisa, ka kaya, “E sega ni se bau dua na tamata e vosa me vaka na tamata koya!” 47Era sa qai kaya na Farisi vei ira na ovisa, “O i kemuni tale ga o ni sa la'ki rawai? 48O ni sa bau kila li e dua li vei ira na i liuliu se vei ira na Farisi me vakabauti koya? 49O ira na lewe vuqa era tu koya era sega ni kila na Lawa i Mosese, o koya gona e sa na yaco kina vei ira na cudru ni Kalou!” 50E dua vei ira na Farisi ka tiko e kea ko Nikotimo, o koya ka a la'ki raici Jisu e na dua na gauna e liu. Sa qai kaya ko koya vei ira na kena vo, 51“E na vakatau lewa li na noda Lawa vua e dua na tamata ni sa bera ni rogoci koya mada e liu me kila na ka e a cakava?” 52Era a qai sauma ka kaya vua, “E sega li ni ko kai Kalili tale ga ko iko? Vakasaqara e na loma ni Vola Tabu ka raica ni sa sega mada ni bau dua na Parofita e tubu mai Kalili ” 53Era sa qai dui lako kece ga na tamata ki na nodra veivale.

will be added

X\