JONI 6

1Ni sa oti na veika koya, sa qai lako ko Jisu ki tai kadua ni wasawasa ko Kalili, oya na wasawasa ko Taiperia. 2Era a mani muri koya e lewe vuqa sara na tamata ni ra a sa raica oti na veicakacaka mana e a cakava vei ira na tauvimate. 3Sa qai cabe ki na ulunivanua ko Jisu ka tiko sobu kei iratou na nona tisaipeli. 4Sa voleka tiko mai na nodra Kanavata ni Lakosivia na Jiu. 5Ia ni tacake ko Jisu ka raici ira na lewe vuqa ni ra lako tiko yani vua, sa qai kaya vei Filipi, “E vei beka e rawa ni datou na voli madrai kina me ra bau kana kina ko ira oqo?” 6(E a kaya koya ko koya me vakatovolei Filipi ga; ni sa kila tiko ko koya na ka me na cakava.) 7Sa qai sauma vua ko Filipi, ka kaya, “E na sega ni rauti ira e rua na drau na tiki ni siliva na madrai, me ra bau vakalalai mada ga kina.” 8Sa qai kaya vua ko Adriu, na taci Saimoni Pita, e dua vei iratou na nona tisaipeli, 9“E tiko oqo e dua na gone tagane ka tiko vua e so na madrai parile, kei na rua na ika: ia e na dua li na betena vei ira na lewe vuqa oqo?” 10Sa qai kaya ko Jisu, “Tukuna vei ira na tamata me ra dabe.” Ia e a bau veico vinaka toka na vanua koya. Era sa mani dabe na tamata; ka rauta e lima na udolu na kedra i wiliwili. 11Sa qai taura na madrai ko Jisu ka vakavinavinakataka vua na Kalou ka vota vei ira ka ra sa dabe tiko. A kitaka vaka tale ga kina ko koya na ika; ka ra sa kana kece me vaka na levu ni ka era dui vinakata. 12Ia ni ra sa mamau kece, sa qai kaya ko koya vei iratou na nona tisaipeli, “Dou kumuna vata na veitikina lalai e vo, me kakua ni vakamaumautaki e dua na ka.” 13E ratou a mani kumuna na i vovo ni buli madrai parile e lima ka vo mai vei ira na kana, ka ratou a vakasinaita e tinikarua na sova. 14Ia ni ra sa raica na tamata na cakacaka mana sa cakava ko Jisu, era sa qai kaya, “Sa i koya dina oqo na Parofita ka a dodonu me na lako mai ki vuravura!” 15Ia ni sa kila rawa ko Jisu ni ra sa vakarau la'ki tauri koya vakaukauwa na tamata me ra buli koya me tui, sa qai biuta duadua na vanua koya ka lako tale ki na ulunivanua. 16Ni sa yakavi mai na vanua, e ratou sa lako sobu na nona tisaipeli ki matasawa; 17ka ratou vodo ki na dua na waqa, ka kosova tale na drano me ratou lako ki Kapenaumi. Sa qai bogi sara mai na vanua, ia e se sega tiko ga ni yaco yani vei iratou ko Jisu. 18Sa liwa mai e dua na cagi kaukauwa ka sa yavavala vakalevu na wai. 19Ia ni sa rauta beka e lima se ono na kilomita na vanua e ratou vocera, e ratou sa qai raici Jisu ni sa lako tiko e na dela ni wai, ka sa torova tiko yani na waqa, ka ratou sa .rere vakalevu. 20Ia sa qai kaya vei iratou ko Jisu, “O i au ga oqo; dou kakua ni rere.” 21E ratou sa qai vakavodoki koya sara ki waqa e na yalo marau; ka sa udu sara yani na waqa ki na vanua e ratou a mua tiko kina. 22E na mataka, era sa qai raica ko ira na lewe vuqa ka ra tu mai na tai kadua ni wai ni a sa vo duadua tiko ga mai kea e dua na waqa; era raica tale ga ni a sega ni vodo vata kei iratou na nona tisaipeli ko Jisu, ka ni ratou a lako ga vakai iratou. 23Era a lako tale ga yani e so na waqa mai Taiperia, ka voleka ki na yasana era a kana madrai kina ni sa vakavinavinakataka oti na Turaga. 24Ni ra sa raica na lewe vuqa ni sa sega e kea ko Jisu, ka sega tale ga kina ko iratou na nona tisaipeli, era sa qai vodo tale ki waqa, ka lako ki Kapenaumi, me ra vakasaqarai Jisu. 25Ia ni ra sa raici koya e na tai ni drano kadua, era sa qai kaya vua, “Vakavuvuli, ko ni a lako mai ki ke e na gauna cava?” 26Sa qai sauma vei ira ko Jisu ka kaya, “A ka dina au na tukuna oqo vei kemuni: ko ni sega ni vakasaqarai au baleta ni ko ni a raica na veicakacaka mana au a cakava, ia baleta ga ni ko ni a kania na madrai ka mamau kina. 27Ni kakua ni ogataka na kakana e rawa ni rusa, ia na kakana ga e na tu dei tu ka yacova na bula tawa mudu, na kakana ka na solia vei kemuni na Luve ni Tamata: ni sa i koya sa tiko vua na i vakatakilakila ni sa vakadonui koya na Kalou ko Tamana.” 28Era sa qai kaya vua, “A cava me keimami cakava, me keimami kitaka kina na cakacaka ni Kalou?” 29Sa qai sauma ko Jisu ka kaya vei ira, “Sa i koya oqo na cakacaka e vinaka vua na Kalou: mo ni vakabauti koya ka a tala mai ko koya .” 30Era sa qai kaya vua, “A cakacaka mana cava ko na cakava, me keimami raica ka vakabauti iko kina? A cava ko na cakava? 31Era a kania na mana na noda qase e na loma ni vanua lala, me vaka ga e a sa kaya oti tu na i Vola Tabu, ʻE a vakani ira ko koya e na madrai mai lomalagi.’ “ 32Sa qai kaya vei ira ko Jisu, “Au sa tukuna vakadodonu vei kemuni ni a sega ni madrai dina mai lomalagi e a solia vei kemuni ko Mosese; ia ko Tamaqu ga e a solia vei kemuni na madrai dina mai lomalagi. 33Ni madrai ka a solia na Kalou sa i koya ka a lako sobu mai lomalagi, ka mai solia na bula ki vuravura ” 34Era sa qai kaya vua, “Turaga, ni solia tiko ga mai vei keimami na madrai oqo.” 35Sa qai kaya vei ira ko Jisu, "Ko i au na madrai ni bula. Ko koya e na lako mai vei au e na sega sara m via kana; ko koya tale ga e na vakabauti au e na sega sara ni via gunu. 36Ia au sa kaya vei kemuni, ko ni sa raici au, ia ko ni sega ni vakabauta. 37Ko ira kece sa solia mai vei au ko Tamaqu era na lako mai vei au; ko koya tale ga e lako mai vei au, au na sega sara ni biuta laivi. 38Ni'u a sega ni lako mai lomalagi me'u cakava na lomaqu, ia na loma i koya ga ka a talai au mai. 39Ka sa i koya oqo na loma i koya ka a talai au mai, me'u kakua ni vakayalia e dua vei ira ka solia mai vei au ko koya, ia me'u na vakaturi ira cake ga e na i otioti ni gauna. 40Ni sa i koya oqo na loma i Tamaqu, me nodra na bula tawa mudu ko ira yadua sa raica na Luvena ka vakabauti koya; ka'u na vakaturi ira cake e na i otioti ni gauna ” 41Era sa qai tekivu vosa kudrukudrutaki koya ko ira na Jiu, e na vuku ni nona a kaya, “Ko i au na madrai ka a lako sobu mai lomalagi ” 42Era a kaya, “E sega li ni ko Jisu oqo, na luve i Josefa, ka da kilai rau ko tamana kei tinana? E qai kaya ga vaka cava ko koya, ʻAu a lako sobu mai lomalagi?’ “ 43Sa qai sauma ko Jisu ka kaya vei ira, “Dou kakua ni vosa kudrukudru. 44E sega ni rawa ni lako mai vei au e dua na tamata kevaka e sega ni vakayarayarataki koya mai ko Tamaqu, ko koya ka a talai au mai; ka'u na vakaturi koya cake e na i otioti ni gauna. 45Era a vola na parofita ka vaka, ʻE na vakavulici ira kece ga na tamata na Kalou.' Ko ira kece ga era rogoci Tamaqu ka vuli vua, era na lako mai vei au. 46E sa sega mada ni sa raici Tamaqu e dua na tamata. Ko koya duadua ga ka lako mai vua na Kalou e sa raici koya. 47Au tukuna vakadodonu sara vei kemuni ni sa nona na bula tawa mudu na tamata sa vakabauta. 48Ko i au na madrai ni bula. 49Era a kania na mana e na loma ni vanua lala ko ira na nomuni qase, ia era sa mate. 50Ia kevaka e dua e kania na madrai oqo, na madrai ka a lako sobu mai lomalagi, e na sega ni mate. 51Ko i au na madrai bula ka lako sobu mai lomalagi; kevaka e dua e kania na madrai oqo, e na bula ka tawa mudu. Ia na lewequ ga sa i koya na madrai au na solia me bula kina ko vuravura ” 52Era a qai veileti vakai ira na Jiu, ka kaya, “E na solia rawa tu vakaevei na tamata oqo na lewena me da kania?” 53Sa qai kaya kina vei ira ko Jisu, “Au tukuna vakadodonu sara vei kemuni, kevaka ko ni sega ni kania na lewe ni Luve ni Tamata ka gunuva na nona dra, e na sega vei kemuni na bula. 54Ko koya sa kania na lewequ ka gunuva na noqu dra sa nona na bula tawa mudu, ia au na vakaturi koya cake e na i otioti ni gauna. 55Ni sa kakana dina na lewequ, ka sa ka ni gunu dina na noqu dra. 56Ko koya sa kania na lewequ ka gunuva na noqu dra, sa bula tiko e lomaqu, ka'u sa bula tale tiko ga e lomana ko i au. 57Me vaka sa bula tiko ko Tamaqu ka a talai au mai, au sa bula tale ga e na vuku i Tamaqu. Sa vaka tale ga kina ko koya sa kani au, e na bula tale ga e na vukuqu. 58Sa i koya oqo na madrai ka a lako sobu mai lomalagi: e sega ni vaka na kena era a kania na qase, ka ni ra a qai mate ga. Ko koya e kania na madrai oqo e na bula ka tawa mudu.” 59E a vosataka na veika oqo ko Jisu e na valenilotu, ni a veivakatavulici tiko mai Kapenaumi. 60Ni ra sa rogoca na vosa koya e lewe vuqa na nona tisaipeli, era sa qai kaya, “Sa rui dredre na vakasama oqo, ko cei e na muria rawa?” 61Ia ni sa kila e lomana ko Jisu ni ra sa vosa kudrukudru na nona tisaipeli e na ka koya, sa qai kaya vei ira, “E vakaevei e vakaleqa na lomamuni na ka oqo? 62Ia a cava beka ko ni na kaya kevaka ko ni na raica na Luve ni Tamata ni sa lako cake ki na vanua ka a tiko kina e liu? 63Sa i koya na Yalo ni Kalou ka solia na bula, ia na kaukauwa ni tamata e sega sara ga na kena yaga. A vosa ka'u sa vosataka vei kemuni sa vosa vakayalo ka sa vu ni bula. 64Ia e so vei kemuni e sega tiko ni vakabauta ” (Ni sa kilai ira mai na i vakatekivu ko Jisu ko ira ka sega ni vakabauta, kei koya e na bukiveretaki koya.) 65Sa qai kaya tale ko koya, “O koya oqo au a kaya kina vei kemuni ni na sega ni lako rawa mai vei au e dua na tamata, kevaka e sega ni dolava vua na sala ko Tamaqu ” 66E na vuku ni ka koya, era a suka tale kina e lewe vuqa vei ira na nona tisaipeli, ka sega tale ni lako vata kaya. 67Sa qai kaya ko Jisu vei iratou na lewe tinikarua, “Dou sa via lako tani tale ga ko i kemudou?” 68Sa qai sauma vua ko Saimoni Pita ka kaya, “Turaga, me keitou na lako tale vei cei? O i kemuni ga sa tu vei kemuni na vosa ni bula tawa mudu. 69Keitou sa vakabauta ka kila ni sa i kemuni na Le Dua Yalosavasava ni Kalou.” 70Sa qai sauma vei iratou ko Jisu ka kaya, “E sega li ni'u a digitaki kemudou na lewe tinikarua? Ia e dua vei kemudou sa i to tiko ni tevoro.” 71E a kaya koya ko koya me baleti Jutasa, na luve i Saimoni Isikarioti, ni dina ga ni dua vei iratou na lewe tinikarua ko koya ia e na qai bukiveretaki Jisu tale e muri.

will be added

X\