JONI 5

1Ni sa oti veika koya, sa qai yaco e dua na nodra solevu na Jiu, ka a mani lako cake kina ki Jerusalemi ko Jisu. 2E tiko mai Jerusalemi e dua na i sisili, volekata na Matamata ni Sipi, ka yacana e na vosa vaka-Iperiu ko Pecisaca, ka tiko kina e lima na kena vale. 3Era davo tu kina e lewe vuqa na tauvimate - ko ira na mataboko, na lokiloki, na wamalai [ka ra waraka tiko me vakayavalati na wai. 4E dau lako sobu ki na i sisili e dua na agilosi e na so na gauna ka vakayavalata na wai. Ia ko koya ga e sobu e liu ki wai e na gauna e vakayavalati kina sa vakabulai sara mai na mate kece ga e tauvi koya.] 5Ia e tiko e kea e dua na tamata ka sa tolusagavulu ka walu na yabaki na dede ni nona tauvimate tu. 6Ni sa raici koya ko Jisu ni davo koto, ka kila ni sa dede na nona vaka koto koya, sa qai kaya vua, “Ko sa via bula, se segai?” 7A sauma na tamata tauvimate ka kaya, “E sega saka ni dua na tamata me kauti au ki na i sisili ni sa vakayavalati na wai; ia ni'u sa dau lako tiko kina, sa lako tale mai e dua ka mai liu vei au.” 8Sa qai kaya vua ko Jisu, “Tu cake, taura na nomu i davodavo ka lako ” 9E a bula vakasauri sara ko koya, ka taura na nona i davodavo ka lako. Ia na siga koya na Siga ni Vakacecegu. 10ʻOya na vuna era a kaya kina na Jiu vua na tamata ka vakabulai, “Oqo na Siga ni Vakacecegu, e sega ni tara vei iko mo colata na nomu i davodavo ” 11Ia e a qai sauma vei ira ko koya, ka kaya, “Ko koya ga ka a vakabulai au, e a kaya vei au, ʻTaura na nomu i davodavo ka lako ” 12Era a qai tarogi koya tale, ka kaya, “Ko cei na tamata ka kaya vei iko, ʻTaura na nomu i davodavo ka lako’?” 13Ia ko koya ka a vakabulai e sega ni kila se ko cei ka a vakabulai koya, ka ni ra lewe vuqa sara era a tu e kea ka a sa lako lo tani mai kina ko Jisu. 14Ni sa oti na veika koya a qai kunei koya ko Jisu c na Valenisoro, ka kaya vua, “Raica, ko sa bula vinaka oqo; kakua ni valavaia ca tale, de qai yaco vei iko e dua na ka e ca vakalevu cake.” 15Sa qai lako na tamata koya ka tukuna vei ira na Jiu ni sa i Jisu ga ka a vakabulai koya. 16Oqori na i tekivu ni nodra vakacacani Jisu na Jiu, baleta ni a cakava na veika ko ya e na Siga ni Vakacecegu. 17Ia e a mani kaya kina ko Jisu, “Sa cakacaka tiko ga ko Tamaqu, ka'u sa cakacaka tale ga ko i au.” 18Oqo na vuna era sa qai gadreva vakalevu cake ga kina na Jiu me ra vakamatei koya, e sega ni baleta wale ga ni a vakacacana na Siga ni Vakacecegu, ia e baleta tale ga ni a vakatoka tale ga na Kalou me Tamana dina; me vakatauvatani koya kina kei na Kalou. 19E a qai sauma kina ko Jisu ka kaya vei ira, “Au tukuna vakadodonu sara vei kemuni: ni sega ni dua na ka e cakava vaka i koya ga na Luvena, e cakava ga na ka e raica ni cakava tiko ko Tamana. Na ka ga e cakava na Tamana, e cakava tale ga na Luvena. 20Ni sa lomana na Luvena ko Tamana ka vakaraitaka kina vua na veika kece e cakava tiko ko koya. E na vakaraitaka vua na veicakacaka e lelevu cake mai na veika oqo, mo ni na kurabui kece kina. 21Me vaka sa vakaturi ira cake na mate ko Tamana, ka vakabulai ira, sa vaka kina na Luvena, sa vakabulai ira sa vinakata ko koya. 22Sa sega tale ga ni lewa e dua na tamata ko Tamana, ia sa lesia na Luvena me vakatau lewa e na ka kece ga, 23me ra vakarokorokotaka kina na Luvena na tamata kece ga me vaka era vakarokorokotaka na Tamana. O koya e sega ni vakarokorokotaka na Luvena e sega tale ga ni vakarokorokotaka na Tamana, ko koya ka a talai koya mai. 24“Au na tukuna vakadodonu sara vei kemuni ni ko koya sa rogoca na noqu vosa, ka vakabauti koya ka talai au mai, sa nona na bula tawa mudu; e na sega ni lewai me cudruvi, ia sa toki ga mai na mate ki na bula. 25Au tukuna vakadodonu sara vei kemuni ni sa lako tiko mai na gauna, io sa yaco dina mai, era na rogoca kina na mate na domo ni Luve ni Kalou, ka ra na bula ko ira era sa rogoca. 26Me vaka sa bula vaka i koya ga na Tamana, sa solia vaka kina vua na Luvena me bula vaka i koya ga; 27ka sa solia na kaukauwa me vakatauca na lewa, ni sa Luve ni Tamata ko koya. 28Dou kakua ni kurabuitaka na ka oqo; ni sa lako tiko mai na gauna era na rogoca kina na domona ko ira kece ka ra tu e na i bulubulu, 29ka ra na lako cake mai kina; ko ira na i valavala vinaka era na tu cake tale me ra bula, ia ko ira na i valavala ca era na tu cake tale me ra lewai. 30“E sega ni dua na ka au rawa ni cakava vaka i au ga; au sa dau tauca na lewa me vaka ga na ka sa tukuna vei au na Kalou. Sa dodonu gona kina na lewa au dau tauca, ka ni sega ni'u dau via muria ga na lomaqu, ia na loma i koya ga ka talai au mai. 31“Kevaka au mai tukuni au tiko ga vaka i au, e sega ni dina na noqu i tukutuku. 32Ia sa tiko e dua tani tale ka mai tukuni au, ka'u sa kila ni sa dina na nona i tukutuku me baleti au. 33Ko ni a tala e so na nomuni tamata vei Joni, ia e a vakadinadinataka ga na ka dina ko koya. 34E sega ni kena i balebale koya ni'u vakararavi tiko ki na i tukutuku ni tamata, ia au sa kaya ga na ka oqo mo ni vakabulai kina. 35Ko Joni e a vaka e dua na cina sa waqa ka caudre tu ka ko ni a rekitaka toka mada vakalailai na nona rarama. 36Ia sa tiko oqo e dua na i vakadinadina e baleti au e levu cake mai na kena ka solia ko Joni: na veicakacaka au sa cakava tiko, koya na veicakacaka ka a solia mai vei au ko Tamaqu me'u vakayacora, era sa vakadinadinataka ni a talai au mai ko Tamaqu. 37Ia ko Tamaqu ko koya ka talai au mai, sa tukuni au tale ga ko koya. Ko ni sa sega mada ni bau rogoca na domona se raica na matana; 38e sega tale ga ni tiko e na lomamuni na nona vosa, baleta ni ko ni sega ni vakabauti koya ka tala mai ko koya. 39Ko ni sa vakasaqaqara e na loma ni Vola Tabu ni ko ni nanuma ko ni na kunea kina na bula tawa mudu, ia na i vola oqo e tukuni au. 40Ia ko ni bese ga ni lako mai vei au me nomuni kina na bula. 41“E sega na betena vei au na nodra veivakadokadokai na tamata. 42Ia au sa kilai kemuni, ka'u sa kila ni sega e lomamuni na loloma vua na Kalou. 43Au sa lako mai e na yaca i Tamaqu, ia ko ni sega ga ni vakabauti au; ia ke lako ga mai e dua e na yacana ga, ko ni na qai vakabauti koya. 44Ko ni na qai vakabauta rawa vaka cava, ni ko ni sa veivakadokadokai tiko ga vaka i kemuni, ka sega ni via qara na veivakadokadokai mai vua na Kalou e duabau ga? 45Ni kakua ni nanuma ni'u na beitaki kemuni vei Tamaqu; sa tiko e dua ka na beitaki kemuni koya ko Mosese, o koya ko ni sa vakanuinui tiko kina. 46Kevaka ko ni a vakabauti Mosese dina ke ko ni sa vakabauti au tale ga; ka ni a vola ko koya na ka e baleti au. 47Ia kevaka ko ni sega ni vakabauta na nona i vola, ko ni na qai vakabauta vaka cava na noqu vosa?”

will be added

X\