JONI 4

1Ni sa qai kila na Turaga ni ra sa rogoca na Farisi na nona sa rawai ira tiko ka papitaisotaki ira e lewe vuqa cake na tisaipeli mai vei Joni. 2(Ia e a sega ni veipapitaisotaki ko Jisu, ko iratou ga na nona tisaipeli.) 3Sa qai biuti Jutia ko koya ka lako tale ki Kalili. 4E koto na nona sala e na loma ni vanua ko Samaria. 5Sa mani yaco sara ko Jisu ki na dua na koro kei Samaria, ka yacana ko Saika; e voleka ki na tiki ni vanua ka a solia ko Jekope vei Josefa na luvena. 6E tiko kina na toevu i Jekope. Ia ni sa oca e na taubale ko Jisu, sa qai la'ki dabe toka e na bati ni toevu ni rauta na tinikarua na kaloko e na siga levu tutu. 7Sa qai lako yani ki kea e dua na yalewa ni Samaria me la'ki taki wai, ka sa kaya vua ko Jisu, “Au kerea mada me'u gunu.” 8(Ni ratou sa lako tu na nona tisaipeli ki voli kakana ki na koro e na gauna koya.) 9Sa qai kaya vua na yalewa ni Samaria, “E rawa vakacava vei iko, ni ko kai Jutia, mo kere wai vei au, ni'u yalewa ni Samaria?” (Ni sega ni rawa ni ra tiko vata na Jiu kei ira na kai Samaria.) 10Sa qai sauma ko Jisu ka kaya vua, “Kevaka wale ga ko sa kila na i solisoli ni Kalou, kei koya ka kere gunu tiko vei iko, ke ko a sa kerea oti vua, ka sa na solia vei iko ko koya na wai bula.” 11Sa qai kaya vua na yalewa, “E sega saka tu na nomuni i takitaki, ka sa titobu na toevu, ko ni na kauta mai vei na wai bula? 12Ko ni sa uasivi cake beka vei Jekope na tama i keimami, ka a solia vei keimami na toevu, ka a gunu kina ko koya, kei iratou na luvena, kei na nona manumanu?” 13Sa qai sauma ko Jisu ka kaya vua, “Ko koya e na gunu e na wai oqo e na via gunu tale; 14ia ko koya e na gunu e na wai au na solia vua e na sega ni via gunu ka tawa mudu; ia na wai au na solia vua e na yaco me wai vure e lomana ka tovure yani ki na bula tawa mudu.” 15Sa qai kaya vua na yalewa, “Ni solia saka mai vei au na wai oqori, me'u kakua kina ni via gunu tale, se lako tale mai ki ke me'u taki ” 16Sa qai kaya vua ko Jisu, “La'ki kaciva mada mai na watimu mo drau lako mai ki ke ” 17A sauma na yalewa ka kaya, “E sega na watiqu.” Sa qai kaya vua ko Jisu, “Ko sa kaya dina, ʻE sega na watiqu,’ 18ni ko sa vakawati oti kei na lima na tagane, ka sega ni watimu dina ko koya ko drau tiko vata oqo. Sa dina sara na nomu vosa e na vuku ni ka oqo .” 19Sa qai kaya vua na yalewa, “Au sa raica rawa saka ni ko i kemuni e dua na parofita. 20Era dau lotu na neimami qase e na ulunivanua oqo, ia ko ni kaya ni tiko ga mai Jerusalemi na tikina e dodonu me da lotu kina.” 21Sa qai kaya vua ko Jisu, “Yalewa, vakabauti au, sa roro tiko mai na gauna ko ni na sega ni lotu kina vua na Tamada e na ulunivanua oqo se mai Jerusalemi. 22Ko ni sa lotu tiko vei koya ko ni sega ni kila; keimami sa lotu vei koya keimami sa kila; ka ni na lako mai vei ira na kai Jutia na veivakabulai. 23Ia e na yaco mai na gauna, ka sa i koya sara ga oqo, ni ra na lotu vakayalo ka vakaidina vei Tamada ko ira era sa lotu dina, ni sa qara ko Tamada me ra vakaoqo ko ira era lotu vua. 24A yalo na Kalou, ko ira era lotu vua e dodonu me ra lotu vakayalo ka vakaidina.” 25Sa qai kaya vua na yalewa koya, “Au sa kila ni na lako mai e na dua na gauna na Mesaia (o koya sa vakatokai na Karisito); ia e na gauna e na yaco mai kina e na mai tukuna vei keda na veika kece ga.” 26Sa qai kaya vua ko Jisu, “O i au ga ka'u vosa tiko oqo vei iko, na Mesaia ” 27E na gauna sara ga koya e ratou sa yaco mai kina na nona tisaipeli, ka ratou kurabui ni veivosaki tiko ko koya kei na dua na yalewa; ia e a sega ga ni dua me taroga, “Na cava ko vinakata?” se “A cava ko ni vosa tiko kina vua?” 28Sa qai biuta tu na nona saqa ni wai na yalewa ka lako ki na koro, ka kaya vei ira na tamata, 29“Ni mai raica mada na tamata ka tukuna vei au na veika kece ga au a cakava. E sega beka ni sa i koya oqo na Karisito?” 30Era sa qai biuta na koro ka lako vei Jisu. 31Ia ni ra se bera yani, e ratou sa cikevi Jisu tiko na tisaipeli, ka kaya, “Vakavuvuli, ni kana mada” 32Sa qai kaya vei iratou ko koya, “E tu vei au na qau kakana me'u kania, ia dou sa sega ni kila.” 33E ratou sa qai veitarogi kina na tisaipeli ka kaya, “A sa dua beka e kau kakana mai vua?” 34Sa qai kaya vei iratou ko Jisu, “Sa qau kakana me'u cakava na loma i koya ka a talai au mai, ka vakaotia na nona cakacaka. 35E sega li ni ko ni dau kaya, ʻSa vo ga e va na vula me qai yaco mai na gauna ni tatamusuki’? Raica, au sa kaya vei kemudou, dou tacake ka rai yani ki na i teitei ka ra tu oqori; era sa matua mai ka ra sa waraka tu me ra tamusuki. 36Ko koya sa tatamusuki sa saumi sara tiko ka sa kumuna tiko na vuata ki na bula tawa mudu; me rau marau vata kina na daukabukaburaki kei koya na dautatamusuki. 37Sa dina kina na vosa koya, ʻE dua e a kaburaka, ka dua tani a qai tamusuka.' 38Au a talai kemudou mo dou tamusuka na ka dou a sega ni cakacakataka; era a cakacaka kina e so tani, ia dou sa mai tauca na vua ni nodra cakacaka ” 39Era a mani vakabauti Jisu e lewe vuqa na kai Samaria e na koro koya e na vuku ni nona vosa na yalewa ka a kaya, “A tukuna vei au ko koya na ka kece ga au a cakava.” 40Sa mani yaco gona kina ni ra sa yaco yani vua ko ira na kai Samaria era sa qai kerei koya me tiko vata mada kei ira; ka sa mani tiko kina ko koya ka siga rua. 41Era a lewe vuqa sara tale era a qai vakabauta e na vuku ni vosa i Jisu; 42ka ra a kaya vua na yalewa, “Oqo keimami sa vakabauta, e sega ni baleta na nomu vosa, ia baleta ga ni keimami sa qai rogoci koya sara ko i keimami, ka kila ni sa i koya oqo na i Vakabula kei vuravura” 43Ia ni sa oti e rua na siga sa qai lako sara ki Kalili ko Jisu, 44ni a sa tukunaoti ko koya ni sega ni dau dokai na parofita e na nona vanua. 45Ia ni sa yaco ki Kalili ko koya era sa marautaki koya sara na tamata, ni ra a raica na veika kece ka a cakava mai Jerusalemi e na gauna ni kanavata; ka ni ra a lako tale ga ki na kanavata ko ira. 46Sa qai lako tale ko Jisu ki Kena mai Kalili, na koro ka a vukica kina na wai me waini. A tiko kina e dua na turaga vakaitavi levu ni matanitu. E dua tiko na luvena tagane ka tauvimate koto mai Kapenaumi. 47Ni sa rogoca ko koya ni sa lako tani mai Jutia ki Kalili ko Jisu, sa qai lako vua, ka kerea me lako sobu mada me la'ki vakabula na luvena, ni sa voleka koto ni ciba. 48Sa qai kaya vua ko Jisu, “E na sega ni dua vei kemuni e vakabauta vakavo ga kevaka e na raica taumada e so na cakacaka mana kei na veika veivakurabuitaki ” 49Sa qai kaya vua na turaga koya, “Daru mai lako sobu saka, de qai mate na luvequ.” 50Sa qai kaya vua ko Jisu, “Lako ga, sa bula na luvemu!” A sa vakabauta na vosa i Jisu ko koya ka lako sara. 51Ia ni sa lako tiko e ratou sa mai tavaki koya na nona tamata ka kaya vua, “Sa bula na luvemuni!” 52Sa qai vakataroga vei iratou ko koya se gauna cava e a tekivu me bula cake kina na gone. E ratou a qai kaya vua, “Sa takali vua na katakata e na noa e na dua na kaloko ” 53A sa nanuma sara ko tamana ni gauna sara ga koya ka a kaya kina vua ko Jisu, “Sa bula na luvemu ” Sa mani vakabauta sara ko koya kei ira kece na nona lewe ni vuvale. 54Oqo tale na i karua ni cakacaka mana e a cakava ko Jisu ni sa lesu ki Kalili e na nona a tiko mai Jutia.

will be added

X\