JONI 3

1E dua na nodra i liuliu na Jiu, a yacana ko Nikotimo, ka lewe ni lawalawa ka ra vakatokai na Farisi. 2A qai lako ko koya vei Jisu e na dua na bogi ka kaya vua, “Vakavuvuli, keimami sa kila ni ko ni sa lako mai vua na Kalou me i vakavuvuli, ni sega ni dua na tamata e cakava rawa na veicakacaka mana ko ni sa cakava oqo ke sega ni tiko vata kei koya na Kalou .” 3Sa qai sauma ko Jisu ka kaya vua, “Au tukuna vakadodonu sara vei iko: kevaka e sega ni sucu tale e dua na tamata, e na sega ni raica rawa na matanitu ni Kalou.” 4Sa kaya vua ko Nikotimo, “E na sucu rawa vakaevei e dua na tamata ni sa tamata bula tu? E rawa li ni curu tale ki na kete i tinana ka me qai la'ki sucu tale mai?” 5Sa qai kaya ko Jisu, “Au tukuna vakadodonu sara vei iko: kevaka e sega ni sucu e dua na tamata e na wai kei na Yalo Tabu e na sega ni curu rawa ki na matanitu ni Kalou. 6Sa vakayago na ka sa sucu e na yago; ia sa vakayalo na ka sa sucu e na Yalo. 7Kakua ni kurabui ni'u sa kaya vei iko, ʻE dodonu mo ni sucu tale.' 8Sa dau liwa na cagi ki na yasana e digitaka; ko sa rogoca ga na kena rorogo, ia ko sega ni kila na yasana e lako mai kina se na yasana e lako yani kina. Sa vaka tale ga kina ko ira yadua era sa sucu e na Yalo Tabu.” 9Sa qai vosa ko Nikotimo ka kaya vua, “E na yaco rawa vakaevei na veika oqo?” 10Sa qai sauma ko Jisu ka kaya vua, “Ko iko na nodra i vakavuvuli na Isireli, ko qai sega tu ni kila na veika oqo, ne? 11Au tukuna vakadodonu sara vei iko, keitou kaya tiko na ka keitou kila, ka keitou tukuna na ka keitou sa raica; ia ko ni sega ga ni vakabauta na neitou i tukutuku. 12Kevaka au sa tukuna vei kemuni na veika vakavuravura ko ni qai sega ni vakabauta, ko ni na qai vakabauta rawa vakaevei kevaka au tukuna vei kemuni na veika vakalomalagi? 13A sa sega ni dua na tamata e sa bau lako cake oti ki lomalagi, vakavo ga na Luve ni Tamata, ko koya ka a lako sobu mai lomalagi.” 14Ia me vaka ga ka a laveta cake na gata parasa ko Mosese mai na loma ni vanua lala, e dodonu me laveti cake tale ga vaka kina na Luve ni Tamata, 15me nodra kina na bula tawa mudu ko ira yadua era sa vakabauti koya. 16Ni sa lomani vuravura sara vaka oqo na Kalou, sa solia kina na luvena e duabau ga sa vakatubura, me kakua ni rusa ko ira yadua era sa vakabauti koya, me nodra ga na bula tawa mudu. 17Ni a sega ni tala mai na luvena ki vuravura na Kalou me veilewaitaki vuravura, ia me ra vakabulai ga na kai vuravura e na vukuna. 18O koya sa vakabauti koya e na sega ni lewai; ia ko koya e sega ni vakabauta, sa lewai oti tu, ni sega ni vakabauta na Luve ni Kalou e le duabau ga ka a vakatubura ko koya. 19Oqo na yavu e tau kina na lewa: ni sa lako mai na rarama ki vuravura, ka ra qai vinakata ga na tamata na butobuto ka cata na rarama, ni ca na nodra i valavala. 20Ni sa dau cata na rarama ko koya sa dau caka ca, ka sega ni lako mai ki na rarama, de kunei na nona i valavala. 21Ia ko koya sa dau cakava na ka dina, sa dau lako mai ki na rarama, me vakaraitaki na nona i valavala ni sa vaka na loma ni Kalou. 22Ni sa oti na veika koya, e ratou sa qai lako ko Jisu kei iratou na nona tisaipeli ki na vanua ko Jutia. E ratou sa tiko vata e kea, ka sa veipapitaisotaki kina ko koya. 23A veipapitaisotaki tale tiko ga ko Joni mai Enoni, voleka ki Selimi, ka ni levu kina na wai. Era sa lako tiko ga yani vua na tamata ka sa papitaisotaki ira ko koya. 24(E na gauna koya e se bera kina ni biu ki na valeniveivesu ko Joni.) 25E a tubu e dua na veileti vei ira na tisaipeli i Joni kei na dua na Jiu e na vuku ni veivakasavasavataki. 26E ratou sa qai lako vei Joni na nona tisaipeli ka kaya vua, “Vakavuvuli, ko ni nanuma tiko na tamata ka drau a tiko vata mai na tai kadua ni Joritani, ko koya ko ni a mai tukuna tiko, e sa veipapitaisotaki tiko e na gauna oqo ko koya, ka ra sa lako kece tiko ga vua na tamata!” 27Sa qai sauma ko Joni ka kaya, “E sega ni dua na tamata e rawata e dua na ka, kevaka e sega ni soli vua mai lomalagi. 28Ko i kemudou vaka i kemudou e rawa ni ko dou vakadinadinataka ni'u a kaya, ʻNi'u sega ni Karisito ko i au, ia ni'u a talai ga me'u liu mai vua.' 29Sa nona ga na tagane vou na yalewa vou; ia na i tokani ni tagane vou, o koya ka tu voli e kea ka vakarorogo tiko, sa reki ni sa rogoca sara na domo ni tagane vou. Oqo na vuna au sa rui marau dina kina vakalevu. 30Sa dodonu me levu cake tiko ga ko koya, ka me'u lailai sobu tiko ga ko i au ” 31Ko koya sa lako mai cake, sa levu cake vei keda kece ga; ko koya sa tubu e vuravura sa kai vuravura ga ka sa vosataka ga na veika vakavuravura. Ko koya sa lako mai lomalagi sa levu cake vei keda kece ga. 32Sa mai tukuna ko koya na ka sa raica ka rogoca, ia e sega ga ni dua e vakabauta na nona i tukutuku. 33Ia ko koya sa vakabauta na nona i tukutuku sa vakadinadinataka kina ni sa dina ga na Kalou. 34O koya sa tala mai na Kalou sa mai tukuna na vosa ni Kalou; sa tukuna rawa e na vuku ni Yalo Tabu ka a solia vakayauyau vua na Kalou. 35Sa lomana na Luvena na Tamana ka sa solia ki ligana na veika kece ga. 36Ko koya sa vakabauta na Luvena sa nona na bula tawa mudu; ia ko koya sa talaidredre vua na Luvena e na sega ni raica na bula, ia e na tiko ga vua na cudru ni Kalou ka tawa mudu.

will be added

X\