JONI 21

1Ni sa oti na veika koya, sa qai vakaraitaki koya tale ko Jisu vei iratou na tisaipeli mai na drano mai Taiperia; ka a vakaraitaki koya vaka oqo. 2E ratou a tiko vata voli ko Saimoni Pita, kei Tomasi, o koya ka vakatokai na “Drua”, kei Nacanieli na kai Kena mai Kalili, kei rau na luve i Sepeti, ka lewe rua tale na nona tisaipeli. 3A qai kaya vei iratou ko Saimoni Pita, "Au sa lako mada ki qoli ” E ratou a mani kaya vua, “Keitou na lako tale ga yani.” E ratou sa qai lako ka vodo ki na dua na waqa. Ia e ratou a sega ni rawata e dua na ika e na bogi koya. 4Ia ni sa mataka mai, sa tu mai matasawa ko Jisu; ia eratou a sega ga ni kila na tisaipeli ni sa i Jisu koya. 5Sa qai kaya vei iratou ko Jisu, “Ra cauravou, sa bau so na ika?” E ratou a sauma, “E sega sara ga ni bau dua.” 6Sa qai kaya vei iratou ko koya, “Dou balata na lawa ki na i matau ni waqa, dou na kunea kina e so .” E ratou a mani balata kina, ka ratou a sega ni yavia rawa na lawa, ni sa ka levu sara na ika. 7A ka oqo e a kaya kina vei Pita na tisaipeli ka dau lomana ko Jisu, “Na Turaga bagi ka tu oqo!” Ni sa rogoca ko Saimoni Pita ni sa i koya na Turaga koya, sa qai daramaka na nona i sulu vagonedau (ka ni a luvata tu na nona i sulu) ka rika ki wai. 8E ratou sa qai yaco ki vanua e na waqa lailai ka ratou tiko kina ko iratou na tisaipeli tale e so ni ratou a sega ni yawa sara mai vanua, ka ni rauta beka ga e dua na drau na mita na kena yawa. E ratou sa qai dreta yani ki vanua na lawa ka sa sinai tu e na ika. 9Ia ni ratou sa sobu ki vanua eratou sa raica sara e dua na buka ni sa qilaiso vinaka tu ka sa tavu tu kina e so na ika ka tu tale ga e so na madrai. 10Sa qai kaya vei iratou ko Jisu, “Dou kauta mai e so na ika ko dou sa qai rawata ga oqo.” 11Sa qai lako ko Pita ki waqa ka yavia mai ki vanua na lawa sa sinai tu e na ika lelevu, e dua na drau limasagavulu ka tolu. Ia e dina ga ni a levu vaka koya na ika, e a sega ga ni bote na lawa. 12Sa qai kaya vei iratou ko Jisu, “Dou mai katalau .” Ia e a sega ga ni doudou e dua vei iratou na tisaipeli me tarogi koya, “Ko cei ko i kemuni?” ni ratou sa kila ni sa i koya ga na Turaga koya. 13Sa qai lako ko Jisu ka taura na madrai ka solia vei iratou; ka kitaka vaka tale ga kina na ika. 14Sa i koya oqo na i katolu ni gauna ka vakaraitaki koya kina ko Jisu vei iratou na nona tisaipeli ni sa tu cake tale mai na mate. 15Ni ratou sa katalau oti, sa qai kaya vei Saimoni Pita ko Jisu, “Saimoni na luve i Joni, ko sa lomani au vakalevu cake mai vei iratou oqo?” Sa kaya vua ko koya, “Io turaga, ko ni sa kila ni'u sa lomani kemuni.” Sa qai kaya vua ko Jisu, “Vakani ira na noqu lami.” 16Sa kaya tale vakarua vei koya ko Jisu, “Saimoni na luve i Joni, ko sa lomani au li?” Sa kaya vua ko Pita, “Io Turaga, ko ni sa kila ni'u sa lomani kemuni.” Sa qai kaya tale vua ko koya, “Vakatawai ira na noqu sipi ” 17A sa taroga tale, “Saimoni na luve i Joni, ko sa lomani au?” Sa rarawa na loma i Pita ni sa kena i katolu na nona kaya vua, “Ko sa lomani au.” A mani kaya vua, “Kemuni na Turaga, ko ni sa kila na ka kece ga, ko ni sa kila ni'u sa lomani kemuni .” A qai kaya vua ko Jisu, “Vakani ira na noqu sipi. 18E dina, e dina au sa kaya vei iko: ni ko a gone ko a dau vauca na nomu i sulu, ka lako voli vakaveitalia; ia, ni ko sa qase mai ko na dodoka na ligamu ka na vauci iko e dua tani, ka kauti iko ki na vanua ko sega ni vinakata.” 19E a vosa vaka oqo me vakatakila kina na i tovo ni mate e na vakalagilagia kina na Kalou ko koya. Ni sa vosa oti vaka oqo, a qai kaya vua, “Muri au ” 20E a qai vuki ko Pita, ka raica na tisaipeli ka dau lomana ko Jisu ni muri tiko yani, o koya tale ga ka a ravita na lomaserena e na i vakayakavi, ka a kaya, “Turaga, ko cei e na bukuveretaki kemuni?” 21Ni sa raici koya ko Pita, a qai kaya vei Jisu, “Turaga, e na vaka evei ko koya oqo?” 22A sauma vua ko Jisu, “Kevaka e lomaqu me bula tiko ga ko koya ka yacova ni'u lesu tale mai, a cava ko ya vei iko? Ko iko, mo muri au ga!” 23A qai rogo yani vei ira na veiwekani na vosa oqo, ni na sega ni mate na tisaipeli ko ya. Ia, e se sega ni a kaya vua ko Jisu ni na sega ni mate ko koya; a kaya ga, “Kevaka e lomaqu me bula tiko ga ko koya ka yacova ni'u lesu tale mai, a cava ko ya vei iko?” 24Sai koya na tisaipeli oqori ka a vosataka na veika oqo, ka vola tale ga na veika oqo, ka keitou sa kila ni sa dina na nona i tukutuku. 25E a vuqa sara tale na veika e a cakava ko Jisu. Kevaka era a volai kece, au nanuma ni na oso ko vuravura e na veivola e na volai.

will be added

X\