JONI 20

1E na mataka caca e na i matai ni siga ni macawa, ni sa butobuto tu ga na vanua, e a lako ki na i bulubulu ko Meri na yalewa ni Makitala, ka raica ni sa kau tani tu na vatu mai na i bulubulu. 2Sa mani cici sara ka lako vei rau ko Saimoni Pita kei na tisaipeli kadua, ko koya ka dau lomana ko Jisu, ka kaya vei rau, “Era sa kauta tani na Turaga mai na i bulubulu, ia keitou sa sega ni kila na vanua era sa la'ki vakotori koya kina!” 3E rau sa qai lako ko Pita kei na tisaipeli kadua, ka rau lako sara ki na i bulubulu. 4E rau a cici ruarua vata kina, ka mani sivi Pita na tisaipeli kadua, ka liu sara ki na i bulubulu. 5E a cuva sobu ko koya ka rai ki loma, ka raica na i sole lineni ni koto kina; ia e a sega ga ni curu ki loma. 6Sa qai yaco tale ga yani ko Pita, ka curu sara ki na i bulubulu, ka raica na i sole lineni ni tu e kea, 7kei na i tavoi ka ^ viviraki e na ulu i Jisu. E sega ui koto vata kei na i sole lineni, ia sa lobi tani koto ga vaka i koya e na dua na vanua. 8Sa qai curu tale ga na tisaipeli kadua, o koya ka a liu ki na i bulubulu, ka a raica tale ga, ka vakabauta. 9E rau a sa sega tiko ga oqo ni kila na i Vola Tabu ni kaya tiko ni sa dodonu me tu cake tale mai na mate ko koya. 10Oti koya e rau sa qai lesu tale na tisaipeli ki na nodrau i tikotiko. 11E a mani tu voli ga ko Meri ena taudaku ni bulubulu, ka tagi tiko. la ni sa tagi tiko ga, a mani cuva sobu ka rai ki loma ni bulubulu; 12ka qai raica e lewe rua na agilosi e rau vaka i sulu vulavula ka rau dabe toka e na vanua ka a koto kina na yago i Jisu, e dua ki uluna ka dua ki yavana. 13E rau sa qai kaya mai vua, “Yalewa, a cava ko tagicaka tiko?” Sa kaya vei rau ko koya, “Ni ra sa kauta tani na noqu Turaga, ka'u sega ni kila se ra vakotori koya evei ” 14Ni sa vosa oti vaka koya, sa qai vuki ka raici Jisu ni sa tu e kea, ka sega ga ni kila ni sa i Jisu koya. 15Sa qai kaya vua ko Jisu, “Yalewa, a cava ko tagicaka tiko? Ko vakasaqarai cei?” A nanuma ga ko koya ni koya na i vakatawa ni loga ni senikau, sa mani kaya vua, “Kevaka ko ni sa kauti koya tani, ni tukuna saka vei au na vanua ko ni sa vakotori koya kina, me'u na la'ki kauti koya ” 16Sa qai kaya vua ko Jisu, “Meri!” A vuki sara ko koya, ka kaya vua e na vosa vaka-lperiu, “Raponai!” (E kena i balebale Vakavuvuli.) 17Sa qai kaya vua ko Jisu, “Kakua ni tarai au; ni'u se bera ni lako cake vei Tamaqu. Ia mo lako ga vei iratou na wekaqu, ka kaya vei iratou ni'u sa lako cake tiko oqo vei Tamaqu ka Tamamudou, ki vua na noqu Kalou ka nomudou Kalou ” 18Sa qai lako ko Meri na yalewa ni Makitala ka kaya vei iratou na tisaipeli ni sa raica na Turaga ka tukuna tale vei iratou na veika e a tukuna vua ko Jisu. 19E na yakavi ni siga koya, na i matai ni siga ni macawa, a sogo tu ga na katuba ni vale e ratou a tiko kina na tisaipeli, e na nodratou rerevaki ira na Jiu, sa qai lako yani ko Jisu, ka la'ki tu e na kedratou maliwa, ka kaya vei iratou, “Me tiko vei kemudou na vakacegu!” 20Ni sa vosa oti vaka koya, sa qai vaka-raitaka vei iratou na ligana kei na sarisarina. E ratou sa marau na tisaipeli ni ratou raica na turaga. 21Sa qai kaya tale vei iratou ko Jisu, “Me tiko vei kemudou na vakacegu, me vaka ka a talai au mai ko Tamaqu, au sa talai kemudou vaka tale ga kina.” 22Ni sa vosa oti vaka koya, sa qai ceguvi iratou, ka kaya vei iratou, “Me curumi kemudou na Yalo Tabu! 23Na i valavala ca ni tamata yadua dou bokoca, sa na bokoci kei na i valavala ni tamata yadua dou sega ni sereka, sa na sega ni sereki ” 24Ko Tomasi e dua vei iratou na lewe tinikarua. E vakatokai tale ga ko koya me yacana na “Drua”. E a sega ni tiko vata kei iratou ko koya e na gauna e a lako yani kina ko Jisu. 25E ratou a mani kaya vua ko iratou na vo ni tisaipeli, “Keitou sa raica na Turaga.” Ia sa qai kaya vei iratou ko Tomasi, “Kevaka au na sega ni raica na we ni vako e na ligana, ka daramaka na noqu i qaqalo ki na we ni vako, ka daramaka na ligaqu ki na sarisarina, au na sega ni vakadinata ” 26Ni oti e walu tale na siga, e ratou a tiko tale e loma ni vale na tisaipeli, ka sa tiko vata kina kei iratou ko Tomasi. Sa qai lako yani ko Jisu, ni a sogo tu ga na katuba, ka la'ki tu e na kedratou maliwa, ka kaya, “Me tiko vei kemudou na vakacegu ” 27Sa qai kaya vei Tomasi ko koya, “Dodoka mai na nomu i qaqalo, ka raica na ligaqu, ka dodoka mai na ligamu, ka daramaka ki na sarisariqu. Kakua ni dau vakatitiqa; vakabauta ga.” 28Sa vosa ko Tomasi, ka kaya vua, “Noqu Turaga, ka noqu Kalou!” 29A qai kaya vua ko Jisu, “Ni ko sa raici au Tomasi, ko sa qai vakabauta? Sa kalougata ko ira era sa vakabauta ni ra sa sega ni raica.” 30E vuqa tale na veicakacaka mana e a cakava ko Jisu e na matadratou na nona tisaipeli e ra sega ni volai e na i vola oqo. 31Ia era sa volai ga ko ira oqo, mo dou vakabauta kina ni sa Karisito ko Jisu, na Luve ni Kalou; ka me yaco kina, e na vuku ni nomudou sa vakabauti koya, me nomudou na bula.

will be added

X\