JONI 2

1E na i katolu ni siga, e a qai caka e dua na vakamau mai na koro ko Kena mai Kalili. A tiko kina na tina i Jisu, 2ka ratou a bau sureti tale ga ki na vakamau ko Jisu kei iratou na nona tisaipeli. 3Ia ni sa oti na waini, a qai kaya vei Jisu ko tinana, “Sa oti vei ira oqo na waini ” 4Sa qai kaya vua ko Jisu, “A cava e mai nodaru kina? E se bera ni yaco mai na noqu gauna ” 5Ia e a kaya ga vei ira na dauveiqaravi ko tinana, “Na ka kece ga e kaya vei kemudou ko koya, dou cakava.” 6E tu e na tikina koya e ono na saqa vatu ni wai ka rauta ni dua na drau na lita na kedra lelevu ka ra dauvakasavasavataki ira kina na Jiu. 7Sa qai kaya vei ira ko Jisu, “Dou vakasinaita na saqa e na wai.” E ratou sa qai vakasinaita sara na saqa kece koya. 8Sa qai kaya tale vei ira ko koya, “Dou takiva ka kauta yani vua na i liuliu ni soqo .” E ratou sa qai kauta sara. 9Ia ni sa tovolea na wai ka sa vukici tu me waini ko koya na i liuliu ni soqo, ka sega ni kila se kau mai vei, (ia ko ira ga na dauveiqaravi era a takivayani na wai era kila tiko). Sa qai kaciva na tagane vou ko koya na i liuliu, 10ka kaya vua, “Na tamata kece ga era dau solia taumada na waini vinaka, ia ni ra sa gunu vakalevu ko ira na vulagi, era na qai solia na waini vinaka vakarauta ga, ia o iko o maroroya tiko ga na waini vinaka me yacova sara mai oqo.” 11Oqo na i vakatekivu ni cakacaka mana e a cakava ko Jisu mai na koro ko Kena mai Kalili. Sa vakatakila kina na nona kaukauwa; ka ratou sa vakabauti koya na nona tisaipeli. 12Ni sa oti koya, e ratou sa qai lako ki Kapenaumi ko Jisu kei tinana, kei iratou na tacina, kei iratou na tisaipeli, ka tiko kina e na vica na siga 13Sa voleka mai na gauna ni nodra Kanavata ni Lakosivia na Jiu, ka sa mani lako cake ki Jerusalemi ko Jisu, 14ka kunei ira e na Valenisoro na dauvolitaki bulumakau, kei na sipi kei na ruve, kei ira na dauveisau i lavo ni ra qarava tiko na nodra teveli ni veivoli. 15Sa qai cakava ko koya e dua na i kuita waqaliqali ka vakasavi ira kece ga mai na Valenisoro, ka bau kina ko ira na sipi kei ira na bulumakau. A sovaraka na nodra i lavo na dauveisau i lavo, ka vukica na nodra teveli, 16ka kaya vei ira na volitaki ruve, “Dou kauti ira tani sara e ke, kakua ni cakava na vale nei Tamaqu me vale ni veivoli!” 17E ratou sa qai nanuma na nona tisaipeli ni a sa volai tu vakaoqo e na i Vola Tabu: “E na curuma na yaloqu taucoko na talei ni nomuni vale!” 18Era sa qai sauma na Jiu, ka kaya vua, “Na cakacaka mana cava e rawa ni ko cakava me vakaraitaki kina vei keimami ni sa dodonu na ka ko cakava?” 19Sa qai kaya vei ira ko Jisu, “Dou talaraka na vale oqo, ka'u na vakatura cake tale e na tolu na siga .” 20Era sa qai kaya kina na Jiu, “E a tara tiko na vale oqo e na vasagavulu ka ono na yabaki, ia ko iko mo na qai vakatura cake e na tolu ga na siga?” 21Ia na Valenisoro ka a vosataka tiko ko koya, oya na yagona ga. 22Ia ni sa vakaturi cake tale mai na mate ko koya, e ratou sa qai nanuma na tisaipeli ni a sa tukuna oti vei iratou ko koya na ka oqo. E ratou sa qai vakadinata kina na i Vola Tabu kei na vosa ka a kaya ko Jisu. 23E na gauna e a tiko voli kina ko Jisu mai Jerusalemi e na gauna ni Kanavata ni Lakosivia, era a lewe vuqa sara era vakabauti koya e na nodra raica na veika mana e a vakayacora. 24Ia e a sega ga ni soli koya sara vei ira ko Jisu, ni sa kila vinaka na tamata kece ga ko koya. 25A sa sega ni yaga vua me dua e tukuna vua na ka e baleta na tamata, ka ni sa kila ko koya na ka e tu e loma ni tamata.

will be added

X\