JONI 19

1Sa qai kauti Jisu ko Pailato ka vakanakuitataka. 2Era a talia e dua na i sala wavakavotona ko ira na sotia, ka vakaisalataki Jisu kina, ka vakaisulutaki koya e na dua na i sulu lokaloka, 3ka ra kaya, “Mo ni bula na nodra Tui na Jiu!” Ka ra sa qai cabe cake ka sabici koya e na ligadra. 4Sa qai curu tale ki tautuba vei ira na lewe vuqa ko Pailato, ka kaya vei ira, “Raica, au sa kauti koya mai oqo ki tautuba vei kemuni, mo ni kila ni'u sega ni kunea vua e dua na cala.” 5Sa qai curu ki tuba ko Jisu; ka sa vakaisala tu e na i sala wavakavotona, ka vakaisulu e na i sulu lokaloka. Sa qai kaya vei ira ko Pailato, “Raica, oqo na tamata.” 6Ni ra sa raici koya ko ira na bete levu kei ira na ovisa, era sa qoqolou, ka kaya, “Vakoti koya ki na kauveilatai! Vakota ki na kauveilatai!” Sa qai kaya vei ira ko Pailato, “Ni kauti koya ka vakota ki na kauveilatai. O i au, au sega ni kunea vua e dua na cala.” 7Era a kaya yani vua ko ira na Jiu, “E tiko e dua na neimami lawa, ka sa dodonu e na lawa koya me mate ko koya, ni sa tukuni koya tiko me Luve ni Kalou.” 8Ni sa rogoca ko Pailato na vosa koya, sa qai levu cake ga kina na nona rere; 9ka sa curu tale ki na valeniveilewai, ka kaya vei Jisu, “E vei na vanua ko lako mai kina?” Ia e a sega ni sauma ko Jisu. 10Sa qai kaya kina vua ko Pailato, “Ko na sega li ni vosa vei au? Ko sega beka ni kila ni tu vei au na kaukauwa me'u sereki iko, ka tu tale ga vei au na kaukauwa me'u vakoti iko ki na kauveilatai?” 11Sa qai sauma vua ko Jisu, ka kaya, “E sega ni dua na kaukauwa e tu vei iko me baleti au, kevaka e sega ni soli vei iko mai vua na Kalou; o koya gona e levu cake kina na nona i valavala ca ko koya ka a soli au yani vei iko.” 12Ni sa rogoca koya ko Pailato sa qai saga e so na sala me sereki koya kina. Ia ko ira na Jiu, era sa qai qoqolou ga, ka kaya, “Kevaka ko ni sereki koya na tamata oqo, ko ni sa sega ui to vata kei na Sisa. Ko koya ga e tukuni koya tiko ni tui sa saqata tiko na Sisa ” 13Ni sa rogoca na veivosa koya ko Pailato sa qai kauti Jisu ki tautuba, ka dabe e na i dabedabe ni veilewai e na vanua e vakatokai “Na Raravatu”, e na vosa vaka-Iperiu e yacana na Kapaca. 14A sa rauta na siga levu tutu e na Siga Vakarau ni Lakosivia. Sa qai kaya vei ira na Jiu ko Pailato, “Raica, na nomuni Tui!” 15Era sa qai qoqolou kina, ka kaya, “Kauta tani! Kauta tani! Vakoti koya ki na kauveilatai!” Sa qai kaya tale vei ira ko Pailato, “Me'u vakota li ki na kauveilatai na nomudou Tui?” Era a qai sauma yani na bete levu, “E sega na neimami Tui, ko Sisa duadua ga ” 16Sa qai soli koya yani vei ira ko koya me vakoti ki na kauveilatai. Era sa qai tauri Jisu. 17Sa qai lako yani ko koya, ka colata na nona kauveilatai, ka yaco ki na vanua e vakatokai na “Vanua ni Qavokavoka” ka vakatokai ko Kolikoca e na vosa vaka-Iperiu. 18E kea era sa qai vakoti koya kina, vata kei na lewe rua tale na tamata, e rau a yadua na yasana, ka tiko ko Jisu e na kedrau maliwa. 19Sa qai vola ko Pailato e dua na i vakatakilakila, ka tokara e na ulu ni kauveilatai. E volai toka kina, “Ko Jisu na kai Nasareci, na nodra Tui na Jiu.” 20Era a wilika na i vakatakilakila koya e lewe vuqa vei ira na Jiu, ka ni voleka tiko ga ki na koro na vanua ka a vakoti kina ki na kauveilatai ko Jisu. E a volai na i vakatakilakila e na vosa vaka-Iperiu, vaka-Roma, kei na vosa va-Kirisi. 21Era a qai kaya vei Pailato na nodra bete levu, “Mo ni kakua ni vola, ʻNa nodra Tui na Jiu’; me volai ga, ʻE kaya, Ko i au na nodra Tui na Jiu.’ “ 22Sa qai sauma ko Pailato, ka kaya, “Na ka au sa vola, au sa vola!” 23Ni ra sa vakoti Jisu oti ki na kauveilatai ko ira na sotia, era sa qai taura na nona i sulu, ka wasea vaka va, me ra yadua na tikina ko ira na sotia; e ra a taura tale ga vaka kina na i tutuvi: ia na i tutuvi koya e sega ni cula, ka ni tali taucoko ga na tutuna mai cake ka kauta sara ki ra. 24Era a mani veikayaka kina na sotia, “Me da kakua ni dresuka, ia me da vakawirimadigi ga, se me na nei cei.” Me qai vakayacori sara kina na i Vola Tabu, ni a kaya, “Era a qai veivotayaka na noqu i sulu. Ia na noqu i tutuvi era a vakawirimadigi kina ” Sa i koya oya na ka era a cakava na sotia. 25E ratou a tu voleka tu e na kauveilatai i Jisu ko tinana, kei na taci tinana, ko Meri na wati Kilopa kei Meri na yalewa ni Makitala. 26Ni sa rai ko Jisu ka raici rau ko tinana kei na tisaipeli ka dau lomana ko koya ni tu e tikina, sa qai kaya vei tinana, “Yalewa, raica na luvemu!” 27Sa qai kaya vua na tisaipeli, “O koya e sa tinamu!” Mai na tiki ni gauna koya sa kauti koya sara na tisaipeli koya ki na nona vale. 28Ni sa oti koya, ka sa kila ko Jisu ni sa vakacavari na ka kece ga, me vakayacori sara kina na i Vola Tabu, sa qai kaya, “Au sa via gunu.” 29E a tu e kea e dua na bilo sinai e na wai wiwi. Era a mani tonisua e dua na vutovuto e na wai wiwi, ka ciqira e na dua na taba ni isopi, ka dulaka cake ki gusuna. 30Ni sa gunuva oti na wai wiwi ko Jisu, sa qai kaya, “Sa oti!” Ni sa oti koya sa qai vakacuvara na uluna, ka solia yani na yalona. 31Me vaka ni Siga ni Vakavakarau na siga koya, ka sega ni dodonu me na rube tu na yagodratou e na siga ka tarava, koya na Siga ni Vakacecegu (ka dua sara ga na siga tabu levu na Siga ni Vakacecegu koya), era a mani kerei Pailato kina ko ira na Jiu me musuki na yavadratou ka me ratou kau laivi mai kea. 32Era sa mani lako na sotia, ka musuka na yavana na i matai ni tamata ka vaka kina na kena kadua ka rau a vakoti vata kaya ki na kauveilatai. 33Ia ni ra sa lako yani vei Jisu, ka raica ni sa mate tu ko koya, era sa mani sega ni musuka na yavana. 34Ia e dua vei ira na sotia e a qai suaka na sarisarina e na dua na moto, ka a dave sara mai kina na dra kei na wai. 35Sa tukuna na ka oqo ko koya ka a raica sara e matana, ka sa ka dina na nona i tukutuku. Sa kila tale ga ko koya ni sa vosataka tiko na ka dina, mo dou na vakabauta tale ga kina. 36Era sa yaco na veika oqo me vakayacori sara kina na i Vola Tabu: “E na sega ni ramusu e dua na suina ” 37E dua tale na tiki ni Vola Tabu e kaya, “Era na rai yani vua, ko koya era a suaka.” 38Ni sa oti na veika koya, sa qai kerei Pailato ko Josefa na kai Arimacea me kauta na yago i Jisu. Ko Josefa oqo e dua na tisaipeli i Jisu, ia e a dau muri koya vunivuni tu ga, ka ni a rerevaki ira tiko na Jiu. A mani vakadonuya vua ko Pailato, ka sa lako sara ko Josefa ka la'ki kauta na yagona. 39E a lako tale ga yani ko Nikotimo, o koya ka a la'ki raici Jisu e na dua na bogi, ka kauta yani na mura e veiwaki vata kei na yasiyasi, ka rauta e tolusagavulu na kilokaramu na kena bibi. 40E rau sa qai kauta na yago i Jisu ka solega vata kei na ka boi vinaka e na i sole lineni, me vaka na i vakarau ni nodra veibulu na Jiu. 41Ia e tiko e na vanua ka a vakoti kina ki na kauveilatai ko Jisu e dua na loga ni senikau ka tiko kina e dua na i bulubulu vou ka sega mada ni sa bau vakotori oti kina e dua na tamata. 42Ia me vaka ni nodra siga vakarau na Jiu na siga koya, me vaka tale ga ni tiko voleka e kea na i bulubulu, e rau sa mani buluti koya kina.

will be added

X\